پاكستاندا ءولىم جازاسىنا موراتوري تولىق كۇشىن جويدى

استانا. 13 ناۋرىز. پاكستان بيلىگى ەلدەگى ءولىم جازاسىنا جاريالانعان ءموراتوريدىڭ كۇشىن جويدى. بۇل تۋرالى nur.kz حابارلادى. ەل بيلىگى وتكەن جىلدىڭ 16 جەلتوقسانىندا بولعان پەشاۆار قالاسىنداعى لاڭكەستىك وقيعادان كەيىن وسىنداي شەشىم شىعاردى. ايتا كەتەيىك, 2014 جىلدىڭ سوڭىندا لاڭكەستەر پەشاۆارداعى مەكتەپتەردىڭ بىرىنە شابۋىل جاساپ, سونىڭ سالدارىنان 150 ادام مەرت بولدى. ونىڭ 130-ى مەكتەپ وقۋشىسى ەدى. وسى قايعىلى وقيعادان كەيىن پاكستاندا لاڭكەستىكپەن كۇرەستىڭ ۇلتتىق جوسپارى قابىلدانىپ, بىرقاتار جۇمىس قولعا الىندى. ناتيجەسىندە 16 مىڭ ارنايى وپەراتسيا ءوتىپ, 12 مىڭنان استام ادام قاماۋعا الىندى. سونىڭ ىشىندە 140 ادامعا لاڭكەستەرمەن بايلانىسى بار دەگەن ايىپ تاعىلۋدا. جەلتوقسانداعى لاڭكەستىك وقيعادان كەيىن پاكستاننىڭ پرەمەر-ءمينيسترى ناۆاز شاريف ءولىم جازاسىنا ءموراتوريدىڭ تولىق كۇشىن جويۋ تۋرالى شەشىم شىعاردى. بۇل ەلدە اتالعان موراتوري 2008 جىلى جاريالانعان ەدى. سوعان وراي, تەك لاڭكەستىك ارەكەتتەرگە قاتىسى بار قىلمىسكەرلەردەن باسقاسىنىڭ بارلىعى ەڭ اۋىر جازادان امان قالىپ كەلدى. ەندى بۇل شەشىمنىڭ كۇشى جويىلۋىنا بايلانىستى اۋىر قىلمىس جاساعان كەز كەلگەن قىلمىسكەر ءولىم جازاسىنا كەسىلۋى ابدەن مۇمكىن. ەلامان قوڭىر. دەرەك: nur.kz. سۋرەت: polit.ru.