جالىن جىگەر, جاس تۇلەك
الماتى قالاسىندا «نۇر وتان» دەموكراتيالىق پارتياسى XVI سەزىنىڭ ەلىمىزدە ءساۋىر ايىندا وتەتىن كەزەكتەن تىس پرەزيدەنت سايلاۋىنا قاتىستى قابىلداعان شەشىمىنە قولداۋ كورسەتۋ شاراسى رەتىندە جاستار فلەش-موب ۇيىمداستىردى.
«دوستىق ۇيىنە» جينالعان بەلسەندى جاستار قاتارىندا «جاراسىم» رەسپۋبليكالىق جاستار ۇيىمىنىڭ, جاستار ساياساتىن دامىتۋ ورتالىعىنىڭ, قالاداعى ءتۇرلى ەتنومادەني بىرلەستىكتەردىڭ مۇشەلەرى جانە جوعارى وقۋ ورىندارىنىڭ ستۋدەنتتەرى بولدى. قازاقستاندى مەكەن ەتكەن ءتۇرلى ۇلت وكىلدەرىنىڭ ۇلتتىق كيىمدەرىن كيىپ, ەلىمىزدەگى بىرلىك پەن بەرەكەنىڭ سيمۆولى رەتىندە قازاقى شاڭىراقتى اۋەلەتە كوتەرگەن جاستار بۇگىنگى قوعامنىڭ تاڭداۋىن, قازىرگى قازاقستاندىق جاس ۇرپاقتىڭ نيەت-تىلەگىن جاڭاشا مانەردە بەينەلەپ, «نۇر وتان» پارتياسىنىڭ ۇستانعان ساياسي باعدارى مەن العان باعىتىنا قولداۋ ءبىلدىردى.
– بيىلعى جىلدى ەلىمىزدە قازاق حاندىعىنىڭ قۇرىلعانىنا 550 جىل, قازاقستان حالقى اسسامبلەياسىنىڭ جىلى جانە ۇلى جەڭىستى اتاپ ءوتۋ سەكىلدى ەلدىكتى, تۇراقتىلىق پەن تىنىشتىقتى ناسيحاتتايتىن ايتۋلى مەرەكەلەرمەن اتاپ وتكەلى وتىرمىز. بۇگىنگى جاس ۇرپاق ءوز كەلەشەگىن دامىعان ءارى مادەنيەتى مەن ىنتىماعى جاراسقان قازاقستانمەن تىعىز بايلانىستىرادى. ءبىز باستاۋىش پارتيانىڭ بۇگىنگى جاساعان شەشىمىنە شىن نيەتىمىزبەن قولداۋ كورسەتەمىز, – دەيدى «جاراسىم» رەسپۋبليكالىق جاستار ۇيىمىنىڭ وكىلى زۋلفيا تايىپوۆا.
ەل اعالارىنىڭ قابىلداعان شەشىمىن قولداۋعا جيىلعان جاستار بۇگىندە ەلىمىزدە ءبىلىم مەن عىلىمعا, جاستار ساياساتىنا, جاس كاسىپكەرلەردى كەڭىنەن قولداۋعا جاسالىپ وتىرعان جاعدايدىڭ كەمەلدىگىنە كوڭىلدەرى تولاتىندىقتارىن, قازاقستان جاستارىنا جارقىن ءومىر ءسۇرۋ ءۇشىن مۇمكىندىكتىڭ مول ەكەندىگىن ءسوز ەتىستى.
قانات ەسكەندىر,
«ەگەمەن قازاقستان».
الماتى.
سۋرەتتى تۇسىرگەن
يۋري بەككەر.
