جاس فۋتبولشىلارىمىز ناۋرىزدا ەكى جولداستىق ويىن وتكىزەدى

استانا. 6 ناۋرىز. فۋتبولدان ەلىمىزدىڭ جاستار قۇراماسى ناۋرىز ايىنىڭ سوڭىندا ەكى جولداستىق كەزدەسۋ وتكىزەدى. بۇل تۋرالى kff.kz حابارلادى. الدىمەن جاستارىمىز فينليانديالىق قۇرداستارىمەن كۇش سىناسادى. حەلسينكيدە وتەتىن بۇل ويىن 25 ناۋرىزعا جوسپارلانعان. ال 30 ناۋرىزدا ساۋليۋس شيرمياليس جاتتىقتىراتىن جاس فۋتبولشىلارىمىز تالليندە ەستونيامەن تارتىسقا تۇسەدى. «الدا 2017 جىلعى جاستار اراسىنداعى ەۆروپا چەمپيوناتىنا ىرىكتەۋ ءتۋرنيرى كەلە جاتىر. سول سايىس الدىندا وسىلاي دايىندىعىمىزدى پىسىقتاپ الۋدى ءجون سانادىق. ونىڭ ۇستىنە ىرىكتەۋ سايىسى كەزىندە ءبىز انگليا, نورۆەگيا سىندى مىقتى ۇجىمدارمەن ءبىر توپتا وينايمىز. فينليانديا قۇراماسىنىڭ نورۆەگيادان ەش ايىرماشىلىعى جوق. ەستونداردىڭ دا ويىن ورنەگى سكانديناۆتىقتارعا ۇقساس. سوندىقتان الداعى ەكى جولداستىق ويىن بىزگە مول تاجىريبە بولادى», دەيدى جاستارىمىزدى جاتتىقتىرىپ جۇرگەن ليتۆالىق مامان. ايتا كەتەيىك, 2017 جىلعى ەۆروپا چەمپيوناتىنا ىرىكتەۋ تۋرنيرىندە قازاقستان 9-توپتا ونەر كورسەتەدى. سوعان سايكەس, انگليا, نورۆەگيا, شۆەيتساريا, سونداي-اق, بوسنيا جانە گەرتسەگوۆينا جاستار قۇرامالارىمەن فينالدىق كەزەڭگە بەرىلەر جولدامانى ساراپقا سالادى. العاشقى ويىندى 2 قىركۇيەك كۇنى سىرت الاڭدا بوسنيا جانە گەرتسەگوۆيناعا قارسى وتكىزسە, كەلەسى كەزدەسۋدە شۆەيتساريا جاستارىمەن جاسىل الاڭعا شىعادى. 7 قىركۇيەكتە بولاتىن بۇل ويىندى ءبىزدىڭ كوماندا ءوز الاڭىندا وتكىزەدى. قالعان ويىنداردىڭ كەستەسى تومەندەگىدەي: 08.10.2015 نورۆەگيا – قازاقستان. 13.10.2015 انگليا – قازاقستان. 25.03.2016 قازاقستان – بوسنيا جانە گەرتسەگوۆينا. 02.09.2016 شۆەيتساريا – قازاقستان. 06.10.2016 قازاقستان – انگليا. 11.10.2016 قازاقستان – نورۆەگيا. ەلامان قوڭىر. دەرەك, سۋرەت: kff.kz.