پاۆلودارلىق ستۋدەنت بۋكمەكەرلىك كەڭسەلەردە 10 ملن. تەڭگە ۇتىلىپ قالدى

پاۆلودار. 12 ناۋرىز. ارتۋر ەسىمدى 21 جاسار ستۋدەنت بۋكمەكەرلىك كەڭسەلەردە 10 ملن تەڭگەگە جۋىق اقشا ۇتىلىپ, ناركوديسپانسەردىڭ دارىگەرلەرىنە حابارلاستى. بۇل تۋرالى egemen.kz ءتىلشىسى حابارلادى. ارتۋر وقۋشى كەزىنەن باستاپ اقشانىڭ بۋىنا ءتۇسىپ, بۋكمەكەرلىك كەڭسەلەرگە بارا باستاعان ەكەن. سودان كەيىن قىزىل اقشاعا قىزىققان بالا بۋكمەكەرلىك كەڭسەلەردەن شىقپاي, كادىمگى ازارت ويىنشىعا اينالا باستاعان. «العاشقى كەزدە كوپ اقشا ۇتىپ الاتىنمىن. بۇل جاعداي كوپكە دەيىن سوزىلمادى. بىرتە-بىرتە ۇتىلا باستاپ, قارىزعا باتىپ كەتتىم. سونى وتەۋ ءۇشىن تاعى دا قارىز الىپ, تولەپ تۇردىم. ەڭ جامانى, كەي-كەزدە قارىزدى وتەۋ ءۇشىن ۇرلىقپەن دە اينالىسا باستادىم. بىراق ەشكىمگە ەشتەڭە بىلدىرتپەدىم. مەنىڭ قارىزدارىم 100 000-نان 200 000 تەڭگەگە دەيىن جەتكەن كەزدەر بولدى. قارىزدارىمدى اكە-شەشەم تولەپ تۇردى. سول ءۇشىن ولاردان تالاي رەت ءسوز ەستىدىم. اكە-شەشەمنىڭ ماعان وسىنى قويشى دەپ جىلاپ, وتىنگەنىن ەسىمە تۇسىرگەندە ءوز ىشىمە ءوزىم سىيماي كەتەمىن. مەن ءبارى ۋاقىتشا, ءبارىن قويا الامىن دەپ ويلادىم», دەيدى ارتۋر. الايدا ءبارى ارتۋر ويلاعانداي بولماي شىقتى. ول مەكتەپتى بىتىرگەن سوڭ, پاۆلوداردان كەتىپ, رەسەيدىڭ ءبىر جوعارى وقۋ ورنىنا وقۋعا تۇسەدى. سول جەردە دە «ەسكى ءانى» تاعى باستالادى. ەندى ول بۋكمەكەرلىك كەڭسەلەرگە 1 000 تەڭگە ەمەس, 1 000 رۋبلدەن باستاپ اقشا قويا باستايدى. ءسويتىپ جۇرگەندە رەسەيدىڭ كەڭسەلەرىنە تەڭگەمەن ەسەپتەگەندە جارتى ميلليونداي تەڭگە قارىز بولىپ, نە ىستەرىن بىلمەي قالادى. كەڭسەنىڭ ادامدارى ارتۋرعا اقشانى قايتارماساڭ سەنى, سەنىمەن قوسا تۋعان-تۋىستارىڭنىڭ ءبارىنىڭ كوزىن جويىپ جىبەرەمىز دەپ قورقىتادى. سودان نە كەرەك, ارتۋر پاۆلودارداعى اتا-اناسىنا حابارلاسىپ, جاعدايىن ايتادى. بالا ءۇشىن اكە-شەشەسى نە ىستەمەيدى دەيسىز؟ تاعى دا اتا-اناسى بالاسىنىڭ قارىزىن تولەپ, ەلگە قايتارىپ الادى. ولار ارتۋردى ناركولوگيالىق ديسپانسەرگە جاتقىزادى. قازىر ول ديسپانسەردە «ويىن ازارتى باتپاعىنان» شىعۋ ءۇشىن ەمدەلىپ جاتىر. دارىگەردەردىڭ ايتۋىنشا, ارتۋر ءبىر ايدان استام ۋاقىت ەمدەلۋدە. العاشقى كەزدە جاس جىگىتتىڭ جاعدايى الاڭداتارلىق بولسا, قازىر ۇيقىسى تىنىش, بۇرىنعى سيمپتومدارىنىڭ بارىنەن قۇلان-تازا ايىققان. داستان كەنجالين. دەرەك: egemen.kz سۋرەت:  egemen.kz