شاتتىق شاراسى
كەزەكتەن تىس پرەزيدەنتتىك سايلاۋعا «نۇر وتان» پارتياسىنىڭ مەملەكەت باسشىسى, پارتيا جەتەكشىسى نۇرسۇلتان نازارباەۆتىڭ كانديداتۋراسىن ۇسىنۋى بارشا قازاقستاندىق زامانداستارىنداي قاراعاندىلىق جاستار اراسىندا دا زور قوعامدىق ورلەۋ تۋعىزدى. بۇل شەشىمدى ريزالىق سەزىممەن قارسى الۋ وبلىس ورتالىعىنداعى «جاستار» سپورت سارايىندا وتكەن فلەش-موبتا ايرىقشا تانىلدى. جاستار ۇيىمدارىنىڭ وكىلدەرى, ءوندىرىس جانە وقۋ ورىندارىنىڭ جۇمىسشىلارى مەن شاكىرتتەرى «ءبىز ن.ءا.نازارباەۆتى قولدايمىز», «ەلىمىزدىڭ بولاشاعىن بىرگە جاسايمىز», «العا, قازاقستان!» دەپ ءبارى جۇرەگىنەن شىققان ورتاق ۇنگە قوسىلىپ, كوكىرەكتەرىن كەرنەگەن اق تىلەكتەرىن جەتكىزدى.
– حالىق قالاۋىنا وراي وسى تاڭداۋدى كۇتكەن ەدىك. ءوزىمىز سياقتى ەرتەڭىنە ءۇمىتى ۇلكەن جاس مەملەكەتىمىزدىڭ قادامىن نىعايتىپ, ايقىن باعىتتا العا باستاۋشى نۇرسۇلتان ءابىش ۇلى نازارباەۆقا سەنىمىمىز ءاردايىم بەرىك. اكتسياعا وسىنداي ازاماتتىق ۇستانىمىمدى بىلدىرۋگە كەلدىم. بارلىعىمىزدىڭ دا ەلباسى سايلاۋعا قاتىسسا ەكەن دەگەن وي-ماقساتىمىزدىڭ كوڭىلدەن شىققانىنا قۋانىپ تۇرمىن, – دەدى قاراعاندى مەملەكەتتىك مەديتسينالىق ۋنيۆەرسيتەتىنىڭ وقۋ وزاتى ازامي راسۋلوۆا.
ونىمەن بىرگە, فلەش-موبتى ۇيىمداستىرۋعا بەلسەنە قاتىسۋشى قالالىق جاستار «مەملەكەتتىك قىزمەت مەكتەبى» جەتەكشىسى راديك قادىلبەكوۆ «قازاقستانىمىزدىڭ ودان ءارى وركەندەۋى مەن دامۋىن تۇڭعىش پرەزيدەنتىمىز ن.ءا. نازارباەۆ قانا اتقارا الاتىنىنا كوزىمىز جەتىپ كەلەدى. «حالىق قاتەسىز سىنشى» دەگەندەي سايلاۋدا تاڭداۋ دۇرىس بولۋىنا سەنەمىز. ءبىزدىڭ باستى ماقساتىمىز – ۇلگىلى ەڭبەك ەتۋ ارقىلى ەل يگىلىگىن ارتتىرۋ. وتانىمىزدىڭ جارقىن بولاشاعىن ەلباسىمەن بىرگە جاساۋعا دايىنبىز. بۇل شارادا سونى تانىتتىق, – دەپ قۇربى-قۇرداستارى وي-بايلامدارىن ءبىلدىردى.
فلەش-موبقا قاتىسۋشىلار جاستار مۇراتى بىرلىگىنەن كورىنىستەر قويىپ, ونەر كورسەتتى.
ايقىن نەسىپباي,
«ەگەمەن قازاقستان».
قاراعاندى.
«ءبىز ورىندى شەشىمدى قولدايمىز!»
