جىلدار جەمىسى

جاقىندا الماتىداعى ۇلتتىق كىتاپحانانىڭ كورمەلەر زالىندا مادەنيەت قايراتكەرى, حالىقارالىق «الاش» ادەبي سىيلىعىنىڭ لاۋرەاتى, فيلولوگيا عىلىمدارىنىڭ كانديداتى, بەلگىلى  اقىن  ءارى ادەبيەت زەرتتەۋشىسى ادىلعازى قايىربەكوۆتىڭ ون تومدىق شىعارمالار جيناعىنىڭ تۇساۋكەسەرى بولدى. ول قازمۋ-دىڭ فيلولوگيا  فاكۋلتەتىن بىتىرگەن.  «لەنينشىل جاس»,  «حالىق كەڭەسى»,  «قازاق ەلى», «شالقار» گازەتتەرىندە ءتىلشى, ءبولىم مەڭگەرۋشىسى, باس رەداكتوردىڭ ءبىرىنشى ورىنباسارى,  «قازاق ەنتسيكلوپەدياسى» باس رەداكتسياسىنىڭ جەتەكشى مامانى  بولىپ قىزمەت اتقارعان. 2000 جىلدان بەرى – س.مۇقانوۆ پەن ع.مۇسىرەپوۆتىڭ مەملەكەتتىك ادەبي-مەموريالدىق مۋزەي كەشەنىنىڭ ديرەكتورى. كوپتەگەن ولەڭدەرى «ەكى مىڭجىلدىق دالا جىرى» (2000), ءۇش  تومدىق قازىرگى قازاق ادەبيەتى انتولوگياسى (ماسكەۋ, 2013), ون تومدىق قازاق پوەزياسىنىڭ انتولوگياسى «جىر مارجانى» (2014)  جيناقتارىنا ەنگەن. ون بەس كىتابى جارىق كورگەن. ادىلعازىنىڭ اقىندىق تالانتى, زەرتتەۋشىلىك الەۋەتى, جۋرناليستىك قارىمى ارىپتەستەرىنىڭ, قالىڭ وقىرماندارىنىڭ ءاردايىم ءجىتى نازارىندا. ول جۇرتشىلىققا بىرنەشە قىرىمەن قاتار تانىلعان قالامگەر. ءبىلىم-بىلىگى مول, ىسىنە تياناقتى, دارىندى, تاباندى, ىزدەنگىش. بۇل ون تومدىقتى ول ءوزىنىڭ 60 جىلدىق مەرەيتويىمەن ورايلاستىرىپ, دەمەۋشىلەر كومەگىمەن,  «TST Company» باسپا كومپانيا­سىنان شىعارعان ەكەن. 1,2,3 – تومدارعا – ولەڭدەرى, تولعاۋلارى, باللادالارى مەن پوەمالارى;  4-تومعا – س.مۇقانوۆ پەن ع.مۇسىرەپوۆتىڭ  ءومىر جولدارى, شىعارماشىلىق قىرلارى تۋرالى جازىلعان ەسسەلەر, عىلىمي-زەرتتەۋ ماقالالار, باياندامالار, وي-تولعامدار; 5-تومعا –  ادەبيەت, مادەنيەت, ونەر, عىلىم جانە قوعامدىق-الەۋمەتتىك ماسەلەلەرگە قاتىستى جازىلعان ماقالالار, 6-تومعا – سىر-سۇحباتتار; 7-تومعا – ەسسەلەر, ادەبي پورترەتتەر, ەستەلىكتەر; 8-تومعا – «تاۋەلسىزدىك جانە قازاق پوەزياسى» مونوگرافياسى, ماقالالار; 9-تومعا – اڭگىمەلەر, دەرەكتى اڭگىمەلەر, وچەركتەر, كۇندەلىك, ارىپتەستەر لەبىزى; 10-تومعا – ماقالالار جانە بيبليوگرافيالىق كورسەتكىش (قۇراستىرعان گ.قۇداباەۆا) توپتاستىرىلعان. كىتاپتىڭ تۇساۋكەسەرىن ۇلتتىق كىتاپحانانىڭ باس ديرەكتورى, مەملەكەتتىك سىيلىقتىڭ لاۋرەاتى, جازۋشى الىبەك اسقاروۆ اشىپ, جۇرگىزىپ وتىردى. قازاقستان جازۋشىلار وداعىنىڭ باسقارما توراعاسى, سەناتور ن.ءورازاليننىڭ, الماتى قالاسى اكىمىنىڭ ورىنباسارى ز.امانجولوۆانىڭ, رەسپۋبليكالىق مادەنيەت, سپورت جانە اقپارات قىزمەتكەرلەرىنىڭ الماتى قالاسى جانە الماتى وبلىسىنداعى كاسىپوداقتارى فيليالىنىڭ ءتورايىمى ساۋلە ناقىپقىزىنىڭ قۇتتىقتاۋلارى تابىستالدى. اقىندار ت.مەدەتبەك, ر.نيازبەك, ز.تىلەۋجان ۇلى, ق.بەگمانوۆ, ب.جاقىپ, م.رايىمبەك ۇلى, سىنشى ءا.مەڭدەكە, جازۋشى-جۋرناليستەر ج.كەنجالين, ق.تۇمەنباي, ق.سارسەنباي, م.احەت, پروفەسسور ت.تەبەگەن ۇلى, ت.ب. قاتىسىپ, وي-پىكىرلەرىمەن ءبولىستى, تىلەكتەرىن قوستى. قازاقستاننىڭ ەڭبەك سىڭىرگەن قايراتكەرى, ءانشى ەركىن شۇكىمان ورىنداعان «ءان-عۇمىر» اتتى ءاننىڭ (سازى مەن ءسوزى ءا.قايىربەكوۆتىكى)  دە تابيعاتى تۇنىق. وسى ءىس-شارا اياسىندا ۇلتتىق كىتاپحانا قورىنان اۆتوردىڭ شىعارماشىلىعىنا ارنالعان كىتاپ كورمەسى ۇيىمداستىرىلدى. اۆتور ون تومدىقتارىن قالا كىتاپحانالارىنا, مۋزەيلەرگە تاپسىردى. قورعانبەك امانجول, «ەگەمەن قازاقستان». الماتى.