ەلباسى نۇرسۇلتان نازارباەۆ «قازاقستان تەمىر جولى» اق پرەزيدەنتى اسقار ءماميندى قابىلدادى, دەپ حابارلادى پرەزيدەنتتىڭ ءباسپاسوز قىزمەتى.
ا.مامين مەملەكەت باسشىسىنا كومپانيانىڭ قازىرگى قىزمەتى, ونىڭ ەنشىلەس كاسىپورىندارىنىڭ تيىمدىلىگىن ارتتىرۋ شارالارى, نەگىزگى جوبالاردىڭ جۇزەگە اسىرىلۋ بارىسى جانە الداعى كەزەڭگە ارنالعان جوسپارلارى تۋرالى باياندادى. قازاقستان پرەزيدەنتى ەلىمىزدە ىسكە اسىرىلىپ جاتقان «نۇرلى جول» باعدارلاماسىنىڭ ماڭىزدىلىعىنا, ونىڭ اياسىندا اۋقىمدى جۇمىستار جوسپارلانعانىنا توقتالدى. – استانادان شۇعىلا ءتارىزدى تارايتىن اۆتوكولىك جولدارىن سالۋ جانە قالپىنا كەلتىرۋ ماسەلەسىن تۇراقتى باقىلاۋدا ۇستاۋ قاجەت. بۇل جۇمىستار وندىرۋشىلەردى تەحنيكا مەن قۇرىلىس ماتەريالدارىن جەتكىزۋ جونىندەگى تاپسىرىستارمەن قامتاماسىز ەتە وتىرىپ, مۋلتيپليكاتيۆتى اسەرگە يە بولماق. بۇل ەكونوميكا ءۇشىن قيىن ۋاقىتتا ونى دامىتۋدىڭ درايۆەرىنە اينالادى. ءبىزدىڭ ەلىمىز جىبەك جولىنىڭ «ەكونوميكالىق بەلدەۋىنە» كىرەتىندىكتەن, قىتاي حالىق رەسپۋبليكاسى دا قولداۋ كورسەتەتىن بولادى, – دەدى مەملەكەت باسشىسى. ەلباسى استانادا حالىقارالىق قارجى ورتالىعىن قۇرۋ ءىسى دە كولىك-لوگيستيكا سالاسىن دامىتۋ جۇمىستارىن جۇرگىزۋدى قاجەت ەتەتىنىن ايتتى. – ەلوردانى دۋباي, فرانكفۋرت, گونكونگ سياقتى جەتەكشى قارجى ورتالىقتارىمەن بايلانىستىرۋ قاجەت. ازاماتتىق اۆياتسيا سالاسىندا وسىعان دايىندالىپ, جاڭا باعىتتاردى يگەرگەن ءجون. سونىمەن قاتار, ءبىز ىشكى رەيستەردى كەڭەيتۋ ءۇشىن اۆياكومپانيالار قۇرۋعا ءتيىسپىز, – دەدى نۇرسۇلتان نازارباەۆ. «قازاقستان تەمىر جولى» اق پرەزيدەنتى «نۇرلى جول» باعدارلاماسى اياسىندا جاڭا تەمىرجول, اۆتوموبيل ماگيسترالدارىن سالۋ, تەڭىز پورتتارى مەن اۋەجايلاردىڭ ينفراقۇرىلىمىن قايتا جوندەۋ بويىنشا اۋقىمدى جۇمىس جۇرگىزىلىپ جاتقانىنا توقتالدى. سونىڭ ىشىندە ول ينفراقۇرىلىمدىق دامۋ جوسپارىندا مەجەلەنگەن بىرقاتار ءىرى جوبالاردىڭ جۇزەگە اسىرىلۋى تۋرالى ايتتى. باتىس ءوڭىردىڭ كولىك جۇيەسىن دامىتۋ ماقساتىندا اقتاۋ تەڭىز پورتىن كەڭەيتۋگە مۇمكىندىك بەرەتىن ءۇش جاڭا جۇك تەرمينالى سالىندى. بورجاقتى – ەرساي تەمىرجول جەلىسى سالىنىپ جاتىر. ا.مامين قازاقستاندى ەۋرازيانىڭ كولىك-لوگيستيكا حابىنا اينالدىرۋ جونىندەگى مىندەتتەردى جۇزەگە اسىرۋ ءۇشىن قاجەتتى كۇش-جىگەر جۇمسالىپ جاتقانىن اتاپ ءوتتى. سول ءۇشىن ەلدىڭ ىشىندە جانە شەتەلدە لوگيستيكالىق ينفراقۇرىلىم سالۋ جۇمىستارى جۇرگىزىلۋدە. ماسەلەن, قىتاي – قازاقستان – ەۋروپا باعىتىندا كونتەينەرلىك تاسىمال سوڭعى ءۇش جىلدىڭ قورىتىندىسى بويىنشا 15 ەسەگە وسەدى دەپ جوسپارلانۋدا. سونىمەن قاتار, ۇندىستانعا ترانزيتتىك تاسىمال ۇيىمداستىرۋ ماسەلەسى دە پىسىقتالۋدا. مەملەكەت باسشىسى كەزدەسۋ قورىتىندىسى بويىنشا بىرقاتار ناقتى تاپسىرما بەردى.
سۋرەتتى تۇسىرگەندەر س.بوندارەنكو, ب.وتارباەۆ.
