عاجايىپ «تاس ورمانى» پاركى

وزبەكستاننىڭ ناۋاي وبلىسىنا قاراستى ۇشقۇدىق اۋدانىنىڭ جەرىندەگى جارقۇدىق شاتقالىندا كونە زاماننان كەلە جاتقان تاس ورمانى بار. ەل بيلىگى ەندى ونى چيلي مەن بولگاريا جەرىندەگىدەي عاجايىپ پارككە اينالدىرۋعا ارەكەت جاساپ جاتىر. اتالعان اۋماقتاعى ەجەلگى دۇنيەدەن بەرى كەلە جاتقان تاس تۇلعالى دىڭگەكتەر تىك تۇرعان تۇربالاردى ەسكە تۇسىرەدى. ولار ۋاقىتتىڭ اسەرى مەن تابيعي كاتاكليزمدەر ارقىلى مينەرالدانىپ قاتىپ قالعان اعاشتاردان قۇرالادى. ال ەسكەرتكىشتەردىڭ قۇرىلىمدارى ءار الۋان جانە كۇردەلى بولىپ كەلەدى. مامانداردىڭ پىكىرىنشە, بۇلاردىڭ قازىرگى زامانمەن ۋاقىت ايىرىمى 9 ميلليون جىلعا جۋىقتايدى. بۇگىندە ناۋاي وبلىسى اۋماعىنان وسىنداي ءۇش ءىرى باعاندار تابىلعان. ولاردىڭ ىشىندەگى مىڭبۇلاق كولونالارى ەڭ ءىرىسى بولىپ تابىلادى. بۇدان باسقا تاعى تامدى اۋدانىنداعى قاراقاتىن جانە مولالى باعان­دارى دا بار. «مەملەكەتتىك تابيعاتتى قورعاۋ باعدارلاماسىنا سايكەس, جارقۇدىقتاعى تاس ورماندارى تەرريتورياسىنان قورعالاتىن ايماق جاساپ, وعان اۋداندىق تاريحي-ولكەتانۋ مۋزەيىنىڭ فيليالى مارتەبەسىن بەرۋ ماسەلەسى قاراستىرىلدى. وتكەن جىلدىڭ سوڭىندا وزبەكستان رەسپۋبليكاسى ولي ءماجىلىسى جانىنداعى ۇكىمەتتىك جانە كوممەرتسيالىق ەمەس ۇيىمدار مەن باسقا دا ازاماتتىق قوعام ينستيتۋتتارىنا قولداۋ كورسەتۋ قوعامدىق قورىنان تاس ورمانىنا قورعاۋلى تابيعي تەرريتوريا مارتەبەسىن بەرۋ جانە وعان جەرگىلىكتى جاستاردىڭ نازارىن اۋدارۋ جونىندە الەۋمەتتىك تاپسىرىس الىندى», – دەپ اتاپ ءوتتى وبلىستىق تابيعات قورعاۋ باسقارماسىنىڭ مامانى زۋبايدا دۋشانوۆا. مۇرات ايتقوجا.