ورنەللو مۋتي ماسكەۋ تەاترلارىنىڭ بىرىندە ونەر كورسەتەدى

استانا. 12 ناۋرىز. يتاليانىڭ اتاقتى كينواكتريساسى ورنەللا مۋتي (شىن اتى-ءجونى فرانچەسكا رومانا ريۆەللي) جۋىردا رەسەيدەگى تەاتر ساحنالارىنىڭ بىرىندە ونەر كورسەتەدى. بۇگىندە ول وسىعان بايلانىستى دايىندىق جۇمىستارىن باستاپ كەتتى. بۇل ءارتىستىڭ رەسەي جەرىندەگى العاشقى سپەكتاكلى بولماق. قازىرگى تاڭدا وسىعان قاتىستى كەلىسسوزدەر جۇرگىزىلىپ جاتىر. مۇنى تاسس حابارلادى. 2010 جىلى مۋتي دراماتۋرگ دجانني كلەمەنتيدىڭ «ەۆرەي» اتتى سپەكتاكلىندە وينادى. بۇل ءارتىستىڭ العاشقى سپەكتاكلى ەكەنىن ايتا كەتەيىك. ەنريكو ماريا لاماننانىڭ رەجيسسەرلىعىمەن وتكەن قويىلىم يتاليادا اسا قىزىعۋشىلىق تۋدىردى. «العاشىندا ءبىز رەسەيدە دە وسى سپەكتاكلدى قويعىمىز كەلدى. الايدا, كەيىن بۇل ويىمىزدان اينىپ, سيلۆانو سپادتىڭ «مىستاننىڭ سوتى» اتتى پەساسىنا توقتادىق. بۇل قويىلىمدى توديدەگى تەاتر فەستيۆالى ءۇشىن ارنايى دايىنداعان ەدىك», – دەيدى ەنريكو لاماننا. اتالعان ەكى پەسا دا ورىس تىلىنە اۋدارىلعان. ءتىپتى مۋتي رەسەي ساحناسىندا ورىس تىلىندە ويناۋى دا ابدەن مۇمكىن. سەبەبى, ول بۇل تىلدە ەركىن سويلەي الادى. ونىڭ اناسى جارتىلاي ورىس, جارتىلاي ەستون قىزى كورىنەدى. كەزىندە ەستونيانىڭ تارتۋ قالاسىندا تۇرىپ, كەيىنىرەك يتالياعا قونىس اۋدارعان. ءارتىستىڭ دايىندىقتى قاشان باستاعانى ازىرگە بەلگىسىز. كينوداعى دەبيۋتىن 14 جاسىندا باستاعان فرانچەسكا رومانا ريۆەلليگە قازىرگى ورنەللا مۋتي دەگەن لاقاپ اتتى ۇسىنعان رەجيسسەر ەكەن. ءبىر قىزىعى, ونىڭ ءبىرىنشى پەرسوناجىنىڭ اتى دا فرانچەسكا بولعان. جۇرت ونىمەن شاتاستىرىپ الماس ءۇشىن ءارى كامەلەتكە تولماعان قىزعا بويجەتكەننىڭ ءرولىن بەرۋ ءۇشىن ءفيلمدى ءتۇسىرۋشى توپ وسىنداي قادامعا بارعان. ايتا كەتەيىك, ورنەللا مۋتي 9 ناۋرىزدا 60 جاسقا تولدى. رەسەيلىك كورەرمەندەر ءمۋتيدى ادريانو چەلەنتانومەن بىرگە شىرقاعان ءانى ارقىلى جاقسى تانيدى. ەلامان قوڭىر. دەرەك: تاسس. سۋرەت: kp.ru.