دوپ: ءدۇبىر مەن دۇرمەك

الەم چەمپيوناتى-2010: وقيعالار مەن ويلار تاريحتا تۇڭعىش رەت “قارا قۇرلىقتا” وتكەن دۇنيەجۇزىلىك دوپ دوداسىنىڭ اياقتالعانىنا ەكى جۇمادان ارتىق ۋاقىت ءوتتى. الايدا, چەمپيوناتتىڭ ءدۇبىرى تىنعانىمەن, دۇرمەگى ءالى تارقاي قويعان جوق. كوزدەن كوشسە دە, كوڭىلدەن كەتە قويماعان فۋتبول سپەكتاكلدەرى توڭىرەگىندەگى ويلار مەن وقيعالار, دەرەكتەر مەن دايەكتەر الدا تالاي اڭگىمەگە تامىزىق بولاتىن ءتۇرى بار. ءبىز سولاردىڭ اراسىنان جادىمىزدا قالعانداردى ءسوز ەتىپ كورمەكپىز. “سەگىزاياق-نوسترادامۋس” ءسىرا, ادامزات ءوزىنىڭ تاريحىندا تاپ داڭقى وسىنشالىقتى جەر جارىپ, اسپان اسىرعان سەگىزاياقتى بۇرىن-سوڭدى كورمەگەن شىعار. گەرمانيا­داعى وبەرحاۋزەن قالاسىنىڭ Sea ءLىf اتتى وكەاناريۋمىندا تىرشىلىك ەتەتىن پاۋل نىسپىلى بۇل سۋ جاندىگىنىڭ ەرەكشە كورىپكەلدىك قاسيەتتەرى تۋرالى ءبىزدىڭ باقتيار گازەت بەتىندە بۇعان دەيىن كوسىلتىپ جازدى. اتالمىش ماق ۇلىقتىڭ بيولوگيالىق جاسى 3 جىلدان اسا قويمايتىنىن, سوندىقتان برازيليادا وتەتىن كەلەسى بىرىنشىلىكتە ونىڭ قىزمەتىنە جۇگىنە المايتى­نى­مىزدى دا ارىپتەسىمىز وكىنىشپەن ەسكە العان ەكەن. دەگەنمەن, اتاقتى درا­ما­تۋرگ ف.شيللەردىڭ كەيىپكەرى اۋزىنان شىققانداي, “ماۆر ءوز تىرلىگىن ىستەدى, ماۆر ەندى كەتە الادى”. ەندەشە, بۇل دوپ دوداسىندا بول­جاعاندارى ءتۇپ-تۇگەل اينا-قاتەسىز تۋرا كەلىپ, تاريحتا وسى چەمپيوناتتىڭ ويىندارىنان بەتەر قالعالى تۇرعان پاۋل جول­داستىڭ وسى ابىرويمەن كوپتىڭ نازارىنان كەتكەنى دە ءجون شىعار. ءبىر تاڭ قالاتىنىمىز, نەمىس اعاي­ىندار بۇل سەگىزاياقتىڭ نوسترا­دامۋس سىندى عاجايىپ ساۋەگەي بو­لا­تىنىن قالاي ءدوپ باسىپ تاپقان؟ بۇل – ءبىر. ەكىنشىدەن, سانالى جان يە­سىنىڭ ءوزىنىڭ شاماسى كەلمەيتىن شىم-شىتىرىق جۇمباقتاردى اتالمىش ماق ۇلىق قالاي وپ-وڭاي شەشىپ بە­­­رەدى؟ وسى قىزمەتكە جەگىلگەلى ەۋروپا چەمپيوناتىنىڭ فينالى جونىنەن عانا ءبىر مارتە قاتەلەسىپ كەتكەن وس­مينوگتىڭ مىنا كورسەتكىشى شىنىندا كەرەمەت! جالپى, مۇنداي ۇلكەن سەريالاردا بولجامنىڭ 50 پايىزداي بولىگى تۋرا كەلۋىنىڭ ءوزى بارىنشا جوعارى ساتتىلىك بولىپ سانالادى ەكەن. وسىنىڭ ءبارى قيسىنىمىزعا قياس كەلگەسىن, بۇل شىركىننىڭ قانداي جانۋار ەكەنىن زەرتتەپ كورىپ, ونىڭ ءۇش جۇرەگى بولاتىنىنا, باس ميىنىڭ جوعارى