باتىر باۋىرجان مەن ەرجۇرەك ءاليا ەسىمدەرى ماسكەۋدىڭ ەكى مەكتەبىن يەلەنەتىن بولدى

جاقىندا ەلىمىزدىڭ رەسەي فەدەراتسياسىنداعى توتەنشە جانە وكىلەتتى ەلشىسى زاۋىتبەك تۇرىسبەكوۆ حالىقارالىق گۋمانيتارلىق ىنتىماقتاستىق جانە تمد, شەتەلدەردە تۇرىپ جاتقان وتانداستار ىستەرى جونىندەگى فەدەرالدىق اگەنتتىكتىڭ باسشىسى فاريت مۇحامەتشينمەن كەزدەستى, دەپ حابارلادى قازاقستان ەلشىلىگىنىڭ ءباسپاسوز قىزمەتى. كەزدەسۋ بارىسىندا حالىقارالىق گۋمانيتارلىق ىنتىماق­تاستىقتىڭ ماڭىزدى ماسەلەلەرى تالقىلاندى. ف.مۇحامەتشين تمد-عا مۇشە مەملەكەتتەردىڭ 2020 جىلعا دەيىنگى يننوۆاتسيالىق ىنتىماقتاستىعى مەملەكەتارالىق ماقساتتى باعدارلاماسىنىڭ جۇزەگە اسۋى بارىسىن, سونداي-اق حالىقارالىق دامۋعا ىقپال ەتۋ باعدارلاماسىنىڭ جۇمىسى تۋرالى اڭگىمەلەپ بەردى. ءوز كەزەگىندە ديپميسسيا باسشىسى تمد باۋىرلاس حالىقتارىن مادەني جانە گۋمانيتارلىق جاقىنداتۋدىڭ جاڭا ىڭعايى مەن فورمالارىن ىزدەۋ جانە ىسكە اسىرۋ قاجەتتىگىنە توقتالىپ ءوتتى. ز.تۇرىسبەكوۆ ەلشىلىكتىڭ 100 جانە 101-ءشى اتقىشتار بريگاداسىنىڭ قازاقستاندىق اسكەرلەرگە رجەۆ قالاسىندا مەموريال سالۋ جونىندەگى باستاماسىن مىسال رەتىندە كەلتىردى. قازىرگى تاڭدا رەسەي قورعانىس مينيسترلىگىنىڭ ورتالىق مۇراعاتىنان تابىلعان ماتەريالدار نەگىزىندە 11 مىڭداي قازاقستاندىقتىڭ اتى-جوندەرى انىقتالىپ وتىر. ۇلى جەڭىستىڭ 65 جىلدىعى مەن رەسەيدەگى مۇعالىمدەر كۇنى كەڭەستەر وداعىنىڭ باتىرى باۋىرجان مومىش ۇلى مەن ءاليا مولداعۇلوۆا ەسىمدەرىن ماسكەۋدەگى ەكى مەكتەپكە بەرۋ, ولاردى جاڭارتۋ جوباسى ماڭىزدى بولىپ سانالادى. بۇگىنگى تاڭدا بۇل مەكتەپتەر قازاقستاندىق كاسىپكەرلەردىڭ قولداۋىمەن قازىرگى زامانعا ساي وقۋ-تەحنيكالىق قۇرال-جابدىقتارمەن, عىلىمي-تانىمال ادەبيەتتەرمەن, قازاقستاندىق اۆتورلار كىتاپتارىمەن جانە سپورتتىق قۇرال-سايماندارمەن جابدىقتالىپ جاتىر. كەزدەسۋ بارىسىندا تمد شەڭبەرىندەگى ازىق-ت ۇلىك قاۋىپ­سىزدىگى, ماسكەۋ مەتروسىندا “قازاقستان” ستانساسىن, ال الما­تى­داعى سالىنىپ جاتقان مەترودان “ماسكەۋ” ستانساسىن اشۋ, سونداي-اق بۇكىلرەسەيلىك كورمە ورتالىعىنان (بۇرىنعى ۆدنح) قازاقستاندىق مادەني-ىسكەرلىك ورتالىعى رەتىندە “قازاقستان” پاۆيلونىن اشۋ ماسەلەلەرى ءسوز بولدى. “ەگەمەن-اقپارات”.