پارتيانىڭ الداعى مىندەتتەرى

كەشە «نۇر وتان» پارتياسى توراعاسىنىڭ ءبىرىنشى ورىنباسارى اسقار مىرزاحمەتوۆتىڭ قاتىسۋىمەن پارتيانىڭ رەسپۋبليكالىق جينالىسى ءوتتى. وندا 2015 جىلدىڭ ءبىرىنشى جارتىجىلدىعىندا اتقارىلعان جۇمىستار تالقىلانىپ, ەكىنشى جارتىجىلدىققا ارنالعان مىندەتتەر بەلگىلەندى. جينالىستى اشقان كىرىسپە سوزىندە ا.مىرزاحمەتوۆ پرە­زيدەنت ن.نازارباەۆتىڭ بەس ينستيتۋتتىق رەفورماسىنا جانە ونى ىسكە اسىرۋدىڭ 100 قادامىنا بايلانىستى پارتيانىڭ الدىندا تۇرعان مىندەتتەر, «نۇرلى جول» باعدارلاماسىنىڭ ورىندالۋىن باقىلاۋ تۋرالى ەلباسىنىڭ تاپسىرمالارىن ەسكە سالىپ ءوتتى. بۇگىنگى جيىنىمىزدا وسى الدا تۇرعان ماقساتتاردى ورىنداۋعا بايلانىستى اتقارىلا­تىن جۇ­­مىستاردى ايقىنداعا­لى وتىرمىز. ەكىنشىدەن, ءۇستى­مىز­دەگى جىلدىڭ العاشقى جارتى­جىلدىعىندا اتقارىلعان ىستەردىڭ قورىتىندىسىن قارايتىن بولامىز, دەدى ول. وسى ماسەلەلەر بويىنشا العاشقى ءسوز «نۇر وتان» پارتياسىنىڭ حاتشىسى قۇمار اقساقالوۆقا بەرىلدى. ول الدىمەن پارتيانىڭ سايلاۋالدى باعدارلاماسىنىڭ ءۇش جىلداعى ورىندالۋى تۋرالى حاباردار ەتتى. سونىڭ ىشىندە 49 كورسەتكىش بويىنشا وڭ ناتيجەلەر الىندى. سونىڭ ىشىندە 20 مىندەت مەرزىمىنەن بۇرىن ىسكە اسۋدا. ادامنىڭ ورتاشا ءومىر ءسۇرۋ ۇزاقتىعى 70,5 جاسقا جەتتى, مەكتەپتەر مەن تۇرعىن ءۇي قۇرىلىسى بويىنشا مىندەتتەر ورىندالىپ, 401 مەكتەپ, 25 ملن. شارشى مەتر تۇرعىن ءۇي سالىندى. قازىر قۇرىلىس ماتەريالدارىنىڭ 80 پايىزى ەلىمىزدە وندىرىلەدى, ال جوسپار بويىنشا 50 پايىز بولعان ەدى, دەدى ول. سونىمەن قاتار, ول پارلامەنتتەگى پارتيا فراكتسياسىنىڭ جۇمىستارىنا دا توقتالىپ, بۇگىنگى كۇنى سىبايلاس جەمقورلىققا قارسى ءىس-قيمىلدىڭ 2015-2025 جىلدارعا ارنالعان پارتيالىق باعدارلاماسىن جۇزەگە اسىرۋ ءۇشىن 3 زاڭ جوباسى ازىرلەنىپ, ولار پالاتانىڭ قاراۋىنا ەنگىزىلگەنىن جەتكىزدى. سايلاۋالدى ۋادەلەردى ورىنداۋ ماقساتىندا بارلىعى 30 زاڭ قابىلدانعان ەكەن. قازىرگى تاڭدا پارتيانىڭ وبلىستاعى فيليالدارىندا ۇلتتىق قوردان بولىنگەن قارجىلاردىڭ ءتيىمدى جۇمسالۋىن باقىلاۋ بويىنشا كوميسسيالار قۇرىلعانى جانە ولار الەۋمەتتىك نىسانداردىڭ قۇرىلىسى بو­يىنشا جەدەل اقپارات الىپ, 278 نىساننىڭ ورىندالۋىنا مونيتورينگ جۇرگىزۋدە ەكەنى ايتىلدى. سونىمەن قاتار, ەسەپتى كەزەڭدە 43 مىڭنان ارتىق ادامنىڭ پارتياعا ءوتىنىش-شاعىمدارمەن كەلگەنى, سونىڭ 20 پايىزدان ارتىعى بو­يىنشا وڭ شەشىمدەر قابىلدانعانى جەتكىزىلدى. شەشەن ولاردىڭ قانشاسى قانداي ماسەلەلەرگە بايلانىستى ەكەنى دە تالدانعانىن ايتىپ بەردى. يدەولوگيالىق جۇمىستارعا بايلانىستى اتقارعان شارۋالار تۋرالى پارتيا حاتشىسى فارحاد قۋانعانوۆ باياندادى. پارتيانىڭ يدەولوگيالىق جۇمىستارى دوكترينانىڭ باستى قاعيدالارى مەن قۇندىلىقتارىنا نەگىزدەلدى, دەي كەلىپ ول 12 ماقساتتى جوبالار رەسپۋبليكا تۇرعىندارىنىڭ نەگىزگى بولىگىن شارپىپ, ولاردى الاڭداتاتىن بارلىق ماسەلەلەردى قاراستىرعانىن ايتتى. ماسەلەن, «ارداگەرلەردى ارداقتايىق», «باقىتتى