پرەزيدەنت لينگۆيستيكالىق كوميسسيا مۇشەلەرىن ءتانتى ەتتى
كەشە نۇرسۇلتان نازارباەۆ قازاقستان رەسپۋبليكاسىنىڭ پرەزيدەنتىنە كانديدات رەتىندە مەملەكەتتىك تىلدەن سىناق تاپسىردى. بۇل ءۇردىس ەل كونستيتۋتسياسىندا بەكىتىلگەن تارتىپكە سايكەس ءوتتى. قازاقستان پرەزيدەنتى بارلىق تاپسىرمانى ءساتتى ورىندادى. اتاپ ايتقاندا, مەملەكەت باسشىسى «ءبىزدىڭ كۇشىمىز – بىرلىكتە» دەگەن تاقىرىپتا جازبا جۇمىسىن جازىپ, ءىلياس ەسەنبەرليننىڭ شىعارماسىنان ءۇزىندى وقىدى, ال اۋىزشا اڭگىمەدە «بابالار ءسوزى – دانالىق كوزى» تاقىرىبىندا سويلەدى. لينگۆيستيكالىق كوميسسيا قورىتىندىسى بويىنشا نۇرسۇلتان نازارباەۆ مەملەكەتتىك ءتىلدى ەركىن مەڭگەرگەن دەپ تانىلدى. ەمتيحاننان كەيىن باق وكىلدەرىنە ارنالعان بريفينگتە لينگۆيستيكالىق كوميسسيانىڭ ءتوراعاسى مىرزاتاي جولداسبەكوۆ وسى شەشىمدەرى تۋرالى كەڭىنەن ءتۇسىندىرىپ ءوتتى. «جازبا جۇمىسى نۇرسۇلتان نازارباەۆ ءوزى تاڭداعان كونۆەرت بويىنشا «ءبىزدىڭ كۇشىمىز – ءبىرلىكتە» دەگەن تاقىرىپتا بولدى. بۇل كىسى پرەزيدەنت بولعالى بەرى مەملەكەتىمىزدىڭ تۋىن تۇعىرلى ەتىپ, ەلدىڭ ىنتىماعىن كوتەرىپ كەلە جاتقان ادام. سول ىنتىماق-ءبىرلىكتىڭ ارقاسىندا قازاقستان 23 جىلدىڭ ىشىندە وسىنداي دارەجەگە جەتتى. وسىنىڭ ءبارىن ەكى پاراق قاعازعا وتە كەڭ, اۋقىمدى, سىيىمدى ەتىپ, تاقىرىپتى وتە ادەمى اشا ءبىلدى. قاتە جوق. كانديدات وسىنداي بولۋ كەرەك دەپ ويلايمىن», – دەدى م.جولداسبەكوۆ. «ەكىنشى سۇراق بويىنشا ءىلياس ەسەنبەرليننىڭ پروزاسىنان ءماتىن بەرىلدى. نۇرسۇلتان ءابىش ۇلى ونى وتە مانەرلەپ وقىپ شىقتى. ءۇشىنشى سۇراق «بابالار ءسوزى – دانالىق كوزى» دەگەن ەركىن تاقىرىپ. نۇرەكەڭ ءوزى ەشبىر مەملەكەتتىڭ تاريحىندا جوق «مادەني مۇرا» دەگەن ۇلكەن باعدارلاما جۇرگىزگەن ادام. ونىڭ قولداۋىمەن 100 تومدىق «بابالار ءسوزى» شىققان. ەلباسى وسى كىتاپتاردان وتە جاقسى مىسالدار كەلتىرىپ, بايىرعى بابالارىمىزدىڭ دانالىعىنان, سولاردىڭ حالىققا بەرەتىن تاربيەلىك ءمانى جونىندە كەڭ ءاڭگىمە جاساپ بەردى. قوسىمشا سۇراقتار بويىنشا كانديدات ابايدىڭ قاراسوزدەرىن ايتىپ بەردى. قورىتىندىسىندا كوميسسيا كانديدات ن.ءا.نازارباەۆ قازاق ءتىلىن ەركىن مەڭگەرگەن دەگەن شەشىم قابىلدادى», – دەپ ءتۇيدى م.جولداسبەكوۆ. «نۇر وتان» پارتياسى اتىنان الداعى كەزەكتەن تىس پرەزيدەنتتىك سايلاۋعا كانديدات رەتىندە ۇسىنىلعان نۇرسۇلتان نازارباەۆتىڭ مەملەكەتتىك تىلدەن تاپسىرعان ەمتيحانىنان كەيىن ورتالىق سايلاۋ كوميسسياسىنىڭ لينگۆيستيكالىق كوميسسيا توراعاسى مىرزاتاي جولداسبەكوۆ باق وكىلدەرىنە سونداي-اق, مەملەكەت باسشىسىمەن ءبىراز ماسەلەلەر جونىندە اقىلداسقانىن ءمالىم ەتتى. «ەمتيحاننان كەيىن ءىس باسىنداعى پرەزيدەنت نۇرسۇلتان نازارباەۆتى بۇگىنگى «نۇر وتان» سەزىنىڭ اياقتالۋىمەن, سول سەزدە ءبىراۋىزدان الداعى سايلاۋعا كانديدات رەتىندە ۇسىنىلۋىمەن قۇتتىقتادىق. 