الاياق ايەلدى سان سوقتىرىپ كەتتى

پەتروپاۆل. 13 ناۋرىز. وبلىس ورتالىعىنىڭ ءبىر تۇرعىنى الاياقتىڭ ارباۋىنا ءتۇسىپ, قىرۋار  اقشاسىنان ايرىلىپ قالدى. بۇل تۋرالى egemen ءتىلشىسى حابارلادى.

بەلگىسىز بىرەۋ پەتروپاۆلدىق ايەلدىڭ ۇيالى تەلەفونىنا قوڭىراۋ شالىپ, ۇلىنىڭ تەمىرجول ۆوكزالى ماڭايىنداعى  پوليتسيا بولىمىندە قاماۋدا وتىرعانىن,  40 مىڭ تەڭگە اۋدارعان جاعدايدا قىلمىستىق جاۋاپكەرشىلىكتەن قۇتىلاتىنىن حابارلايدى.  «بالانى باۋىر ەتىنە» سانايتىن  انا بايعۇستا ەس قالا ما؟  سۇراعانىن جيناستىرىپ,  ونىڭ ۇيالى تەلەفونىنا  اۋدارادى.  ارادا ءبىرشاما  ۋاقىت وتكەننەن كەيىن ول تاعى  دا حابارلاسىپ, 70 مىڭ تەڭگە تالاپ ەتەدى. نە كەرەك,  اڭقاۋ كەلىنشەك اي-كۇننىڭ امانىندا 80 مىڭ تەڭگەنى «ۇستاتا» سالىپ,  اۋزى اڭقيىپ قالا بەرەدى.

بىلتىر وسىنداي بىرنەشە  وقيعا ورىن الىپ, كۇدىكتىلەر قۇرىقتالعان بولاتىن. مۇنداي الاياقتار  ادامنىڭ  كوڭىل-كۇيى مەن پسيحولوگياسىن بىردەن تانيدى.  ال, مىنا الاياقتىڭ  جابىرلەنۋشىنىڭ ۇيالى تەلەفونىن قالاي تاپقانى بەيمالىم. سوعان قاراعاندا تاجىريبەلى, تىسقاققان بىرەۋ بولۋ كەرەك.  ىزدەستىرۋ شارالارى جۇرگىزىلۋدە, دەيدى پەتروپاۆل قالالىق ىشكى ىستەر باسقارماسى كريمينالدى پوليتسيا ءبولىمىنىڭ جەدەل ۋاكىلى ۆيتالي  مەحانوشين.

ءومىر ەسقالي.

دەرەككوز: egemen.kz

سۋرەت: egemen.kz