پەتروپاۆل. 3 شىلدە. «قازتەحماش» ماشينا قۇرىلىسى زاۋىتى» جشس-دە شەتەلدىك وزىق تەحنولوگيالارعا نەگىزدەلگەن العاشقى استىق كومباينى شىعارىلىپ, مەملەكەت باسشىسى ن. نازارباەۆتىڭ قاتىسۋىمەن وتكەن ۇلتتىق تەلەكوپىردە تانىستىرىلۋ ءراسىمى جاسالدى. بۇل تۋرالى وبلىستىق اكىمدىكتىڭ ءباسپاسوز قىزمەتى حابارلادى.
كاسىپورىندا بۇعان دەيىن 2-3 تىركەمەلى, جەمازىق تاراتقىش,پرەسس جيناعىش, 2 روتورلى تىرناۋىش, ديسكىلى ءشوپ ماشيناسى تەحنيكالارى قۇراستىرىلىپ, وندىرىستىك سىناقتان ويداعىداي ءوتىپتى. فينليانديانىڭ «Sampo Rosenlew Ltd» فيرماسىنان كەلگەن باس تەحنولوگ ميككو لەفيايارۆي نەگىزگى قىزمەت اۋىل جانە كوممۋنالدىق شارۋاشىلىقتارى جانە جۇك تاسىمالداۋعا ارنالعان تەحنيكالار ءوندىرىسىن ۇيىمداستىرۋعا باعدارلانعانىن, 2018 جىلعا تامان 400 كومباين, 500 تراكتور, 1200 وزگە دە تەحنيكالار بىرلىگىنشىعارۋ مۇمكىندىگىنە يە بولاتىنىن جەتكىزدى. بۇل جوباعا سونداي-اق اۆستريا مەن پولشانىڭ فيرمالارى دا ينۆەستيتسيا قۇيىپ وتىر.
بۇگىندە قازاقستاندا استىق جينايتىن تەحنيكالاردىڭ 80 پايىزعا جۋىعى نورماداعى 8-10 جىل ورنىنا 13-15 جىل قولدانىستا جۇرگەنىن, سوڭعى 7 جىلدا بۇل سالاداعى يمپورتتىڭ ۇلەسى 340 ميلليون دوللارعا ارتقانىن ەسكەرسەك, زاماناۋي تەحنولوگيالارمەن جابدىقتالعان, قۇنى 1,9 ميلليارد تەڭگەنى قۇرايتىن سەرپىندى جوبانىڭ بولاشاعى كەمەل. وسىندا قۇراستىرىلعان تەحنيكالار ەلىمىزدىڭ قوستاناي, اقمولا, شىعىس قازاقستان, پاۆلودار, قوستاناي وبلىستارىمەن قاتار رەسەيگە, اۋعانستانعا, مونعولياعا, قىتايعا جونەلتىلەتىن بولادى.
ءومىر ەسقالي.
دەرەك, سۋرەت: سولتۇستىك قازاقستان وبلىسى اكىمدىگىنىڭ ءباسپاسوز قىزمەتى.
