«سارىارقا» شيرەك فينالدى جەڭىسپەن باستادى (ۆيدەو)

استانا. 12 ناۋرىز. جوعارى حوككەي ليگاسىنىڭ شيرەك فينالىنا شىققان قاراعاندىنىڭ «سارىارقاسى» بۇگىن وسى كەزەڭدەگى العاشقى ويىنىن وتكىزدى. «سارىارقانىڭ» بۇل سىنداعى قارسىلاسى رەسەيدىڭ «ەرماك» كومانداسى. قاراعاندىلىقتار اتالعان ويىندا 3:2 ەسەبىمەن جەڭىسكە جەتتى. بۇل تۋرالى egemen.kz حابارلادى. قاراعاندىدا وتكەن ويىننىڭ 3-مينۋتىندا «سارىارقانىڭ» قورعاۋشىسى يليا انتونوۆسكي كومانداسىن العا شىعاردى. قوناقتار 11-مينۋتتا ەسەپتى تەڭەستىرۋگە مۇمكىندىك تاپتى. «ەرماك» ساپىنان مەرگەندىگىمەن كوزگە تۇسكەن الەكساندر ارحيپوۆ بولاتىن. دەسەك تە, العاشقى كەزەڭدە ايدىن يەلەرى تاعى ەكى شايبا سوعىپ, ەسەپتە العا شىقتى. ۇزىلىسكە ءبىر مينۋت قالعان كەزدە «سارىارقا» ويىنشى باسىمدىعىن جۇزەگە اسىرىپ, ەسەپتى 2:1-گە جەتكىزدى. ەكىنشى شايبانىڭ اۆتورى – ارتۋر كۋزمەنكوۆ. ال ارادا 30 سەكۋند وتكەندە تابلوداعى ەسەپ قاراعاندىلىقتاردىڭ پايداسىنا 3:1-ءدى كورسەتىپ تۇردى. ياعني, ۇزىلىسكە ءبىر سەكۋند قالعان كەزدە يليا انتونوۆسكي ءدۋبلدىڭ اۆتورى اتاندى. كەلەسى كەزەڭدە «ەرماك» حوككەيشىلەرى ەسەپ ايىرماسىن قىسقارتقانىمەن (الەكساندر چيگلينتسەۆ 37), ودان ارىگە شامالارى جەتپەدى. ويىن بارىسىندا «سارىارقانىڭ» قاقپاسىن ۆلاديمير كوۆاچ قورعادى. ال «ەرماكتىڭ» قاقپاسىن يۆان پولوشكوۆ كۇزەتتى. قوس كوماندا اراسىنداعى كەلەسى تارتىس 13 ناۋرىزدا جالعاسىن تابادى. ازىرگە جالپى ەسەپتە ءبىزدىڭ كوماندا 1:0 ەسەبىمەن الدا كەلەدى. ەلامان قوڭىر. دەرەك: egemen.kz. سۋرەت: hc-saryarka.com.