قانات يسلامنىڭ قارسىلاسى وزگەردى

استانا. 12 ناۋرىز. كاسىپقوي بوكستا ۇلت نامىسىن ابىرويمەن قورعاپ جۇرگەن قانات يسلامنىڭ كەلەسى قارسىلاسى بەلگىلى بولدى. سوعان بايلانىستى قازاق بوكسشىسى 23 ناۋرىزدا كولۋمبيالىق ورلاندو دە حەسۋس ەسترادامەن WBA Fedelatin تۇجىرىمى بويىنشا چەمپيوندىق اتاقتى ساراپقا سالادى. بۇل تۋرالى egemen.kz حابارلادى. قاناتتىڭ 23 ناۋرىزدا جەكپە-جەك وتكىزەتىنى اپتا بۇرىن بەلگىلى بولعان. الايدا, ول كەزدە قارسىلاسى رەتىندە باسقا كولۋمبيالىقتىڭ ەسىمى اتالدى. ياعني, چەمپيوندىق اتاق ءۇشىن قانات كارلوس كالۆان ەسىمدى بوكسشىمەن جۇدىرىقتاسۋى ءتيىس ەدى. دەسەك تە, كەلەسى قارسىلاسى رەتىندە ورلاندو ەسترادا بولىپ بەكىتىلدى. بۇل بوكسشى وسىعان دەيىن 17 جەكپە-جەك وتكىزىپ, سونىڭ 11-ىندە جەڭىسكە جەتكەن. التى ايقاسىن تەڭ اياقتاسا, ءبىر مارتە جەڭىلگەن. ون ءبىر جەڭىستىڭ توعىزى نوكاۋتپەن تىركەلگەنىن ايتا كەتەيىك. ال قانات يسلام بۇگىنگە دەيىن 18 جەكپە-جەك وتكىزىپ, سونىڭ بارلىعىندا جەڭىسكە جەتتى. 15 ايقاسىن مەرزىمىنەن بۇرىن اياقتادى. WBA Fedelatin تۇجىرىمى بويىنشا چەمپيوندىق اتاق ازىرگە ءبىزدىڭ بوكسشىدا. سونداي-اق, ءبىرىنشى ورتا سالماقتا بوكستاساتىن قاناتتىڭ WBC International Silve تۇجىرىمى بويىنشا دا چەمپيوندىققا تالاساتىن مۇمكىندىگى بولعان. ايتسە دە, سول ءۇشىن جوسپارلانعان تارتىس وتپەي قالدى. بۇل ايقاستا قازاق بوكسشىسى ارگەنتينا سەنىم ارتقان گۋيدو نيكولاس پيتتوعا قارسى شارشى الاڭعا شىعۋى ءتيىس ەدى. قانات سوڭعى جەكپە-جەگىن 2014 جىلدىڭ تامىز ايىندا وتكىزدى. سول ۇرىستا بوكسشىمىز كولۋمبيالىق فيدەل مونتەرروسانى بەسىنشى راۋندتا قۇلاتقانى ەسىمىزدە. ەلامان قوڭىر. دەرەك: egemen.kz. سۋرەت: youtube.com.