بىرىككەن ۇلتتار ۇيىمىنىڭ حالىقارالىق سوتى 22 شىلدەدە كوسوۆونىڭ ءوزىنىڭ تاۋەلسىزدىگىن جاريالاۋى زاڭعا قايشى ەمەستىگىن مالىمدەدى. ال كوسوۆو ءوزىنىڭ تاۋەلسىزدىگىن 2008 جىلى 17 اقپاندا جاريالاعان. بۇگىنگە دەيىن كوسوۆونىڭ تاۋەلسىزدىگىن 69 ەل تانىدى. رەسەي جانە ونىڭ ىقپالىنداعى ءبىراز ەل تانىعىسى جوق.
ولار كوسوۆونى تانىسا, پريدنەستروۆە, ابحازيانى دا تانۋ كەرەك دەگەندى ايتادى. ال بۇلاردى سالىستىرۋعا كەلمەيدى. سەربيانىڭ كوسوۆوداعى تاعىلىق گەنوتسيدتىك ارەكەتىن ۇمىتۋعا بولمايدى. حالىقارالىق سوت شەشىمىنەن كەيىن كوسوۆونى تانيتىندار سانى كوبەيەتىنى ءسوزسىز.
اسكەرىن قىسقارتپاق
ۋكراينا باسشىلىعى ءوز اسكەرىن 15-20 پايىزعا قىسقارتۋ جونىندە شەشىمگە كەلىپتى. اسىرەسە, بۇل ەكونوميكالىق قيىنشىلىققا ۇشىراعان ەل ءۇشىن وتە ماڭىزدى. بۇل زاماندا بەيبىت ساياسات ۇستاعان ەلگە ەشكىم باسىپ كىرمەيدى. سوندىقتان كوپ اسكەر ۇستاۋدىڭ قاجەتى شامالى. بۇگىنگە دەيىن ۋكراينادا اسكەر سانى 200 مىڭ توڭىرەگىندە بولسا, ونى ءبىرشاما قىسقارتۋدان ايتارلىقتاي قارجى ۇنەمدەلمەك.
ىزدەگەنگە جاۋ كوپ
يران يسلام رەسپۋبليكاسىنىڭ پرەزيدەنتى م.احمادينەجاد يرانعا قارسى اقش ستسەناريىن قولداعان ەلدەردىڭ بارلىعىن وزدەرىنە جاۋ سانايتىنىن مالىمدەدى. بۇل جەردە “مەنىڭ جاۋىمنىڭ دوسى ماعان جاۋ” قاعيداسى قولدانىلىپ وتىرعانى بەلگىلى. بۇگىنگى ينتەگراتسيالىق زاماندا بۇل قاعيدا جاقسىلىققا اپارمايدى. اپارماعاندا, يران از دەگەندە الەمنىڭ جارتىسىن وزىنە جاۋ ەتۋى مۇمكىن. كوپ ەل اقش-تاي وركەنيەتتىڭ بيىگىنە كوتەرىلگەن ۇلى ەلمەن يرانعا بولا جاۋ بولا المايدى. اقش-تىڭ باستاماسىمەن جانە كوپ ەلدىڭ قولداۋىمەن ازىرلەنگەن بۇۇ-نىڭ يرانعا قارسى سانكتسياسىنان باس تارتپايدى.