2011 جىلى دا وسى لينگۆيستيكالىق كوميسسيانى باسقارعان ەدىم. ەمتيحاننان كەيىن پرەزيدەنت نۇرسۇلتان ابىش ۇلىمەن بىرقاتار ماسەلەلەر بويىنشا اڭگىمەلەسىپ, اقىلداستىق», – دەي كەلە م.جولداسبەكوۆ الداعى ۋاقىتتا پرەزيدەنتتىككە كانديداتتاردان مەديتسينالىق انىقتاما تالاپ ەتۋ تۋرالى ۇسىنىسىن ايتتى. «ماسەلەن, قاراپ وتىرساق, پرەزيدەنتتىككە كانديداتتار مەديتسينالىق انىقتاما تاپسىرمايدى. بىراق بۇل كەزىندە بولعان ەرەجە ەكەن. كەيىن, ءبىراز حالىقارالىق باقىلاۋشىلار «ادام قۇقىعىن بۇزۋ» دەگەن سوڭ, بۇل باپ الىنىپ قالعان. بىراق, مەنىڭ ويىمشا, پرەزيدەنتىككە كانديداتتار مەديتسينالىق انىقتاما تاپسىرۋى كەرەك. سەبەبى, قازىر مەكتەپكە بارساڭىز دا, قىزمەتكە ورنالاسساڭىز دا مەديتسينالىق كىتاپشا مىندەتتى تۇردە تالاپ ەتىلەدى. ەل باسقاراتىن ادام ءۇشىن اللادان الدىمەن سۇرايتىنىمىز وسى دەنساۋلىق. سوندىقتان, پرەزيدەنتىككە كانديدات ادام مەديتسينالىق انىقتاما تاپسىرۋى كەرەك دەگەن ۇسىنىس ايتتىم», – دەيدى م.جولداسبەكوۆ. سونىمەن قاتار, اڭگىمەلەسۋ بارىسىندا پرەزيدەنتتىككە كانديداتتاردىڭ ءبىلىمى دە ءسوز بولعان. «ەكىنشى ءبىر ماسەلە, كونستيتۋتسيامىزدا پرەزيدەنتىككە كانديدات ازاماتتىڭ ءبىلىمى تۋرالى ايتىلماعان. باياعى زامان ەمەس, ءبىلىم سالاسى دامىعان مەملەكەتپىز. سوندىقتان, مۇمكىن بولسا, كەلەسى ۋاقىتتاردا قازاقستان رەسپۋبليكاسى پرەزيدەنتتىگىنە كانديدات ادامنىڭ ءبىلىمى مىندەتتى تۇردە جوعارى بولۋ كەرەك دەگەن تالاپ بولسا», – دەدى م.جولداسبەكوۆ. «وتكەن سايلاۋدا دا بايقادىم, وزدەرىڭىز دە كورىپ وتىرسىزدار, سايلاۋعا ىلعي ءوزىن-ءوزى ۇسىنعاندار كەلەدى. قارسىلىق جوق, ارينە, بۇل ولاردىڭ كونستيتۋتسيالىق قۇقىعى. بىراق كوپتەگەن ىرگەلى ەلدەردە سايلاۋعا پارتيا ۇسىنىسىمەن قاتىسادى. بىزدە دە سونداي بولسا دەگەن پىكىر ايتتىم. تاعى ءبىر ايتقىم كەلگەنى, نۇرسۇلتان نازارباەۆ قازاق حالقىنىڭ الدىندا تالاي سىننان وتكەن. لينگۆيستيكالىق كوميسسيا الدىنا وسىمەن ءتورتىنشى رەت كەلىپ وتىر ەكەن. جالپى, كانديدات بولاتىن ادام وسى ەمتيحاندى ەكى رەت, ارى كەتسە, ءۇش رەت تاپسىرسا دەگەن ۇسىنىس ايتتىم. ءتىلدى ەركىن مەڭگەرگەن ازامات قايتا-قايتا تاپسىرا بەرە مە دەگەن ويىمدى جەتكىزدىم. سىزدەر جاقسى بىلەسىزدەر, نۇرسۇلتان ءابىش ۇلىنىڭ قابىلەتىنە, مەملەكەتتىك ءتىلدى ەركىن مەڭگەرگەندىگىنە ەشقانداي كۇمان جوق», – دەدى م.جولداسبەكوۆ. دينارا بىتىكوۆا, «ەگەمەن قازاقستان».