دامىعاندىعىنا كوز جەتكىز­دىك. ال ماماندار پاۋل ويلاۋ قابى­لەتى بولماعاندىقتان, تاڭداۋدى ءوزى تۇيسىنبەيتىن الگوريتم بويىنشا جا­ساي­تىنىن ايتىپ وتىر. ءبازبىر قال­جىڭ­باستار قاي جالاۋدىڭ ءتۇسى تار­تىم­دى كورىنسە, بولماسا قاي تۋدىڭ تۇبىندەگى جەم قوراپ جاقىن بولسا, ونىڭ سوعان ءجۇزىپ باراتىنىن ايتىپ كورگەن. الايدا, ميديا جەيتىن سەگىزاياقتىڭ جۇرت ابىگەرىندە ءتىپتى شارۋاسى جوق, ءوزىن جاقسىلاپ تاماقتاندىرسا بولدى. ءبىر وكىنىشتىسى, مانسابى اياقتالىپ كەلە جاتقان ءپاۋلدىڭ اتىن ەستىمەيمىز. بالكىم, ونىڭ ورنىن باساتىن تاعى ءبىر وسىنداي سەگىزاياق تابىلىپ قالار؟.. “الەمنىڭ سىبىزعىسى” افريكانىڭ ارعى بەلدەۋىندەگى ەلدە وتكەن چەمپيوناتتا جۇرتتىڭ كوزىنە بىردەن تۇسكەنى ماتچ باستالعان بويدا ونداعى ستاديونداردى داڭعازا ەتكەن ۆۋۆۋزەلا اتتى سىبىزعى بولدى. باسىندا تاڭسىق كورىنگەن بۇل قۋراي بارا-بارا ميلليونداعان كورەرمەننىڭ ناعىز باس اۋرۋىنا اينالدى. افري­كالىقتاردىڭ نەگىزىنەن جانۋارلاردى ۇركىتۋگە ارنالعان مىڭداعان ۇرلەمە قۇرالىنان قۇرالعان وركەستردىڭ دامىلسىز شى­عاتىن داۋسى قالقا­سىن­دا ستاديونداعى جانكۇيەرلەردىڭ ويىندار احۋالىنا وراي كوڭىل-كۇي تولقىنىن بىلدىرەتىن شۋىلى مۇلدەم ەستىلمەي قالدى. وسى­عان قاتتى قاپا بولعان تەلەترانسلياتسيا جۇرگىزۋشى كومپانيالار ونى “باسۋ­دىڭ” ءتۇرلى ارەكەتتەرىن جاساعانىمەن ەشتەڭە شىعارا المادى. ەندىگى ءبىر شەنەۋ­نىك­تەر ستاديونعا ۆۋۆۋزەلا اكەل­دىرمەۋگە كۇش سالىپتى. سول كۇندەرى, ماسەلەن, جاڭا زەلانديادا وسى “زي­يان­كەس” سىبىزعىنى سپورت الاڭ­دارىنا بولدىرماۋعا قاتاڭ تىيىم سالاتىن زاڭ قابىلدانعان. الايدا, فيفا باسشىلىعى بۇل ماسەلەدە بارىنشا سابىرلىلىق ءبىلدىرىپ, ۆۋۆۋزەلانى افريكالىقتار مادەنيەتىنىڭ ءبىر بولشەگى دەپ تانىدى. سوندىقتان قارا كونتينەنت تۇرعىندارى وسىلايشا جانكۇيەرلىك جاساۋعا ەرىكتى بولدى. ولاي بولماعان كۇندە, ول اعىلشىندارعا ستاديوندا ءان سالۋعا رۇقسات ەتپەگەنمەن بىردەي بولىپ شىعار ەدى. نە دەگەندە دە, بۇل قۇرال چەمپيونات كەزىندە بىرتە-بىرتە جۇرت جەك كورەتىن زاتتان نازار اۋدارۋعا تۇراتىن بۇيىمعا اينالا باستادى. ماسەلەن, ورىستاردىڭ مات­رەشكاسى سياقتى. سوندىقتان الەم­نىڭ ءار تۇكپىرىنەن جينالعان جانكۇيەر­لەردىڭ كوپشىلىگى مۋن­دي­الدان قايتارلارىندا ەسكەرتكىش زات