«قورداي» كەدەن بەكەتىندە قىرعىز ازاماتشاسى گەروينمەن قولعا ءتۇستى

تاراز. 11 ناۋرىز. بيىلعى جىلعى 10 ناۋرىزدا «قورداي» كەدەن بەكەتىنىڭ جولاۋشىلار تەرمينالىندا گەروين الىپ وتپەكشى بولعان قىرعىز ازاماتشاسى ۇستالدى. بۇل تۋرالى جامبىل وبلىسى بويىنشا مەملەكەتتىك كىرىستەر دەپارتامەنتى «قورداي» كەدەنى باسشىسىنىڭ ورىنباسارى بەكەن نۇراحمەتوۆ حابارلادى. وسى كۇنى كەشكى ساعات 8-دەر شاماسىندا كەدەن بەكەتىنىڭ جەتەكشى مامانى مارات يماقوۆ قىرعىز ازاماتشاسىنىڭ كارتون قوراپقا ورالعان قول جۇگىنىڭ ىشىنەن بىرنەشە كۇدىكتى قارا زاتتى بايقاپ قالادى. قول جۇگىنىڭ ءىشى توسەك جابدىقتارىمەن سىعىمدالىپ, تىعىز بايلانىپ تاستالعان ەكەن. وپەراتيۆتى تۇردە قول جۇگىن اشىپ تەكسەرۋ كەزىندە قوراپتىڭ ىشىنەن قارا ءتۇستى, سكوتچپەن قاپتالعان جانە وزىندىك ءيسى بار 8 دانا وراما شىقتى. دەرەۋ جاسالعان حيميالىق ساراپتاما ناتيجەسى اتالمىش كۇدىكتى زاتتىڭ جالپى سالماعى 1897,01 گرامدى قۇرايتىن اسا ءىرى كولەمدەگى گەروين ەكەنىن انىقتادى. بۇل وقيعا بويىنشا قىلمىستىق كودەكستىڭ 286 بابىنىڭ 4 تارماعى بويىنشا قىلمىستىق ءىس قوزعالدى. ال ءوزىنىڭ قىزمەتتىك پارىزىن ادال اتقارىپ, ەرەكشە قىراعىلىق تانىتقان كەدەن قىزمەتكەرى مارات يماقوۆ بولسا كەدەن باسشىلىعى تاراپىنان ماراپاتقا ۇسىنىلدى. ورالحان ءداۋىت. دەرەك: جامبىل وبلىسى بويىنشا مەملەكەتتىك كىرىستەر دەپارتامەنتى «قورداي» كەدەنى. سۋرەت: province.ru.