وتباسى», «باقىتتى بالالىق» جوبالارى بويىنشا 5,5 مىڭ ارداگەردىڭ, 1600 جەتىم بالانىڭ پروبلەمالارى شەشىلىپ, 656 مىڭ وتباسىنا ماتەريالدىق كومەك بەرىلدى, دەدى ول. «مىقتى بيزنەس – قۋاتتى مەملەكەت» جوباسىنىڭ شەڭبەرىندە ۇلتتىق كاسىپكەرلەردىڭ پالاتاسىمەن بىرلەسە وتىرىپ, شاعىن جانە ورتا بيزنەستى دامىتۋعا بايلانىس­تى 10 زاڭناماعا وزگەرىستەر مەن تولىقتىرۋلار ەنگىزىلدى, 600-دەن استام ادام بيزنەستىڭ نەگىزدەرى بويىنشا وقۋلاردى اياقتادى. سونىمەن قاتار, ەلباسىنىڭ تاپسىرماسى بويىنشا مۇمكىندىگى شەكتەۋلى جاندارعا دا كومەك قولى سوزىلعانىن اتاپ ءوتتى. «كەدەرگىسىز كەلەشەك» جوباسى بويىنشا 6 مىڭنان استام مۇگەدەك جۇمىسقا ورنالاستىرىلدى, دەدى ول. بۇدان كەيىن جينالىستا پارتيا بەلسەندىلەرى, ماجىلىستەگى پارتيا فراكتسياسىنىڭ مۇشەلەرى ق.سۇلەيمەنوۆ, و.كيكولەنكو جانە ت.ب. سويلەدى. جينالىس جۇمىسىن ا.مىرزاحمەتوۆ قىسقاشا سوزبەن قورىتىندىلادى. ءبىز الداعى ۋاقىتتا دا بيۋدجەت قاراجاتى ەسەبىنەن اتقارىلىپ جاتقان باعدارلامالاردىڭ ورىندالۋىنا نازار اۋدارىپ, باقىلاۋدى كۇشەيتۋىمىز, ولاردىڭ ءتيىمدى جانە ماقساتتى جۇمسالۋىن قاتاڭ قاداعالاۋدا ۇستاۋىمىز كەرەك, دەدى ول. سونىمەن قاتار, قوعامدىق قابىلداۋلار بولمەلەرىنىڭ بەلسەندىلىگىنە نازار اۋداردى. «جىل وتكەن سايىن قوعامدىق قابىلداۋلارعا مۇڭ-مۇقتاجىن ايتا كەلۋشىلەردىڭ ارتا ءتۇسۋى «نۇر وتانعا» دەگەن حالىق سەنىمىنىڭ ءبىر كورسەتكىشى. الايدا, ەندىگى جەردە ءبىز ءىستىڭ ناتيجەلىلىگىن تەك كەلىپ تۇسكەن وتىنىشتەر كولەمىمەن عانا ەمەس, قاراپايىم تۇرعىندار ماسەلەلەرىنىڭ قانشالىقتى تۇبەگەيلى شەشىمىن تاپقانىمەن ولشەۋگە ءتيىسپىز. ول ءۇشىن ارىز-شاعىمداردىڭ ءتۇپ-توركىنىنە ۇڭىلگەن ءجون. ياعني, بەلگىلى ءبىر ءوتىنىش قانداي سەبەپپەن ءتۇستى, بۇل قانداي ورگان جۇمىسىنىڭ كەمشىلىگى دەگەندى انىقتاپ, سوعان ساي حالىقتىڭ ماسەلەسىن ناقتى شەشۋدىڭ تەتىكتەرىن ىسكە اسىرۋىمىز قاجەت», دەدى پارتيا توراعاسىنىڭ ءبىرىنشى ورىنباسارى. وسىلايشا «نۇر وتان» بيلەۋشى ساياسي كۇش رەتىندە ازاماتتاردى تولعاندىرعان ماسەلەلەردىڭ شەشىلۋىنە ىقپال ەتىپ, جۇرتشىلىقتىڭ سەنىمىن ارتتىرۋ ارقىلى پارتيالاستار قاتارىن ودان ءارى ۇلعايتۋدى جالعاستىرا بەرمەك. سونىمەن قاتار, ول باستاۋىش پارتيا ۇيىمدارى جۇمىسىنىڭ ساپالىلىعىنا, «جاس وتان» جاستار قاناتىنىڭ جۇمىسىن جەتىلدىرۋ ماقساتىنا نازار اۋداردى. سىبايلاس جەمقورلىقپەن كۇرەس باعىتىنداعى جۇمىستاردى جەتىلدىرۋ ماسەلەسى دە نازاردان تىس قالمادى. وسىعان وراي, سىبايلاس جەمقورلىققا قارسى ءىس-قيمىل جونىندەگى رەسپۋبليكالىق قوعامدىق كەڭەستىڭ ءىس-قيمىلىن ارتتىرۋ ماسەلەسى كوتەرىلدى. سەلەكتورلىق جينالىسقا پارتيانىڭ پارلامەنت ماجىلىسىندەگى فراكتسياسىنىڭ مۇشەلەرى, پارتيانىڭ حاتشىلارى, ورتالىق اپپاراتتىڭ قۇرىلىم باسشىلارى, وڭىرلەردەگى وبلىستىق فيليالدار توراعالارىنىڭ ءبىرىنشى ورىنباسارلارى جانە بەينەبايلانىس ارقىلى وڭىرلەردەگى اپپارات قىزمەتكەرلەرى قاتىستى.  جاقسىباي سامرات, «ەگەمەن قازاقستان».