باتىس قازاقستان وبلىسىنىڭ اكىمى باقتىقوجا ىزمۇحامبەتوۆپەن جانە “كپو” ب.ۆ كومپانياسىنىڭ باس ديرەكتورى دجۋزەپپە پازيمەن كەزدەسىپ اڭگىمەلەستى. ولار ءىسساپار بارىسىندا قايتالانباس كەلبەتى مەن تاريحى, ومىرشەڭ ىستەرى مەن جوبالارى مول ءوڭىردىڭ كەلەشەگىنە دەن قويدى. مەملەكەتارالىق ارىپتەستىك پەن حالىقتار اراسىنداعى دوستىقتى نىعايتۋعا بەلسەنە ۇلەس قوسىپ جۇرگەن قوس ەلشى كەزدەسۋلەر كەزىندە قازاقستاننىڭ الەمدىك ساياسات ساحناسىنداعى ايشىقتى ورنىن ايرىقشا اتاپ كورسەتتى.
تەمىر قۇسايىن. ورال.
“جول كارتاسى” پارتيالار نازارىندا. سىر ايماعىنداعى ساياسي پارتيالارمەن بايلانىس جونىندەگى كونسۋلتاتيۆتىك كەڭەس قۇرىلعان بولاتىن. وبلىس اكىمىنىڭ ورىنباسارى مۇرات مۇحامەدوۆتىڭ توراعالىق ەتۋىمەن ساياسي پارتيالارمەن بايلانىس جونىندەگى قوعامدىق كەڭەستىڭ كەزەكتى وتىرىسى بولىپ ءوتتى. وندا ەلباسى جولداۋىنان تۋىنداعان بارلىق ساياسي پارتيالاردىڭ ەلدىڭ دامۋى مەن ۇلتتىق بىرلىكتىڭ ءتيىمدى جولدارىن بىرىكتىرۋگە باعىتتالعان كەڭەستىڭ ەرەجەسى بەكىتىلدى. كەڭەستە وبلىستىق جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باستىعىنىڭ مىندەتىن اتقارۋشى ب.ناقىپوۆ “جول كارتاسى” باعدارلاماسى بويىنشا ايماقتا اتقارىلىپ جاتقان جۇمىستار جايىن بايان ەتتى. اعىمداعى جىلى باعدارلامانى جۇزەگە اسىرۋعا 6063,8 ملن. تەڭگە قارجى قارالعان. “جول كارتاسى” باعدارلاماسىنا سايكەس پارتيا جەتەكشىلەرى ءوز ۇسىنىس-پىكىرلەرىن ورتاعا سالىپ, وي ءبولىستى.
ەركىن ءابىل. قىزىلوردا.
كەنشىلەر يماندىلىق ءۇيىن سالىپ بەردى. كومىرلى ەكىباستۇزدىڭ جەرى قازبا بايلىققا تولى اۋىلدارىمەن دە بەلگىلى. وتكەن اپتادا وسىنداي اۋىلداردىڭ ءبىرى التىن مەن كۇمىس وندىرەتىن كەن ورنى بار تورتقۇدىقتا مەشىت اشىلدى. وسى جەردەگى تاۋ-كەن بايىتۋ كومبيناتىنىڭ باسشىلىعى ەكى جىل بۇرىن قۇرىلىسىن باستاعان ەكەن. ءساتىن سالىپ, الداعى ورازا ايىنا وراي مەشىتتى سىيعا تارتتى. ءسويتىپ, تورتقۇدىقتىقتاردىڭ كوپتەن كۇتكەن وتىنىشتەرى ورىندالدى. مەشىتتىڭ اشىلۋ راسىمىنە وبلىس اكىمى باقىتجان ساعىنتاەۆ قاتىستى. ءوندىرىستى اۋىلدىڭ الەۋمەتتىك-رۋحاني تۇرمىس جاعدايلارىنىڭ جاقسارۋىنا ۇلەس قوسىپ كەلە جاتقان كەنشىلەرگە, كومبينات باسشىلىعىنا العىس ايتتى. كوك كۇمبەزدى اسەم مەشىت الىستان كوز تارتىپ, اۋىلعا ءسان بەرىپ تۇر. ەندى ۇلكەندەرمەن قاتار, اۋىلدىڭ جاستارى مەن بالالار دا يماندىلىق جولىن قادىر تۇتىپ, كەنشىلەر سىيلاعان جاڭا مەشىتتە باس قوساتىن بولادى.
فاريدا بىقاي. پاۆلودار.