رەتىندە باس­قاعا ەمەس, تاپ وسى ۆۋ­ۆۋ­زەلاعا جار­ماستى. ايت­قان­­داي, ساراپ­شىلار ستا­ديون­داردا سول سىبىزعىنى اڭى­راتىپ­ تار­تىپ وتىرعان­داردىڭ نە­گى­زىنەن جەرگى­لىك­تىلەر ەمەس, سىرتتان كەل­گەن­دەردىڭ بولعانىن دا ايتادى. “افريكا كولوريتى” وسى جولى الەم چەم­پيوناتى وڭتۇستىك افريكا رەسپۋبليكاسىندا وتەتىنى بەلگىلى بولعاننان بۇل تاڭداۋ جان-جاقتان سىن­عا ۇشىرادى. پروگرەس­شىل ادامزات بالاسى وسىن­داي ۇلكەن جارىستىڭ جەر بەتىندەگى قىلمىسكەرلەرى كوپ ەلدەردىڭ بىرىندە وتكەلى تۇرعانىنان قاتتى شوشى­دى. بىراق ناتيجەدە ءبارى جۇرتتىڭ بوياۋىن قالىڭ ەتىپ سالىپ بەرگەن سۋرەتىندەي بولماي شىقتى. دەگەنمەن, دوپ دوداسى ءوتىپ جاتقان كۇندەردە ءارتۇرلى ۇساق-تۇيەك قىل­مىستار دا ورىن الدى. مۇنى جۇرت “افريكالىق كولوريت”, ياعني وسى “قارا كونتينەنتتىڭ وزىنە ءتان بوياۋ-بولمىسى” دەپ تانىدى. جەرگىلىكتى جۇرت وسىنشاما شەت­ەل­دىك مەيمانداردىڭ قاپتاپ كەلە قال­عانىنا بىردەن بوي ۇيرەتە الماسا كە­رەك, اسىرەسە, بىرىنشىلىك ەندى باستالعان كەزدە ينتسيدەنت كوبىرەك كەزدەستى. بۇ­لار بۇزاقىلار توبىنىڭ جۋرناليس­تەر­دى سوققىعا جىعۋلارىمەن, فۋتبول­شىلار تۇرىپ جاتقان نومىرلەردى ۇپتەپ كەتكەنىمەن ورنەكتەلدى. جالپى, مۇندا مايدا ۇرلىقپەن اينالىسۋشى ۇرىلاردىڭ تورىنا ءتۇسىپ قالماعان قوناقتار از ەدى. ادەتتەگىدەي قولدان جاسالعان جالعان بيلەتتەردى ساتۋشى­لار دا كەزدەستى. ال تۇتاستاي العاندا, وراسان اۋقىمداعى قىلمىستار بولا قويعان جوق. سونىڭ ىشىندەگى ەڭ ءىرىسى ۇرىلاردىڭ فيفا شتاب-پاتەرىنە ۇيالماي باسىپ كىرىپ, الەم كۋبو­گى­نىڭ جەتى كوشىرمەسىن ۇرلاپ اكەتكەنى بولدى. وار-داعى مۋنديال وسى وقيعاسىمەن دە ەرەكشە ەستە قالادى. تورەشىلەر “تورەلىگى” اقىر سوڭىندا بۇل چەمپيونات وعان قىزمەت جاساعان اربيتر قاۋى­مىنىڭ وتە كوپ قاتەلىك جىبەرۋىمەن ءبىر­دەن ساناعا سىزات تۇسىرەدى. ءبىر وكى­نىش­تىسى, وسى قاتەلىكتەردىڭ كوپشىلىگى ويىن تاعدىرىن وزگەرتىپ جىبەرەتىندەي دەڭگەيدە بولدى. بۇيرەكتەن سيراق شىعارۋدان تانباعان سول رەفەري­لەر­دىڭ قاسىندا وزبەك تورەشىسى راۆشان يرما­توۆتىڭ ءبىرشاما ءادىل دە ادال قازىلىعى بىردەن مەنمۇندالاپ كوزگە ۇرىپ تۇردى. سوندىقتان ماماندار ونى وسى چەم­پيو­ناتتىڭ جاعىمدى جا­ڭالىقتا­­رىنىڭ ءبىرى رەتىندە قابىلدادى. راسىندا بۇل بىرىنشىلىكتە “قارا كيىمدىلەر” كەمشىلىگىنەن كوز تۇندى. سولاردىڭ ىشىندە لەمپاردتىڭ تازا گولىن ساناماي قويۋدىڭ ءوزى سۇمدىق قوي! ەكى مەتر وفسايدقا شىعىپ كەت­كەن تەۆەس پەن ۆيليانىڭ تاپ وسىلاي ويىننان تىس جاعدايدا سوققان گول­دارىن ەسەپكە الۋ شە؟! سول سياقتى فا­بياننىڭ انىق قولمەن ويناعانىن كور­مەي قويا سالۋدى قايتەمىز؟ ال چەم­پيوناتتىڭ باس جاعىندا ارگەن­تينا ويىنشىسى حاينتسەنىڭ نيگەريا قاقپاسىنا تۇسىرگەن كۇماندى گولىن ساناۋ ارقىلى ولارعا جەڭىس تىزگىنىن ۇستاتا سالۋدى قالاي ۇمىتامىز؟ تىزە بەرسە, مۇنداي دەرەكتەر جە­تەرلىك. سونىڭ ىشىندە گۆاتەمالا, ساۋد ارابياسى جانە مالي سەكىلدى ەل­دەردەن كەلگەن تورەشىلەردىڭ الاڭ ۇستىندەگى ەشبىر قيسىنعا سىيمايتىن شەشىمدەرى ولاردى فۋتبول اتتى ونەر­دىڭ ەرەجەسىمەن ەندى عانا تانىسىپ جۇرگەندەي ەتىپ كورسەتتى. بۇلاردىڭ الدىڭعىسى ءتىپتى يسپانيا مەن پا­راگ­ۆاي كەزدەسۋىندە “پەنالتي ەكسپو­زي­تسياسىن” جاساپ, سوعىلىپ تۇرعان گول­دى بولدىرماي تاستاۋدىڭ دا اما­لىن وڭاي ويلاپ تاپسا, ەكىنشىسى چيلي – شۆەيتساريا ماتچىندا ءجون­دى-ءجونسىز, وڭدى-سولدى ىسقىرا بەرۋمەن ەلدى ەستەن تاندىردى. ءۇشىنشىسى ءوز ەركىنىڭ قالاۋىمەن اقش قۇراما­سى­نىڭ سلو­ۆەن­دەر قاقپاسىنا سوققان تازا گولىن ساناماي تاستادى. وسىنىڭ ءبا­رىن كو­رىپ وتىرعان فيفا ءبىر قورى­تىندى شى­عارۋعا ۋادە بەرۋىن بەردى. بىراق با­تىل قادامدارعا بارۋعا ءالى اسىعار ەمەس. ءبىرىنشى رەت ءيا, بۇل چەمپيوناتتا ستاتيستي­كالىق تۇرعىدان قاراعاندا, ءبىرىنشى رەت ورىن العان دەرەكتەر دە از بولعان جوق. ايتالىق, سلوۆەنيا مەن گرەكيا وزدەرىنىڭ الەم چەمپيوناتتارىنداعى ءبىرىنشى جەڭىستەرىنە وسىندا قول جەتكىزدى. مۇندا سلوۆەندەر ءبىرىنشى ماتچىندا الجير قۇراماسىنان باسىم تۇسسە (1:0), گرەكتەر نيگەريالىقتاردى تىزە بۇكتىردى (2:1). ال جاپون قۇراما كومانداسى ءوز ەلىنەن تىس جەردە وتكەن بىرىنشىلىكتە ءبىرىنشى رەت جەڭىسكە جەتتى. بۇل جولى كامەرۋن كومانداسى توپتاعى ءبىرىنشى ماتچتا “سامۋ­راي­لاردىڭ” قۇربانىنا اينالدى (0:1). جالپى, جاپوندار جەڭىستىڭ العاشقى ءدامىن 2002 جىلى جاپونيا مەن كورەيادا وتكەن جاھاندىق جارىستا تاتىپ ۇلگەرگەن ەدى. وسى جولى جاڭا زەلانديا قۇ­­را­ماسى الەم بىرىنشىلىكتەرى ويىن­دا­رىنداعى العاشقى ۇپايىن قانجىع­ا­سىنا بايلاپ قايتتى. بۇل سلوۆاكيا كومانداسىمەن بولعان