اتىراۋدا قالتا ۇرىلارى ۇستالدى

اتىراۋ. 6 ناۋرىز. اتىراۋدا قوعامدىق كولىكتەردە ورىن الاتىن قالتا ۇرلىعىنىڭ الدىن الۋعا بايلانىستى «قالتا ۇرلىعى» جەدەل-الدىن الۋ شاراسى وتكىزىلىپ جاتىر. بۇل تۋرالى egemen.kz ءتىلشىسى حابارلادى. اتالعان شارا اياسىنداعى جۇمىستاردىڭ العاشقى ناتيجەلەرى بايقالا باستادى. اتىراۋ وبلىستىق ىشكى ىستەر دەپارتامەنتىنىڭ ءباسپاسوز حاتشىسى گۇلنازيرا مۇحتاروۆانىڭ ءمالىم ەتۋىنشە, 5 ناۋرىزدا №14 باعىتتاعى اۆتوبۋستا قالتا ۇرلىعىن جاساعان 18 جاسار جىگىت ۇستالعان. اتىراۋ قالالىق كريمينالدىق پوليتسيا ءبولىمىنىڭ قىزمەتكەرلەرى بۇلتارتپاس ايعاقپەن ۇستالعان جىگىتتەن ىشىندە 20 مىڭ تەڭگەسى بار ءامياندى تاۋىپ العان. قالتا ۇرلىعىنا اۋەستەنگەن جىگىتتەن جاۋاپ بارىسىندا ونىڭ بۇعان دەيىن دە بىرنەشە رەت قوعامدىق كولىكتەردە ۇرلىق جاساعانى بەلگىلى بولدى. مۇنى ۇستالعان جىگىتتىڭ ءوزى مويىنداپ, دالەل رەتىندە «ناسيحا» ساۋدا ورتالىعىنا تاياۋ ورنالاسقان كوپ قاباتتى ءۇيدىڭ جەرتولەسىنە جاسىرىلعان زاتتاي ايعاقتاردى ءوز ەركىمەن كورسەتىپ بەرگەن. ول جەردەن زارداپ شەگۋشىلەردىڭ ءتۇرلى قۇجاتتارى, سونىمەن بىرگە, 10 ءاميان تابىلعان. ءدال وسىنداي جەڭىل جولمەن تابىس تابۋدى كوزدەپ, №12 باعىتتا قاتىنايتىن قوعامدىق كولىككە مىنگەن جولاۋشىلاردىڭ ءاميان ۇرلاۋمەن اينالىسىپ جۇرگەن تاعى ءبىر «سۋىق قولدىنى» ۇستالدى. ول اتالعان قوعامدىق كولىكتە ەكى جولاۋشىنىڭ ءاميانىن ۇرلاعان. مۇنى پوليتسەيلەر ۇرىدان تاركىلەنگەن ءايمياندار ىشىندەگى جابىرلەنۋشىلەردىڭ قۇجاتتارى نەگىزىندە دالەلدەپ بەردى. كەيىن بەلگىلى بولعانداي, 26 جاستاعى جىگىت بۇعان دەيىن ەكى رەت وسىنداي ۇرلىق جاساعانى ءۇشىن سوتتالعان ەكەن. قازىر اتالعان فاكتىلەر بويىنشا تەرگەۋ-تەكسەرۋ امالدارى جۇرگىزىلىپ جاتىر. جولداسبەك شوپەعۇل. دەرەك: اتىراۋ وبلىستىق ىشكى ىستەر دەپارتامەنتى. سۋرەت: next87.livejournal.com.