سولتۇستىك قازاقستاندا كوكتەمگى ەگىسكە دايىندىق پىسىقتالدى

پەتروپاۆل. 6 ناۋرىز. پەتروپاۆلداعى ن.پوگودين اتىنداعى وبلىستىق ورىس دراما تەاترىندا وتكەن سەمينار-كەڭەستە كوكتەمگى دالا جۇمىستارىن ۇيىمشىلدىقپەن جۇرگىزۋ ماسەلەسى تالقىلاندى. بۇل تۋرالى سولتۇستىك قازاقستان وبلىسى اكىمدىگىنىڭ ءباسپاسوز ورتالىعى حابارلادى. جيىنعا اۋدان, اۋىل اكىمدەرى, ۆەدومستۆولاردىڭ, ۇيىمداردىڭ جانە اگروقۇرىلىمداردىڭ باسشىلارى, عالىمدار مەن ءونىم جەتكىزۋشى فيرمالاردىڭ وكىلدەرى قاتىستى. سەمينار-كەڭەستى ايماق باسشىسى ەرىك سۇلتانوۆ اشىپ, جۇرگىزىپ وتىردى. ول كىرىسپە سوزىندە اگرارلىق سالا وبلىس ەكونوميكاسىنىڭ نەگىزى ەكەنىن ايتىپ, «ونىڭ ۇلەسى جالپى وڭىرلىك ءونىمنىڭ 24 پايىزىن قۇرايدى. كوكتەمگى ەگىس قول جەتكەن تابىستاردى ودان ءارى ارتتىرۋدىڭ قامى, باستى شارالاردىڭ باستاۋى», دەدى. وبلىس اكىمىنىڭ ءبىرىنشى ورىنباسارى ايداربەك ساپاروۆ كوكتەمگى دالا جۇمىستارىنا بايلانىستى الدا تۇرعان مىندەتتەردى باياندادى. مەملەكەت باسشىسىنىڭ تاپسىرماسىنا وراي ەگىس القاپتارىن ءارتاراپتاندىرۋ ماقساتىمەن 3 ميلليون 300 مىڭ گەكتارعا ءداندى جانە ءداندى-بۇرشاقتى, 568 مىڭ گەكتارعا مايلى, 448 مىڭ گەكتارعا جەمازىقتىق داقىلدار سەبۋ كوزدەلگەن. مينەرالدىق تىڭايتقىشتار قۇنىن ارزانداتۋ ءۇشىن مەملەكەتتەن 2 ميلليارد 158 ميلليون, گەربيتسيدكە 2 ميللليارد 365 ميلليون تەڭگە دەمەۋقارجى ءبولىنىپ وتىر. وسىمدىك شارۋاشىلىعىن قولداۋعا ارنالعان دەمەۋقارجىنىڭ مولشەرى 11,4 ميلليارد تەڭگەنى قۇرايدى. اگروقۇرىلىمدار مەن سەرىكتەستىكتەر تۇقىممەن 93 پايىز قامتاماسىز ەتىلگەن. جاۋاپتى ناۋقانعا 15,3 مىڭ تراكتور, 16,2 مىڭ تۇقىمسەپكىش, 1100-دەي سەبۋ كەشەنى, 5,8 مىڭ جۇك ءاۆتوموبيلى, 50 مىڭنان استام توپىراق وڭدەۋ تەحنيكاسى قاتىسادى دەپ جوسپارلانعان. بۇگىندە ماشينا-تراكتور پاركى 72 پايىزعا دايىن. باراەۆ اتىنداعى استىق شارۋاشىلىعى عىلىمي-وندىرىستىك ورتالىعىنىڭ ديرەكتورى جەكسەنباي قاسقارباەۆ كوكتەمگى دالا جۇمىستارىنىڭ ستراتەگياسى, ءسىبىر اۋىل شارۋاشىلىعى عىلىمي-زەرتتەۋ ينستيتۋتىنىڭ زەرتحانا مەڭگەرۋشىسى لەونيد يۋشكەۆيچ ءسىبىردىڭ وڭتۇستىگىندەگى كوكتەمگى ناۋقاندى وتكىزۋدىڭ ەرەكشەلىكتەرى, ءسىبىر تاجىريبە ستانتسياسى ديرەكتورىنىڭ ورىنباسارى الەكساندر پۋزيكوۆ باتىس ءسىبىر مەن سولتۇستىك قازاقستان وبلىسىنىڭ مايلى داقىلدارى جايلى پىكىرلەرىن العا تارتتى. «ءالىبي-اگرو» جاۋاپكەرشىلىگى شەكتەۋلى سەرىكتەستىگى باقىلاۋ كەڭەسىنىڭ توراعاسى نۇرلان تىلەۋباەۆ, «استىق-ستەم» جشس-ءنىڭ ديرەكتورى سەرگەي زۆولسكي كوكتەمگى دالا جۇمىستارىن ۇيىمشىلدىقپەن وتكىزۋگە بايلانىستى ءوز ويلارىمەن ءبولىستى. ءومىر ەسقالي. دەرەك: سولتۇستىك قازاقستان وبلىسى اكىمدىگىنىڭ ءباسپاسوز ورتالىعى. سۋرەت: munara.kz.