تەڭ (1:1) وي­ىن­­نىڭ ناتيجەسىندە مۇمكىن بولدى. الايدا, جاڭازەلانديالىقتار مۇ­نىمەن شەكتەلىپ قالعان جوق, بۇدان كەيىن توپتاعى ەكى ويىنىن دا بەيبىت ءبىتىرىپ, تاعى ەكى ۇپايعا اياق ارتتى. سول سياقتى ديميتريوس سالپين­گيديستىڭ نيگەريا قاقپاسىنا سوققان دوبى گرەكتەردىڭ 404 مينۋتقا سو­زىلعان گولعا دەگەن “قۇرعاقشىلىعى” تامىرىنا بالتا شاپتى. دانيا كو­مانداسىنىڭ قورعاۋشىسى داني اگگەر دە ءوزىنىڭ ءبىرىنشى گولىن تورعا ءتۇسىردى. بىراق ول “مينۋستىق” بەلگىگە يە, سەبەبى, بۇل دوپ ونىڭ ارقاسىنا ءتيىپ بارىپ, تۋ سىرتىندا تۇرعان ءوز قاقپاسىنا قويىپ كەتتى. وسى وقيعا دانيالىقتاردىڭ چەمپيوناتتارداعى ءبىرىنشى اۆتوگولى بولىپ سانالادى. بۇل ەلدىڭ قۇراماسى بىرىنشىلىكتە ءوزى ءۇشىن انتيرەكورد بولاتىن تاعى ءبىر دەرەكتى تىركەدى. مۋنديالدا ءبىرىنشى رەت ءوز قاقپاسىنا بىردەن ءۇش گول جىبەرىپ الدى. كوت-د يۆۋار قۇراماسىنىڭ شا­بۋىلشىسى ديدە دروگبا برازيليا كومانداسىنىڭ قاقپاسىنا گول سالعان ءبىرىنشى افريكالىق ويىنشى اتاندى. راس, ونىڭ بۇل دوبى كومانداسىن جەڭىلىستەن قۇتقارا المادى. ال امەريكالىق جارتىلاي قورعاۋشى مايكل برەدلي الەم چەمپيوناتىندا جاتتىقتىرۋشى اكەسىنىڭ قول استىندا ويناپ, قارسىلاستار قاقپاسىن نى­ساناعا ءدال العان ءبىرىنشى فۋتبولشى بولدى. باپكەر بوب برەدليدىڭ ۇلى سلوۆەنيامەن كەزدەسۋدە (2:2) ەسەپتى تەڭەستىردى. سول سياقتى سەرب قاق­پا­شىسى ۆلاديمير ستويكوۆيچ الەم چەمپيوناتىنىڭ فينالدىق بولىگىندە پەنالتي قايتارعان ءوز ەلىنىڭ ءبىرىنشى گولكيپەرى بولدى. ول بۇل ەرلىگىن گەر­مانيامەن ويىندا لۋكاس پو­دول­سكيدىڭ سوققىسى كەزىندە جاسادى. ال داۆيد ۆيليا الەم چەمپيوناتىندا ون ءبىر مەترلىك سوققىدان گول سالا ال­ماعان ءبىرىنشى يسپان بولدى. ول گون­دۋراسپەن كەزدەسۋدە ءمۇلت كەتتى. سو­نى­مەن ءبىر مەزگىلدە يسپان يكەر كا­سيل­ياس ەكى الەم بىرىنشىلىگىندە پە­نالتي قايتارعان ءبىرىنشى داربازابون اتاندى. ول ءوزىنىڭ مۇنداي ءبىرىنشى سەيۆىن بۇدان سەگىز جىل بۇرىن ير­لاند­تارعا قارسى ويىندا ورىنداعان ەدى. بۇل چەمپيوناتتا ول پاراگۆاي فور­ۆاردى وسكار كاردوسانى قاپىدا قالدىردى. مەكسيكالىق كاۋتەموك بلانكو ءوز ەلىنىڭ ءۇش چەمپيوناتتا گول سوققان ءبىرىنشى فۋتبولشىسى بولىپ وتىر. بۇعان ول وسى جولى فرانتسيا قاق­پاسىنا گول سوعۋ ارقىلى قول جەتكىزدى. سول