ومبىلىق قازاق اقىنى ءبىر سوزدەن تۇراتىن كىتاپ شىعاردى

استانا. 2 ءساۋىر. رەسەيدىڭ ومبى قالاسىندا تۇراتىن ەلۋباي باقتىباەۆ ەسىمدى ۇلتى قازاق اقىن ءبىر سوزدەن تۇراتىن كىتابىن مىڭ دانالىق تارالىممەن شىعاردى. بۇل تۋرالى «سۋپەر ومسك» باسىلىمى جازدى. كىتاپ شىنىندا دا ءبىر عانا سوزدەن تۇرادى. «ال سودان سوڭ ءسوز بولدى» («ا پوسلە بىلو سلوۆو») دەپ اتالاتىن جيناقتا «ءيا-ءا-ءا-ءا...» («دا-ا-ا-ا-…») دەگەن ءبىر-اق ءسوز بار. ال وعان دەيىن جانە كەيىن اۆتوردىڭ العىسوزى مەن تۇسىندىرمەسى بەرىلگەن. «مەن مۇنى ۇزاق زەرتتەدىم, سوسىن جۇرتتىڭ وسى ءسوزدى قالاي ايتاتىنىن بايقاي باستادىم. الدەقانداي ءبىر جەردە الدەبىر نارسە بولا قالسا, ولار ويلانىپ الىپ, «ءيا» دەگەندى ايتادى. بۇل – قىپ-قىسقا ءسوز, بىراق ول تۇتاس ءبىر اڭگىمەنى, تاقىرىپتى تولىق الماستىرا الادى. ەگەر ونى الدەبىر جەردە ەستي قالساڭ, ايتىپ تۇرعان ادامنىڭ نە ويلاپ تۇرعانىن ويلانىپ قالاسىڭ دا, الدىن وراپ كەتەسىڭ», - دەيدى باقتىباەۆ. وسى ادەبي تۋىندىنى جازۋ يدەياسى ومبىلىق اقىنعا ۇلى وتان سوعىسى مايدانىندا شايقاسقان اكەسىمەن سويلەسىپ وتىرعان كەزىندە كەلگەن ەكەن. ول ءجۇرىپ وتكەن ءومىر جولدارىن ەسكە العاندا, ءار جولى ويلى قالىپتا ءدال وسىلاي: «ءيا-ءا-ءا-ءا...» دەيتىن كورىنەدى. ال ەلۋباي باقتىباەۆ ءبىرازدان بەرى جىر جازىپ, اقىندىقپەن اينالىسادى ەكەن. بىراق ءتىلى ورىس تىلىندە قالىپتاسقاندىقتان, ورىسشا جازادى. ونىڭ شىعارمالارى ينتەرنەتتە جاريالانىپ ءجۇر. ال 2009 جىلى ولەڭدەرى مەن قاناتتى سوزدەردەن تۇراتىن «كوككە قۇلاق تۇرگەندە» («سلۋشايا نەبو») دەگەن كىتابىن شىعارىپتى. مۇرات ايتقوجا. مانبە, سۋرەت: Super Omsk.