قوستاناي قالاسىنداعى «دوستىق ءۇيى» الدىنا جينالعان جاستار قولىنا ءتۇرلى-ءتۇستى گۇلدەر, القىزىل لەنتالار ۇستاپ, فلەش-موب وتكىزدى. جاستىق بايشەشەكتەي سۇلۋ ەدى. كوكتەم مەن قىستىڭ ايقاسىنداي وتكىر جەل دە, قاردىڭ كەتپەگەن ايازى دا جاستاردىڭ ءتۇرلى ۇلتتار اۋەنى ىرعاعىمەن بيلەۋىنە كەدەرگى بولا المادى. وسىلاي قوستاناي جاستارى ورتالىق الاڭعا شىعىپ, «نۇر وتان» پارتياسى ءحVى سەزىنىڭ شەشىمدەرىنە قولداۋ ءبىلدىردى. «العا, قازاقستان!», «گۇلدەنە بەر, قازاقستان!», «ءبىز «نۇر وتان» پارتياسى سەزىنىڭ شەشىمدەرىن قولدايمىز!» دەگەن داۋىستار جارقىن شىعادى. فلەش-موبتى وبلىستاعى «ەل ەرتەڭى» قوعامدىق بىرلەستىگى ۇيىمداستىردى.
– قازاقستان ءۇشىن باستى بايلىق بار. ول – قازاق حالقىمەن بىرگە كەڭ دالامىزدى جايلاپ, ءبىر اتانىڭ بالالارىنداي ءبىر قۇدىقتان سۋ ءىشىپ, ءبىر اۋانى جۇتىپ وتىرعان ءتۇرلى ۇلىس وكىلدەرىنىڭ جۇدىرىقتاي جۇمىلعان دوستىعى, بىرلىگى! «نۇر وتان» – ەلىمىزدىڭ بىرلىگىن ارتتىرۋدا, ەكونوميكانىڭ العا باسۋىنا كوپ ىقپال ەتىپ وتىرعان جەتەكشى پارتيا. ونىڭ ءحVى سەزى ەلىمىزدىڭ جارقىن بولاشاعى ءۇشىن ماڭىزدى شەشىم جاسادى. ءبىز ونى قولدايتىنىمىزدى قوستانايلىقتارعا وسىلاي بىلدىرگىمىز كەلدى, – دەيدى جاستاردىڭ «ەل ەرتەڭى» قوعامدىق بىرلەستىگىنىڭ جەتەكشىسى بولات قاليەۆ.
فلەش-موبتى قىزىقتاۋعا كوپتەگەن قوستانايلىقتار جينالدى.
– جاستاردىڭ بۇل قولداۋى وتە ورىندى. ەلدەگى ماڭىزدى وزگەرىستەرگە, ساياسي قادامدارعا جاستار قولداۋ ءبىلدىرۋى, قاتىسۋى كەرەك! بۇگىنگى ءىستىڭ بارلىعى دا بولاشاق ءۇشىن جاسالىپ جاتىر. جاستار لاپىلداپ جانباسا, جاستىقتىڭ وتى بولماسا, قازاقستاندى الەمگە كىم تانىتپاق؟! – دەدى بەلگىلى مادەنيەت قىزمەتكەرى شاميل فاحرۋتدينوۆ.
اينالانى كوڭىلدى انمەن بىرگە جاستاردىڭ جارقىن داۋسى كەرنەپ تۇردى. بۇلتسىز, كوك زەڭگىر تۇنىق اسپان جاستار فلەش-موب وتكىزگەن الاڭعا توڭكەرىلىپ تۇرعانداي. قازاقستاننىڭ قىلاۋسىز بەيبىت اسپانى!
ءنازيرا جارىمبەتوۆا,
«ەگەمەن قازاقستان».
قوستاناي.
اق تىلەك
«نۇر وتان» پارتياسىنىڭ ءحVى سەزى جۇمىسىن اياقتاسىمەن 1000-نان استام جاستار كوكشەتاۋداعى دوستىق ءۇيىنىڭ الاڭىندا سەزد دەلەگاتتارىنىڭ قازاقستان رەسپۋبليكاسى پرەزيدەنتتىگىنە ۇمىتكەرى رەتىندە پارتيا جەتەكشىسى نۇرسۇلتان ءابىش ۇلى نازارباەۆتىڭ كانديداتۋراسىن ۇسىنۋ تۋرالى شەشىمىن قولداپ, فلەش-موب وتكىزدى.
