جيىرما ەكى جوبا ماقۇلداندى

قازاقستاننىڭ دامۋ بانكى وتاندىق اۆتوقۇراستىرۋ كاسىپورىندارىن قولداۋعا ۇلتتىق قور قاراجاتى ەسەبىنەن 20 ملرد. تەڭگە بولەدى. وسى سومانىڭ 15 ملرد. تەڭگەسى ەلىمىزدە قۇراستىرىلعان اۆتوموبيلدەردى ساتىپ الۋعا جەكە تۇلعالارعا نەسيە بەرۋ ءۇشىن التى كوممەرتسيالىق بانككە باعىتتالسا, ال قالعانى ارناۋلى ماقساتتاعى اۆتوكولىك پەن اۆتوتەحنيكانى ليزينگكە ساتىپ الاتىن زاڭدى تۇلعالار مەن جەكە كاسىپكەرلەردى قارجىلاندىرۋ ءۇشىن «قدب-ليزينگ» كومپانياسىنا جولدانادى. بۇل جونىندە پرەزيدەنت جانىنداعى ورتالىق كوممۋنيكاتسيالار قىزمەتىندە وتكەن ءباسپاسوز ءماسليحاتىندا قدب باسقارما توراعاسى بولات جامىشەۆ ءمالىم ەتتى. اتالعان باستامالاردىڭ «نۇرلى جول» باعدارلاماسىن ىسكە اسىرۋ اياسىندا قازاقستاندىق وندىرۋشىلەردى قولداۋ ءۇشىن جاسالىنىپ جاتقاندىعىن كولدەنەڭ تارتقان ب.جامىشەۆ ەلىمىزدىڭ ۇكىمەتى بەكىتكەن وتاندىق ءوندى­رىستەگى جەڭىل اۆتوكولىكتى ساتىپ الۋعا جەكە تۇلعالارعا نەسيە بەرۋ شارتى بويىنشا اتاۋ­لى سىياقى مولشەرلەمەسىنىڭ جىلدىق پايىزى 14%-دان اسپايتىنىن, سونىمەن قاتار, جىلدىق ءتيىمدى مولشەرلەمەسى 7,5%-دان ارتىق بولمايتىنىن جەتكىزدى. بۇل تۇرعىدا نەسيە بەرۋ مەرزىمى 5 جىلعا باعىتتالسا, باستاپقى جارنا ساتىپ الىناتىن اۆتوكولىك قۇنىنىڭ 20%-نان اسپايتىنىن ايتتى. وڭدەۋ ونەركاسىبىن ۇلتتىق قوردىڭ ءبىرىنشى جانە ەكىنشى ترانشى ەسەبىنەن ەكىنشى دەڭگەيدەگى بانكتەر ارقىلى ۇزاق مەرزىمدى قارجىلاندىرۋ اياسىندا جالپى سوماسى 17,7 ملرد. تەڭگەگە 22 جوبا ماقۇلداندى. جەڭىلدىكتى اۆتونەسيە بەرۋ باعدارلاماسىنىڭ شەڭبەرىندە دامۋ بانكى جەكە تۇلعالاردان نەسيە الۋعا تۇسكەن 1757 سۇرانىمدى 5,6 ملرد. تەڭگەگە ماقۇلدادى, دەدى ب.جامىشەۆ. سونداي-اق, ول ۇستىمىزدەگى جىل­دىڭ 14 مامىرىنداعى جاعداي بويىنشا ۇلتتىق قوردىڭ ءبىرىنشى ترانشى ەسەبىنەن قدب بۇرىنىراقتا بەكىتكەن كوممەرتسيالىق بانك­تەرمەن ءتيىستى نەسيە كەلىسىمدەرى ارقىلى وڭدەۋ ونەركاسىبىندە 28 ملرد. 491 ملن. تەڭگەگە 22 جوبانى ماقۇلداپ, 14 ملرد. 139 ملن. تەڭ­گەگە 16 جوبانى قارجىلاندىرۋ باس­تال­عاندىعىن ايتتى. ال ەكىنشى ترانش بويىنشا ەكىنشى دەڭگەيدەگى بانكتەر 16,1 ملرد. تەڭگەگە 15 جوبانى ماقۇلداپ, 3 ملرد. 593 ملن. تەڭگەگە 6 جوبانى قارجىلاندىرۋ باستالعان. ەلميرا ماتىباەۆا, «ەگەمەن قازاقستان».