ايەلدەردىڭ الەۋەتىن ەسكەرگەن مەموراندۋم

كەشە اقوردادا مەملەكەتتىك حاتشى, پرەزيدەنت جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيانىڭ ءتورايىمى گۇلشارا ابدىقالىقوۆا مەن «استانا ەكسپو-2017» ۇلتتىق كومپانياسى» اق-تىڭ باسقارما توراعاسى تالعات ەرمەگياەۆ ىنتىماقتاستىق تۋرالى مەموراندۋمعا قول قويدى. بۇل قۇجات ەلىمىزدەگى ايەلدەرگە ەكسپو-2017 حالىقارالىق كورمەسىن وتكىزۋدە ءوز ۇلەستەرىن مولىنان قوسۋلارىنا مۇمكىندىك بەرمەك. گۇلشارا ابدىقالىقوۆا مە­مو­راندۋمعا قول قويۋ ءراسىمى بارىسىندا اتالمىش قۇجاتتىڭ بەكىتىلۋى ەلىمىز ءۇشىن ەلەۋلى وقيعا ەكەنىن ايتا كەلىپ, «حالقىمىزدىڭ شامامەن 52 پايىزىن ايەلدەر قۇرايدى. سوندىقتان, ۇلتتىق كوميسسيا قازاقستاندىق ايەلدەردىڭ, سونداي-اق, وتاندىق جانە حالىقارالىق ۇكىمەتتىك ەمەس ۇيىمداردىڭ وراسان زور الەۋەتىن جان-جاقتى ىسكە قوسۋدى ءوزىنىڭ باستى مىندەتتەرىنىڭ ءبىرى سانايدى. وسى ورايدا, ايەلدەر قاۋىمداستىعى تاراپىنان ءتۇرلى ۇسىنىستار ءتۇسىپ جاتىر. سوعان بايلانىستى بۇگىن ءبىز «استانا ەكسپو-2017» ۇلتتىق كومپانيا­سىمەن ارنايى مەموراندۋمعا قول قويۋدى ءجون كوردىك», دەدى. سونداي-اق, ول مەملەكەت باسشىسى نۇرسۇلتان نازارباەۆتىڭ تاراپىنان ەكسپو-2017 كورمەسىن دايىنداۋ جانە وتكىزۋ كەزىندە وتاندىق ەكونوميكانىڭ, اسىرەسە, شاعىن جانە ورتا بيزنەستىڭ رەسۋرستارىن بارىنشا پايدالانۋ جونىندە تاپسىرما بەرىلگەنىن باسا ايتتى. ونىڭ سوزىنە قاراعاندا, قازىرگى تاڭدا ۇلتتىق كوميسسيا جاسىل تەحنولوگيالاردى پايدالانۋ ارقىلى قاناتقاقتى جوبالاردى ىسكە اسىرۋ, يننوۆاتسيالىق ەنەرگيا جيناقتاۋشى تەح­نولوگيالارمەن شۇعىلداناتىن ايەلدەر قاۋىمداستىعىن ەكسپو-2017 كورمەسىنە قاتىسۋعا تارتۋ جونىندەگى جۇمىستاردى جانداندىرا تۇسكەن. ماسەلەن, وسى باعىتتا «اقبوتا» قوعامدىق قورى بەلسەندىلىك كورسەتىپ وتىرعان كورىنەدى. بۇل قور پيروليزدىك پەشتەردى, جارىق ديودتى شامداردى, بيو-ۆەگەتاريلەردى جانە تامشىلاتىپ سۋارۋ ارقىلى تابيعي رەسۋرستاردى ۇنەمدەۋگە باعىتتالعان يننوۆاتسيالىق تەحنولوگيالاردى كەڭ كولەمدە ەنگىزۋ ءۇشىن تاجىريبەلىك-سىناقتىق الاڭ قۇرۋدا. ال ءوز كەزەگىندە تالعات ەرمەگياەۆ ەلباسى نۇرسۇلتان نازارباەۆتىڭ قاۋىمداستىقتاردى, كاسىپكەرلەردى «ەكسپو» كورمەسىن ۇيىمداستىرۋ جانە وتكىزۋ شارالارىنا تارتۋ باعىتىندا بەرگەن تاپسىرماسىنا وراي كوپتەگەن شارالار اتقارىلىپ جاتقانىن اتاپ ءوتتى. سونىمەن قاتار, ول ايەلدەر ۇيىمدارىن ەكسپو-2017 كورمەسىنىڭ جۇمىستارىنا كەڭىنەن قاتىستىرۋدىڭ ماڭىزدىلىعىنا توقتالدى. جولدىباي بازار, «ەگەمەن قازاقستان».