جۇمىسسىزدار قاتارىن ازايتۋ ءۇشىن. قازىر وزدىگىنەن جۇمىس تابۋ قيىن ەكەنى جاسىرىن ەمەس. ماماندىقتارى بويىنشا ەڭبەككە قامتىلۋعا ۇمىتتەنۋشى قاراعاندىلىقتارعا تۇراقتى وتكىزىلىپ تۇراتىن “بوس جۇمىس ورىندارى مەن لاۋازىمداردىڭ قالالىق جارمەڭكەسى” وتە قولايلى شارا بولىپ كەلەدى. وعان وسى جولى كەلۋشىلەر ادەتتەگىدەي از بولمادى. كاسىپورىندار مەن مەكەمەلەر تاراپىنان جاريا ەتىلگەن 1119 بوس جۇمىس ورنىنا ورنالاسۋعا تالپىنۋشىلاردىڭ قۇجاتتارى قارالىپ, قالاعان ىستەرگە بەيىمدىلىكتەرى مەن بىلىمدەرى بايقالدى. جارمەڭكە بارىسىندا 120 ادام جۇمىسقا قابىلدانۋعا جولداما الدى. ال 300-دەن استامىنا سونداي مۇمكىندىككە كەڭەس بەرىلدى. جىل باسىنان بەرى قاراعاندى قالاسى بويىنشا 6880 ازاماتتان ەڭبەككە قامتىلۋعا ءوتىنىش تۇسسە, ولاردىڭ 5958-ءىنىڭ تىلەگى قاناعاتتاندىرىلدى.
ايقىن نەسىپباي. قاراعاندى.
جاس جۋرناليستەر فورۋمى ءوتتى. سەمەيدە “يستوك” اتالاتىن قوعامدىق بىرلەستىك بار. وسى بىرلەستىك “قامقورلىق” دەپ اتالعان ارنايى باعدارلاماسى اياسىندا مۇمكىندىگى شەكتەۋلى بالالارعا مەيلىنشە قامقورلىق تانىتىپ كەلەدى. بىرلەستىك ءتىپتى جەتكىنشەكتەردىڭ تۋعان كۇندەرىن وتكىزۋگە دەيىن اتسالىسۋدا. قازىردە بىرلەستىك مۇمكىندىگى شەكتەۋلى بالالاردىڭ جازعى دەمالىس لاگەرلەرىندە جاقسى دەمالۋىنا قولۇشىن بەرۋدە. سولاردىڭ بىرقاتارى “لەسنايا سكازكا” لاگەرىندە دەمالىپ قايتتى. اراسىندا يادرولىق سىناقتاردان زارداپ شەككەندەر دە بار. “قامقورلىق” باعدارلاماسىنىڭ اياسى ۋاقىت وتكەن سايىن كەڭەيە تۇسۋدە.
داۋلەت سەيسەن ۇلى. سەمەي.
اڭگىمە ارقاۋى – دوستىق. دوستىق ۇيىندە جەرگىلىكتى قولونەرشىلەردىڭ كورمەسى بولىپ ءوتتى. ونى قازاقستان حالقى وبلىستىق اسسامبلەياسى مەن “اسسامبلەيا” كورپوراتيۆتىك قورى ۇيىمداستىردى. ۇلتتىق قولونەر سالاسىندا تىنباي ەڭبەك ەتىپ جۇرگەن ۆەرا يماشباەۆانىڭ, ولەگ مارتىنيۋكتىڭ, ەلەنا ەليزاروۆانىڭ تۋىندىلارىن كوپشىلىك قىزىعا تاماشالادى. ال “فورۋم-سۇحبات” بارىسىندا “ەقىۇ كوپەتنوستى قوعامداعى بەيبىتشىلىك پەن كەلىسىمدى قامتاماسىز ەتەدى”, “ۇلتتىق كاسىپتى قولداۋ جانە دامىتۋ ەتنوسارالىق دوستىق پەن بەيبىتشىلىككە, تولەرانتتىلىققا تاربيەلەيدى”, “قازاقستان حالقى اسسامبلەياسى: الداعى مىندەتتەر” دەگەن تاقىرىپتاردا باياندامالار تىڭدالىپ, بىرلىگى جاراسقان ەلدىڭ ومىرىنەن جارقىن مىسالدار كەلتىرىلدى. قوعام تۇراقتىلىعى مەن ەتنوسارالىق جاراستىقتى ودان ءارى نىعايتۋ, ۇلتتىق ونەرگە دەگەن قۇرمەت پەن سۇيىسپەنشىلىكتى قالىپتاستىرۋ, جاڭا يننوۆاتسيالىق مۇمكىندىكتەردى پايدالانۋ ماسەلەلەرى دە اڭگىمە ارقاۋىنا اينالدى.
ءومىر ەسقالي. سولتۇستىك قازاقستان وبلىسى.
