استانا. 11 ناۋرىز. بۇگىن تۇندە چەمپيوندار ليگاسىنىڭ 1/8 فينالىندا تاعى ءتورت كوماندا جاسىل الاڭعا شىعادى. ياعني, ەكى ويىن وتەدى. سولاردىڭ ءبىرى لوندوننىڭ «چەلسيى» مەن ءپاريجدىڭ پسج-سى اراسىنداعى تارتىس. بۇل تۋرالى egemen.kz حابارلادى.
لوندوندا وتەتىن ويىندا نەگىزگى فاۆوريت بەلگىسىز. سەبەبى, پاريجدەگى كەزدەسۋدە قارسىلاستار 1:1 ەسەبىمەن تەڭ تارقاسقان ەدى. ەندى فۋتبولشىلار ماسەلەنىڭ بارلىعىن اعىلشىن جەرىندە شەشپەك.
وسى رەتتە قوس كوماندانىڭ چەمپيوندار ليگاسىنداعى كەيبىر قىزىقتى دەرەكتەرىنە نازار اۋدارايىق.
- «چەلسي» تۋرنير اياسىندا ءوز الاڭىندا فرانتسيا كوماندالارىمەن وتكىزگەن سوڭعى التى ويىننىڭ بەسەۋىندە گول جىبەرمەگەن. ال گول ەنگىزىپ العان سول جالعىز كەزدەسۋ 2003-2004 جىلعى ماۋسىمدا تىركەلگەن ەكەن. سول كەزدە «چەلسي» لوندوندا «موناكومەن» 2:2 ەسەبىمەن تەڭ وينادى. ەكى ويىننىڭ قورىتىندىسى بويىنشا «موناكو» 5:3 ەسەبىمەن جەڭىسكە جەتكەن بولاتىن. ءتىپتى سول ماۋسىمدا فرانتسيالىق كوماندانىڭ فينالعا دەيىن جەتكەنىن بىلەمىز.
- ەگەر بۇگىنگى ويىن ناتيجەسى بويىنشا جارىستى «چەلسي» جالعاستىراتىن بولسا, لوندوندىقتاردىڭ سوڭعى بەس ماۋسىمداعى ءتورتىنشى شيرەك فينالى بولماق. ال سوڭعى 9 جىلدى الاتىن بولساق, «چەلسيدىڭ» اتالعان اينالىمداعى جەتىنشى جورىعى رەتىندە حاتقا تۇسەدى.
- بيىلعى ماۋسىمدا اعىلشىندار ءوز توبىنان ءبىرىنشى ورىنمەن شىققانى بەلگىلى. «چەلسيدىڭ» ءدال وسىنداي كورسەتكىشى سوڭعى 12 ماۋسىمدا 9 رەت تىركەلدى. ال وسى ۋاقىت ارالىعىندا ءبىر مارتە توپتان شىعا الماي قالعان. ول 2012-2013 جىلعى ماۋسىم. سول جىلعى سايىسقا «چەلسي» جەڭىمپاز رەتىندە قاتىسقان بولاتىن. ياعني, 2011-2012 جىلعى ماۋسىمدا لوندوندىق كوماندا تاريحىندا العاش جانە ازىرگە سوڭعى رەت چەمپيوندار ليگاسىنىڭ كۋبوگىن يەمدەندى.
- پسج چەمپيوندار ليگاسىنداعى سىرت الاڭدا وتكىزگەن سوڭعى 15 ويىننىڭ جەتەۋىندە جەڭىسكە جەتسە, ءتورت رەت جەڭىلۋگە ءماجبۇر بولعان.
- ەگەر كەلەسى كەزەڭگە پاريجدىكتەر وتەتىن بولسا, بۇل پسج ءۇشىن قاتارىنان ءۇشىنشى شيرەك فينال بولادى. وتكەن ماۋسىمدا ولار ءدال وسى اينالىمدا لەۆەركۋزەننىڭ «بايەرىن» ەكى ويىن ناتيجەسى بويىنشا 6:1 ەسەبىمەن تىزە بۇكتىردى. ءتىپتى سول تارتىستا 4 گولدى سىرت الاڭدا سوققانىن ايتا كەتەيىك.
كوماندالار مىنا قۇرامدا الاڭعا شىعۋى مۇمكىن.