بۇل ساياسي شاراعا قازاقستان حالقى اسسامبلەياسىنىڭ اقمولا وبلىستىق جاستار قاناتى, جاستار ۇيىمدارىنىڭ وكىلدەرى, جوو ستۋدەنتتەرى, كوللەدجدەر مەن كاسىبي مەكتەپتەردىڭ وقۋشىلارى قاتىستى.
جاس ۇرپاق بەلسەندىلەرى ءوز ەلىنىڭ بارلىق جەتىستىكتەرىن ءىس بارىسىنداعى پرەزيدەنت, ەلباسى نۇرسۇلتان نازارباەۆپەن بايلانىستىراتىندىقتارىن مالىمدەدى. ەلباسىنىڭ حالىق الدىنداعى جەكە جاۋاپكەرشىلىگىنىڭ ارقاسىندا قازاقستان بۇگىندە الەم قاۋىمداستىعى مويىنداعان بەيبىت ءارى تۇراقتى مەملەكەتكە اينالدى.
مەملەكەت باسشىسى ءوزىنىڭ پرەزيدەنت بولىپ تاعايىندالعان العاشقى كۇنىنەن باستاپ جاستاردى قولداۋ مەملەكەتتىك ساياساتتىڭ باسىم باعىتتارىنىڭ ءبىرى ەكەندىگىن ايقىنداپ, ونى ناقتى ىستەرمەن جۇزەگە اسىرىپ كەلەدى. ەلباسىنىڭ سارابدال ساياساتىنىڭ ارقاسىندا قازاقستاندا جاستار ساياساتى بويىنشا زاڭنامالىق قۇجاتتاردىڭ تۇجىرىمدامالىق بازاسى قالىپتاسىپ, قر «مەملەكەتتىك جاستار ساياساتى تۋرالى» زاڭى, «قازاقستان-2020: بولاشاققا جول» مەملەكەتتىك جاستار ساياساتىنىڭ 2020 جىلعا دەيىنگى تۇجىرىمداماسى قابىلداندى. «جاستار ءىس-تاجىريبەسى», «جاسىل ەل», «بيزنەستىڭ جول كارتاسى-2020», «ديپلوممەن – اۋىلعا!», «بولاشاق», «سەرپىن», «قولجەتىمدى باسپانا» باعدارلامالارى مەن جوبالارى شۋاقتى جەمىسىن توگۋدە.
ميتينگتە ءسوز العان وبلىستىق جاستار رەسۋرستىق ورتالىعىنىڭ ديرەكتورى تيمۋر ىسقاقوۆ, تاتار مادەني ورتالىعى جاستار قاناتىنىڭ بەلسەندىسى راميل دۋسۋموۆ, شىعارماشىلىق جاستار وكىلدەرى ولجاس سابيجانوۆ, ساۋلە كارىمجانوۆا, التىنبەك بەكتەمىر جانە باسقالارى اقمولا جاستارى وزدەرىنىڭ بولاشاققا دەگەن ۇمىتتەرىن ەلباسىنىڭ اتىمەن عانا بايلانىستىراتىنىن ايتتى.
دوستىق ءۇيىنىڭ الاڭى ميتينگكە قاتىسۋشىلاردىڭ «تەك نۇرسۇلتان ءابىش ۇلى نازارباەۆتىڭ سارابدال ساياساتىنىڭ ارقاسىندا عانا قازاقستان ساتتىلىكتەرگە قول جەتكىزىپ, الەمنىڭ دامىعان 30 ەلىنىڭ قاتارىنا قوسىلادى», دەگەن جالىندى سوزدەرىمەن جاڭعىرىپ تۇردى.
باقبەرگەن امالبەك,
«ەگەمەن قازاقستان».
اقمولا وبلىسى.
سۋرەتتى تۇسىرگەن
تولەگەن قوسشىعۇلوۆ.
