دجەكي چان بەيجىڭدى قولداپ ءان شىرقايدى

استانا. 13 ناۋرىز. قىتايدىڭ اتاقتى كينواكتەرى دجەكي چان بەيجىڭنىڭ 2022 جىلعى قىسقى وليمپيادا ويىندارىنا ۇمىتكەرلىگىن قولداپ, ءان شىرقاماق. بۇل تۋرالى egemen.kz حابارلادى. حالىقارالىق وليمپيادا كوميتەتى (حوك) وتكەن جىلدىڭ شىلدەسىندە نەگىزگى ۇمىتكەر رەتىندە ءۇش قالانى بەكىتتى. بەيجىڭنەن بولەك, ءبىزدىڭ الماتى مەن نورۆەگيا استاناسى وسلو دا اق وليمپيادادان ءۇمىتتى ەدى. الايدا, 2014 جىلدىڭ قازانىندا نورۆەگيا ءوز ەركىمەن باس تارتىپ, نەگىزگى تالاس الماتى مەن بەيجىڭ اراسىندا وتەتىن بولدى. قازىر حوك-تىڭ باعالاۋ كوميسسياسى ەكى قالانىڭ مۇمكىندىكتەرىن سارالاۋدا. 14-18 اقپان كۇندەرى الماتىعا كەلگەن وكىلدەر ءبىزدىڭ مۇمكىندىگىمىزدى جوعارى باعالادى. ەندى 24-28 ناۋرىز ارالىعىندا سول كوميسسيا قىتاي استاناسىنا ات باسىن تىرەيدى. بۇگىندە شىعىستاعى كورشىمىز وسى سىناققا قىزۋ دايىندالۋدا. ءتىپتى بەلگىلى كينواكتەر دجەكي چان دا وليمپيادانىڭ ءوز ەلىندە ءوتۋى ءۇشىن ايانىپ قالاتىن ەمەس. ول حوك وكىلدەرى الدىندا بەيجىڭنىڭ ۇمىتكەر قالا رەتىندە ۇسىنىلعان «ويان, قىس» اتتى رەسمي ءانىن ورىنداماق. اتالعان وليمپيادا ويىندارىنىڭ استاناسى وسى جىلدىڭ 31 شىلدەسىندە حوك-تىڭ كەزەكتى سەسسياسىندا بەلگىلى بولادى. بۇل جيىن مالايزيانىڭ كۋالا-لۋمپۋر قالاسىندا وتەدى. ەگەر بەيجىڭ جەڭىسكە جەتەر بولسا, جازعى جانە قىسقى وليمپيادا ويىندارىن وتكىزگەن العاشقى قالا رەتىندە حاتقا تۇسپەك. دجەكي چاننىڭ اكتەرلىك قىرىنان باسقا, انشىلىك قابىلەتى دە وتە جوعارى. ءتىپتى بۇگىنگە دەيىن 11 ءان جيناعىن شىعارعان ول ءوز ەلىندە كاسىبي انشە رەتىندە دە تانىمال. سونداي-اق, ونىڭ 2008 جىلى بەيجىڭدە وتكەن جازعى وليمپيادا ويىندارىنىڭ اشىلۋ سالتاناتىندا ءان شىرقاعانىن ايتا كەتەيىك. ەلامان قوڭىر. دەرەك: egemen.kz. سۋرەت: superchanblog.blogspot.com.