سياقتى كامەرۋندىق ريگوبەر سونگ كەرەمەت كورسەتكىش – الەمنىڭ ءتورت چەمپيوناتىنا قاتىسقان ءبىرىنشى افريكالىق فۋتبولشى اتاعىن الۋى­مەن تاريحتا قالماقشى. ال شۆەي­تساريا جانە نيگەريا قۇرامالارىنىڭ جارتىلاي قورعاۋشىلارى ۆاللون بەحرامي مەن ساني كايتا ءوز ەلدە­رىنىڭ الەم چەمپيوناتىندا الاڭنان قۋىلعان العاشقى ويىنشىلارى بولۋىمەن ەرەكشەلەنىپ وتىر. بۇلار­دىڭ الدىڭعىسى چيليمەن ويىندا, كەلەسىسى گرەكيامەن كەزدەسۋدە “قىزىل قاعاز” الىپ قالدى. پاراگۆاي قۇراماسى ءوزىنىڭ تاري­حىندا العاش رەت 1/4 فينالعا دەيىن جەت­تى. مۇندا ول ءبىر دوپ ايىرى­مى­مەن بولاشاق چەمپيون – يسپانيا قۇراماسىنا جول بەرىپ الدى. تۋرنير­دە ءبىرىنشى رەت بىردە-ءبىر رەت جەڭىسكە جەتپەي, ءبىرىنشى مارتە توپتا سوڭعى ورىندا قالىپ قويعان يتاليا وزدەرى ءۇشىن انتيرەكورد جاسادى. سول سەكىلدى وار قۇراماسى پلەي-وففقا دەيىن جەتە الماعان چەمپيوناتتى وتكىزۋشى ءبىرىنشى ەل بولدى. ال چيلي قۇراما­سىنىڭ شۆەيتساريا مەن گوندۋراستى بىردەي جەڭۋى “قىزىلداردىڭ” ءوڭتۇس­تىك امەريكادان تىس جەردە قول جەت­كىز­گەن ءبىرىنشى ۇلكەن جەتىستىگى ەدى. ال­جير قۇراماسى ءوزىنىڭ تاريحىندا العاش رەت چەمپيوناتتا ءوز قاقپاسىن “قۇرعاق” ساقتاپ قالدى. ول اعىل­شىن­دارمەن ويىندى 0:0 ەسەبىمەن تەڭ اياق­تادى. پاراگۆاي ءبىرىنشى رەت ءوز تو­بىن­دا ءبىرىنشى بولسا, گوللانديا ءۇش وي­ىننىڭ ۇشەۋىندە دە جەڭىسكە جەتتى. ءبى­رىنشى رەت شيرەك فينالدان ەۋرو­پا­نىڭ ەڭ از مولشەردەگى كومانداسى (3) شىقتى. ەسەسىنە, وسى ۇشتىكتىڭ كەيىنگى جۇلدىزى وڭىنان تۋىپ, ەكەۋى فينالعا دەيىن باردى, ءۇشىنشىسى ءۇشىن­شى ورىندى جەڭىپ الدى. سو­نىمەن قاتار يسپانيا قۇراماسى ءوزىنىڭ توپتاعى ءبىرىنشى ويىنىندا ۇتىلىپ, سوڭىنان الەم چەمپيونى دارەجەسىنە دەيىن جەتكەن ءبىرىنشى فۋتبول جاساعى اتاندى. چەمپيونات تسيفرلار تىلىندە وار-دا وتكەن الەم چەمپيو­نا­تى­نا 18499 ەرىكتى كومەككە كەلدى. ولار­دىڭ ەڭ جاسى ۇلكەنى 80-دە بولدى. يسپان جارتىلاي قورعاۋشىسى حاۆي ءوزىنىڭ جاقىن قارسىلاستارىنىڭ الدىنا ءتۇسىپ كەتىپ, ارىپتەستەرىنە 669 پاس بەردى. نەمىس باستيان شۆاين­شتاي­گەردىكى بۇدان 104-كە كەم. كاتا­لون­دىق فۋتبولشى سونداي-اق الاڭ جيەگىنەن دوپ لاقتىرۋدا دا الدا تۇر. بارلىعى 42 رەت وسىلاي دوپ بەرگەن ول سونداي 50 دوپ تاستاعان ارگەن­تي­نا­لىق ديەگو