ماڭعىستاۋلىق ورەندەر ونەگەسى
«نۇر وتان» پارتياسىنىڭ XVI سەزىندە مەملەكەت باسشىسى ن.نازارباەۆتىڭ ءساۋىر ايىنداعى كەزەكتەن تىس پرەزيدەنت سايلاۋىنا قاتىسۋعا كەلىسىمىن بەرۋى ماڭعىستاۋلىق جاستار تاراپىنان قولداۋ تاپتى. وسىعان وراي, ماڭعىستاۋ وبلىسىنىڭ جاستار ساياساتى باسقارماسىنىڭ باستاماسىمەن ەكى مىڭعا جۋىق ادام قاتىسقان ارنايى فلەش-موب ۇيىمداستىرىلدى.
تەڭىز جاعاسىنداعى الاڭدا وتكەن اكتسياعا قاتىسۋشىلار ءتۇرلى وقۋ ورىندارىنىڭ ستۋدەنتتەرى مەن ەڭبەك مايدانىنا ارالاسقان جاس ماماندار, سونداي-اق, جاسوتاندىقتار جانە جاستار قوزعالىسىنىڭ بەلسەندىلەرى. قولدارىنا «ماڭعىستاۋ قولدايدى» دەگەن جازۋلاردى كوتەرگەن جاستار پاتريوتتىق اندەردى شىرقادى. اقتاۋداعى اكتسياعا ارنايى كەلگەن جاڭاوزەندىك جاس رەپەرلەر پرەزيدەنتكە جاستاردىڭ اتىنان رەپ وقىسا, جاس سپورتشىلار كوشە سپورتىنىڭ تۇرلەرى بويىنشا شەبەرلىك سىنىپتارىن وتكىزىپ, سكەيتبورد, ۆوركاۋت جانە تاعى باسقا سپورت تۇرلەرىنەن ونەرلەرىن كورسەتتى. جاستار جيىلىپ, ەلباسىنا قولداۋ بىلدىرگەن جيىن بارىسىندا «جاس وتان» جاستار قاناتىنىڭ وكىلدەرى ۇگىت-ناسيحات جۇمىستارىمەن اينالىساتىن ەرىكتىلەردى تىركەيتىن ءموبيلدى پۋنكت اشسا, گراففيتيستتەر قازاقستاندىقتارعا ارنالعان قۇتتىقتاۋ اشىق حاتىن سالدى.
ەلباسىن قولداۋعا دايىن ەكەندىكتەرىن كورسەتكەن جاستاردىڭ اتىنان ءسوز العان ماڭعىستاۋ وبلىسىنداعى «جاس وتان» جاستار قاناتىنىڭ وكىلى مۇقاش ورالباەۆ «ءبىز نۇرسۇلتان ءابىش ۇلىنىڭ 26 ساۋىردە بولاتىن سايلاۋعا قاتىساتىنىنا وتە قۋانىشتىمىز. ماڭعىستاۋ جاستارى ەلباسىمىزعا قولداۋ كورسەتۋ ءۇشىن بار كۇشىمىزدى جۇمىلدىرامىز» دەسە, «ءىرى كاسىپورىندارداعى جاس ماماندار كەڭەسى تىكەلەي ەلباسى باستاماسىمەن قۇرىلدى. سوندىقتان جاستار پرەزيدەنتكە ريزا. بۇگىنگى اكتسياعا ءساۋىر ايىندا وتەتىن پرەزيدەنت سايلاۋىنا كانديداتۋراسىن ۇسىنعان نۇرسۇلتان ءابىش ۇلىن ۇجىمىمىزدىڭ اتىنان قولداۋ ءۇشىن كەلدىك, دەيدى «ماڭعىستاۋمۇنايگاز» اق جاس ماماندار كەڭەسىنىڭ وكىلى عاني ابدىسالىقوۆ.
گۇلايىم شىنتەمىرقىزى,
«ەگەمەن قازاقستان».
ماڭعىستاۋ وبلىسى.
سۋرەتتى تۇسىرگەن
سەرىك مايەمەروۆ.