بوپسادان سەسكەنبەدى
ءبىرازدان بەرى كورەيا تۇبەگى ايماعىندا ايتارلىقتاي شيەلەنىستى جاعداي قالىپتاسىپ وتىر. وڭتۇستىك جانە سولتۇستىك كورەيا مەملەكەتتەرى اڭدىسىپ ءومىر ءسۇرىپ جاتىر. “سەن ويتسەڭ, مەن بۇيتەم” دەگەن قورقىتۋلار ەكى جاقتان دا ءجيى ايتىلادى. ەڭ الدىمەن كحدر وڭتۇستىك كورەيا مەن اقش-تىڭ بىرىككەن اسكەري جاتتىعۋ وتكىزۋىنە قارسى ءبىراز قوقان-لوققى بىلدىرگەن. سوعان قاراماي, ولاردىڭ اسكەري-تەڭىز كۇشتەرى جاپون تەڭىزىندە بىرىككەن جاتتىعۋلارىن باستاپ كەتتى. جۇرت بۇعان جاۋاپ رەتىندە كحدر قانداي ارەكەتكە بارادى ەكەن دەپ مازاسىزدانىپ وتىر.
ايتماتوۆتى ايىپتاعان
Fergana.ru-دىڭ حابارلاۋىنا قاراعاندا, وزبەكستان ۇكىمەتى ەلدىڭ اقپارات قۇرالدارىنىڭ باسشىلارىنا ۇلى قىرعىز جازۋشىسى شىڭعىس ايتماتوۆتىڭ اتىن دا, شىعارمالارىن دا اتاماۋ جونىندە اۋىزشا نۇسقاۋ بەرگەن كورىنەدى. ولار مۇنى جاقىندا قىرعىزستاننىڭ وڭتۇستىك وڭىرىندە بولعان وقيعالارعا جاۋاپ دەپ ەسەپتەسە كەرەك. وندا وزبەك ۇلتىنىڭ وكىلدەرى قۋعىنعا ۇشىراعان بولاتىن. بىراق وعان “ادامزاتتىڭ ايتماتوۆى” اتانعان ۇلى جازۋشىنىڭ نە ايىبى بار؟
ۇلتشىلدارعا ورىن جوق
ۇلىبريتانيا كورولەۆاسىنىڭ جىلىنا ءبىر رەت ەلدىڭ بەلگىلى ادامدارىن داستارقانعا شاقىراتىن ءداستۇرى بار. بۇل ادەتتە استا-توك توي ەمەس, جاي قۇرمەت بەلگىسىندەي رەسمي شارا. بەرمينگەم سارايىنا 8 مىڭ ادامنىڭ ءبىرى رەتىندە اسىرەوڭشىل بريتانيا ۇلتتىق پارتياسىنىڭ كوسەمى نيك گريففەن دە شاقىرىلعان ەدى. ول دەرەۋ مالىمدەمە جاساپ, جەكە تۇلعا رەتىندە ەمەس, ۇلتشىلدار اتىنان باراتىنىن ايتقان سوڭ, كورولەۆا اكىمشىلىگى دەرەۋ شاقىرۋدى كەيىن قايتارىپ الىپتى. الدىندا ول ەۋروپارلامەنت دەپۋتاتى رەتىندە شاقىرىلعان ەكەن.
زاڭدى ديكتاتور
وڭتۇستىك امەريكانىڭ سولتۇستىك شىعىسىنداعى شاعىن عانا سۋرينام دەپ اتالاتىن مەملەكەتتە اركەز توڭكەرىس بولىپ جاتادى. ونىڭ ءبىرازىن ەلدىڭ قازىرگى پرەزيدەنتى دەزي بەۋتەرسە جۇزەگە اسىرعان. ول سەكسەنىنشى جانە توقسانىنشى جىلداردا ەكى رەت توڭكەرىس ارقاسىندا بيلىككە كەلىپ, شاعىن ەلدە ديكتاتورلىق ءتارتىپ ورنىقتى. ءبىر قىزىعى – وتكەن اپتا باسىندا ول “دەموكراتيالىق جولمەن” بيلىككە كەلدى: پارلامەنتتەگى 51 دەپۋتاتتىڭ 36-سى ونى جاقتاپ داۋىس بەردى. جۇرت بۇرىنعى ديكتاتور ەندى قانداي ءتارتىپتى قالار ەكەن دەپ ءجۇر.
ازىرلەگەن ماماديار جاقىپ.