فورلاننان عانا قالىپ قويدى. بىرىنشىلىك بارىسىندا 261 مارتە ءتارتىپ بۇزۋشىلىق ورىن الدى. بۇل وسىنىڭ الدىنداعى چەمپيوناتتا­عى­دان ەداۋىر از. وندا 346 فول تىركەلگەن ەكەن. سول سياقتى “قىزىل قاعازدىڭ” دا سانى ازايىپتى. بۇرىن ول 26 رەت كور­سەتىلسە, بۇل جولى 17-مەن شەكتەلگەن. وڭتۇستىك افريكا رەسپۋبليكا­سى­نىڭ الاڭدارىندا 145 گول سوعىلدى. بۇل 32 كوماندادان قاتىستىرىلا باس­تاعان چەمپيوناتتار ىشىندەگى كور­سەت­كىشى ەڭ تومەنى بولىپ وتىر. دەگەن­مەن, وسى سالادا تومەندەۋ ءۇردىسى ۇدايى بايقالىپ كەلەدى. ماسەلەن, 1998 جىلى فرانتسيادا – 171, 2002 جىلى كورەيا مەن جاپونيادا – 161, ال 2006 جىلى گەرمانيادا 147 گول سوعىلىپتى. 39 جىل جانە 330 كۇن. چەمپيو­ناتتاعى ەڭ كارى فۋتبولشىنىڭ جاسى وسىنداي. ول – اعىلشىن قاقپاشىسى دەۆيد دجەيمس. الاڭداعى ويىن­شى­لار ىشىندەگى ەڭ جاسى ۇلكەنى مەكسي­كا­لىق فورۆارد كۋاتەموك بلانكو ەكەن. ونىڭ جاسى بىرىنشىلىك باستال­عاندا 37 جىل جانە 156 كۇنگە تولعان. ال ەڭ جاس فۋتبولشى سول ساتتە تۋعانىنا 18 جىل, 120 كۇن بولعان دات جارتىلاي قورعاۋ­شىسى كريستيان ەريكسەن كورىنەدى. يسپانيانىڭ وڭ قاپتالداعى قور­عاۋشىسى سەرحيو راموس 31 رەت جەكە دارا قارسىلاستار قورعانىس شەبىن جارىپ ءوتىپ, وسى كورسەتكىش بويىنشا ەڭ ءونىمدى فۋتبولشى اتاندى. ودان كەي­­ىنگى ورىندارعا پودولسكي (27), ينەستا (26), مەسسي, ۆيليا (25) جايعاستى. كەيپتاۋنداعى “گرين پويت” ستا­ديونىندا 22 گول سوعىلدى. بۇل وسى ارە­نانىڭ ەڭ ناتيجەلى بولعانىن كور­سەتەدى. ەكىنشى ورىندا “20 گولى بار” يوحاننەسبۋرگتەگى “ستوك سيتي” تۇر. چەمپيوناتتاعى ويىنداردا گەر­ما­نيا قۇراماسى تىزىمدەگى 23 ويىن­شى­سىنىڭ 22-ءسىن الاڭعا شىعاردى. بۇل – تۋرنيردەگى ەڭ ۇلكەن روتاتسيا. بۇ­عان قاراما-قارسى كورسەتكىش – وي­ىن­شىلاردى بارىنشا شاقتاپ پاي­دا­لان­عان قۇرامالار قاتارىنا 15 فۋت­بولشىسى الاڭعا شىققان سلو­ۆە­نيا, جاڭا زەلانديا جانە كحدر جاتادى. جاپون جارتىلاي قورعاۋشىسى كەيسۋكە حوندا 19 رەت فول جاساپ, چەمپيوناتتاعى “ەڭ دورەكى ويىنشى” اتاندى. بۇدان بار-جوعى ەكى رەت كەم ءتارتىپ بۇزعان سەرحيو راموس پەن مارك ۆان بوممەل ەكىنشى-ءۇشىنشى ورىندا تۇر. الەم چەمپيوناتىندا ءار كەزەڭدە 8 قۇراما جەڭىسكە جەتتى. يسپانيا وسىنىڭ سەگىزىنشى كومانداسى اتاندى. سەرىك ءپىرنازار. استانا.