سىر تۇلەكتەرى ەلباسىمەن بىرگە
قىزىلوردا وبلىسىنىڭ بەلسەندى جاستار ۇيىمدارىنىڭ باستاۋىمەن ورتالىق الاڭدا فلەش-موب ءوتتى. شارانىڭ نەگىزگى ماقساتى – جاستارعا سايلاۋدىڭ ماڭىزدىلىعىن جەتكىزىپ, پرەزيدەنت سايلاۋىنا «نۇر وتان» پارتياسى اتىنان نۇرسۇلتان نازارباەۆتىڭ كانديداتۋراسىنىڭ ۇسىنىلۋىن قولداۋ بولاتىن. سونىمەن قاتار, جاڭا قازاقستاندىق ءپاتريوتيزمدى, ۇلتتىق رۋحتى قالىپتاستىرۋ, ەگەمەندى ەلىمىزدىڭ قول جەتكىزگەن جەتىستىكتەرىن دارىپتەۋ, وسكەلەڭ ۇرپاقتى وتانىن, ەلىن, جەرىن سۇيۋگە ۇگىتتەۋدى دە كوزدەگەن.
فلەش-موبقا بەلسەندى جاستار ۇيىمدارىنىڭ جەتەكشىلەرى, ەرىكتى جاستار, جاستار كوميتەتتەرى مەن جاستار پارلامەنتىنىڭ دەپۋتاتتارى بارلىعى 500-دەي ادام قاتىستى. جاستار الدىندا ءسوز العان «جاس وتان» جاستار قاناتى قىزىلوردا قالالىق فيليالىنىڭ اتقارۋشى حاتشىسى الىشەر كارداشوۆ پرەزيدەنت سايلاۋىندا اركىمنىڭ ازاماتتىق پوزيتسياسىن تانىتۋ ەل تاريحى ءۇشىن ماڭىزدى ەكەنىن جانە ۇلكەن جاۋاپكەرشىلىك جۇكتەيتىنىن ەرەكشە اتاپ ءوتتى.
وسى كۇنى قىزىلوردالىق جاستاردىڭ تاعى ءبىر بولىگى «Small» ساۋدا ورتالىعىندا «مەنىڭ ەلىم – ماڭگىلىك ەل!» اتتى فلەش-موب وتكىزدى.
بۇل دا كەلەشەك ۇرپاقتىڭ تۋعان جەرگە دەگەن سۇيىسپەنشىلىگىن ارتتىرا وتىرىپ, تاۋەلسىز قازاقستاندى ماقتانىشپەن جىرلاپ, «قازاقستان-2050» جالپىۇلتتىق قوزعالىسىن ناسيحاتتاۋدى كوزدەگەن شارا بولدى.
فلەش-موبقا قاتىسۋشىلار «l love Kazakhstan», «ماڭگىلىك ەل», «I love KZ» سەكىلدى كورنەكى قۇرالدار مەن جالاۋشالار ۇستاپ, تۋعان ەلىنىڭ تۇعىرلى, تاۋەلسىزدىكتىڭ عۇمىرلى بولۋىنا اتسالىساتىندارىن ءبىلدىردى.
ەرجان بايتىلەس,
«ەگەمەن قازاقستان».
قىزىلوردا.
ءور التايدان ەستىلگەن ءور داۋىس
شىعىس ءوڭىرىنىڭ جاستارى «نۇر وتان» پارتياسىنىڭ XVI سەزىندە قابىلدانعان شەشىمگە ءبىراۋىزدان قولداۋ كورسەتتى. اباي ەسكەرتكىشىنىڭ الدىندا وتكەن «ءبىر تولقىندا» اكتسياسىنا وبلىستىق قازاقستان حالقى اسسامبلەياسىنىڭ «ىنتىماق-سودرۋجەستۆو» جاستار قاناتى, دوستىق ءۇيى مەن ەتنومادەني بىرلەستىكتەردىڭ بەلسەندى جاستارى ۇيىتقى بولدى. كەزەكتەن تىس پرەزيدەنتتىك سايلاۋعا ن.نازارباەۆتىڭ كانديداتۋراسىن ۇسىنۋ تۋرالى سەزد شەشىمىن قۋاتتاعان جيىنعا وسكەمەن قالاسىنىڭ ستۋدەنت جانە جۇمىسشى جاستارىنان قۇرالعان 5 مىڭعا جۋىق ادام قاتىستى.
