اقتوبەلىك بالۋان – الەم چەمپيونى

جاقىندا وڭتۇستىك كورەيانىڭ مەن­گۋن قالاسىندا وتكەن VI الەمدىك اسكەري ويىنداردىڭ گرەك-ريم كۇرەسىنەن سپورت شەبەرى مەيرامبەك ايناعۇلوۆ جەڭىمپاز اتانىپ, ولجالى ورالدى. ءتورت جىلدا ءبىر رەت وتكىزىلەتىن بەدەلدى جارىسقا بيىل 117 ەلدەن 7 مىڭنىڭ ۇستىندە سپورتشىلار قاتىسىپتى. قورعانىس مينيسترلىگىنىڭ ارمياشىلاردىڭ ورتالىق سپورت كلۋ­بىنىڭ قىزمەتشىسى مەيرامبەك ايناعۇلوۆ بارلىق بەلدەسۋلەرىن 10:0 ەسەبىمەن ۇتىپ, قارسىلاستارىن تازا جەڭگەن. اقتوبەلىك بالۋان الدىمەن جاستار اراسىندا الەم چەمپيونى ازەربايجان ك.ماممودوۆتىڭ جاۋىرىنىن جەر يىسكەتسە, ودان كەيىن 23 جاسقا دەيىنگىلەر اراسىنداعى ەۋروپا چەمپيوناتىنىڭ قولا جۇلدەگەرى تۇرىك كيرازادان, ازيا چەمپيونى, كىلەم يە­سى كورەي بالۋانى چوي يننەن باسىم تۇسكەن. ال اقتىق باسەكەدە افريكا ويىندارىنىڭ, افريكا قۇرلىعىنىڭ چەمپيونى ەگيپەتتىك ح.ءماحمۋدتى تازا جەڭدى. ول – وتاندىق گرەك-ريم كۇرەسى مەكتەبىنىڭ تاريحىندا مۇنداي جەڭىسكە جەتكەن تۇڭعىش سپورتشى. وسىلايشا جاس بالۋان حالىقارالىق دارەجەدەگى سپورت شەبەرى ءنورماتيۆىن ورىندادى. مەيرامبەكتىڭ جەكە جاتتىقتىرۋشىلارى راحىمجان باقىتجانوۆ پەن قايىرجان بەكەنباەۆتىڭ بۇل جولى دا ۇكىلى ۇمىتتەرى اقتالدى. – بۇل مەنىڭ عانا ەمەس, جاتتىق­تى­رۋشىلارىمنىڭ, مەنى قولداعان وبلىستىق دەنە شىنىقتىرۋ جانە سپورت باسقارماسىنىڭ, گرەك-ريم كۇ­­رەسى فە­دەراتسياسىنىڭ, «اق­پان» كوم­پانياسىنىڭ, بارشا جانكۇيەرلەرىمنىڭ جەڭىسى, – دەيدى مەيرامبەك ايناعۇلوۆ. ول شالقار قالاسىندا تۋىپ, ءوسىپ, وسىنداعى ۆ.تسەحانوۆيچ اتىنداعى №1 بجسم-دا بوز كىلەمنىڭ ءدامىن تاتىپ, جاتتىعۋىن باستاعان. جاس بالۋان كادەتتەر اراسىندا 2011 جىلى الەم چەمپيونى اتاندى. 2013 جىلى ەرەسەكتەر اراسىنداعى قازاقستان كۋبوگىنىڭ يەگەرى, وتكەن جىلى ەرەسەكتەر اراسىندا قازاقستان چەمپيونى, سونداي-اق ەرەسەكتەر اراسىندا قازاقستاننىڭ IV جازعى سپارتاكياداسىنىڭ جەڭىمپازى بولعان نەبارى 21 جاستاعى مەيرامبەك ايناعۇلوۆتىڭ سپورتتاعى الار اسۋى الدا, بولاشاعى بۇدان دا ءۇمىتتى. ساتىبالدى ءساۋىرباي, «ەگەمەن قازاقستان». اقتوبە وبلىسى.