اكتسيا بارىسىندا اعايىندى ابدۋلليندەر اتىنداعى كوللەدجدىڭ ستۋدەنتى الپىس جاقيانوۆ:
– بۇيىرىپ بارلىعىڭا ادال ءناسىپ,
كەتپەسىن بازبىرەۋلەر اراڭدى اشىپ,
«نۇرلى جول» بارشامىزعا نۇرىن توگىپ,
جاساسىن قازاقستان, العا قادام باسىپ! – دەپ ءوزى جازعان جىر جولدارىن شابىتتانا وقىسا, ازەربايجان ەتنومادەني بىرلەستىگىنىڭ وكىلى جامالاددين اسكەر ەلباسىنىڭ ۇلتارالىق كەلىسىم ساياساتىنىڭ ارقاسىندا وڭىردەگى بارشا ۇلت پەن ۇلىس وكىلدەرىنىڭ ءبىر شاڭىراق استىندا تاتۋ-ءتاتتى تۇرىپ جاتقانىن ەرەكشە اتاپ ءوتىپ, سەزد شەشىمىن قولدايتىندىعىن جەتكىزدى.
– مەن تاۋەلسىز قازاق ەلىندە تۋىپ-ءوستىم. ءوز وتانىمدى, قازاق ءتىلى مەن مادەنيەتىن جانىمداي جاقسى كورەمىن. «نۇر وتان» پارتياسىنىڭ شەشىمى – دوستىق پەن تاتۋلىقتىڭ شەشىمى, – دەدى ءوز كەزەگىندە س.امانجولوۆ اتىنداعى شقمۋ فيلولوگيا فاكۋلتەتىنىڭ ستۋدەنتى يۋليا ميرونوۆا.
سونداي-اق, اكتسياعا قاتىسۋشىلارعا ۇلتتىق ويۋ-ورنەكپەن ادىپتەلگەن لەنتا تاراتىلدى. وبلىستىق ىشكى ساياسات باسقارماسى جاستار ءبولىمىنىڭ جەتەكشىسى جاسۇلان سارسەباەۆتىڭ ايتۋىنشا, كوگىلدىر تاسپا – ەلىمىزدىڭ تاۋەلسىزدىگى مەن قازاقستاندىقتاردىڭ توننىڭ ىشكى باۋىنداي بىرلىگىنىڭ نىشانى ىسپەتتى.
ال وسكەمەندەگى «ازيا اۆتو» اۆتوزاۋىتىنىڭ جاستارى سەزد شەشىمىن قولداۋ ماقساتىندا اۆتوشەرۋ ۇيىمداستىردى. وتاندىق سۋ جاڭا اۆتوكولىكتەرگە مىنگەن ولار كوك بايراقتى جەلبىرەتىپ, قالانىڭ تۇرعىندار ەڭ كوپ جۇرەتىن ورىندارىنا ايالداپ, ۇلتتىق ناقىشتاعى لەنتالاردى ۇلەستىردى.
اكتسيا شەڭبەرىندە شىعىسقازاقستاندىق جاستار پاتريوتتىق اندەر شىرقاپ, بي بيلەپ, فلەش-موب وتكىزدى. سونداي-اق, «ءبىر تولقىندا» اكتسياسى اياسىندا سەمەي, ريددەر جانە زىريان قالالارىندا اۆتوشەرۋ ءوتتى.
دۋمان اناش,
«ەگەمەن قازاقستان».
شىعىس قازاقستان وبلىسى.
سۋرەتتى تۇسىرگەن
ەسىمحان ورىنباەۆ.
