بۇل وتكەن جىلدىڭ ءتيىستى كەزەڭىمەن سالىستىرعاندا 6,8 پايىزعا كوپ. ال, نەگىزگى كاپيتالعا سالىنعان ينۆەستيتسيانىڭ باسىم بولىگى ونەركاسىپ سالاسىندا يگەرىلىپ وتىر. بۇل ينۆەستيتسيانىڭ جالپى كولەمىنىڭ 73 پايىزى. بيۋدجەتتىك قارجىلار ەسەبىنەن 18 ملرد. تەڭگە يگەرىلدى, بۇل 2009 جىلعى قاڭتار-ماۋسىمعا قاراعاندا 1,5 ەسە ارتىق. وسىنشاما قارجى نەگىزىنەن ينجەنەرلىك ينفراقۇرىلىمنىڭ دامۋىنا, الەۋمەتتىك وبەكتىلەر قۇرىلىسىنا جانە كوممۋنالدىق جالداۋ مەن نەسيەلىك تۇرعىن ۇيلەرگە جۇمسالعان. 10,3 ملرد. تەڭگە كولەمىندە شەتەل ينۆەستيتسيالارى يگەرىلدى نەمەسە ول بىلتىرعى وسى كەزەڭمەن سالىستىرعاندا 14,6 پايىزعا ارتىق.
ساتىبالدى ءساۋىرباي, اقتوبە وبلىسى.
94 001 000 000 باتىس قازاقستان وبلىسىندا بيىلعى جارتى جىلدىقتا ينۆەستيتسيا كولەمى وسىنشاما تەڭگەگە جەتتى. وسى دەرەكتى تاراتقان وڭىردەگى ستاتيستيكا دەپارتامەنتىنىڭ تالداۋلارىنا سۇيەنسەك, ينۆەستيتسيانىڭ نەگىزگى بولىگى ونەركاسىپكە باعىتتالعانىن كورەمىز. وسىلاي بولۋىنىڭ ءوزى دە زاڭدىلىقتاي كورىنەدى. ويتكەنى, قاي كەزدە دە ونەركاسىپ ەكونوميكانىڭ قوزعاۋشى كۇشى, باستى لوكوموتيۆى بولىپ قالا بەرمەك. ەكىنشىدەن, ول – ينۆەستيتسيا كۇيۋعا وتە ىڭعايلى سالا. بۇل فاكتور دا ونىڭ مولشەرىنىڭ باسىم بولۋىنا العىشارت قالاعان دەپ ەسەپتەۋگە بولادى. بۇدان كەيىنگى رەتتەردە ينۆەستيتسيا كولىك پەن قويماعا ورنالاستىرۋ, دەنساۋلىق ساقتاۋ, جىلجىمايتىن م ۇلىك, ءبىلىم بەرۋ مەن ساۋدا جانە اۋىل شارۋاشىلىعى سالالارىنا تارتىلعان. بۇعان دەيىنگى تاجىريبە بارىسى كورسەتكەندەي, ينۆەستيتسيالىق تۇسىمدەر مەن قاراجاتتاردان رەسپۋبليكا اۋداندارى مەن اۋىلدارى ءتيىستى ۇلەس الا الماي كەلگەنى دە راس.
تەمىر قۇسايىن, باتىس قازاقستان وبلىسى.
400 000 000 پروكۋراتۋرا قىزمەتكەرلەرى وسىنشا مولشەردەگى ەڭبەكاقىنى قارىز يەلەرىنە قايتاردى. وبلىستىق پروكۋراتۋرا جىل باسىنان بەرى 13 مىڭعا جۋىق ادامنىڭ ەڭبەك قۇقىعىن قورعاپ, ۋاقتىلى تولەنبەگەن 400 ميلليون تەڭگە جالاقىنى يەلەرىنە قايتاردى. 7 اۋدان ەڭبەكاقى جونىندەگى بەرەشەكتەرىن تولىق وتەدى. تايىنشا اۋدانىنداعى “بيوحيم” اق كوپتەن بەرى جۇمىسشىلاردىڭ ماڭدايتەر اقىسىن وتەۋدى كەشەۋىلدەتىپ كەلسە, 15 ميلليون تەڭگە جالاقىنى تولىق تولەپ, ەسەپ ايىرىستى. ونىڭ قاتارىندا “ترانسپورتنيك”, “پەتروپاۆلەلەكترمونتاج”, “پەتروپاۆل تروللەيبۋس پاركى” سەكىلدى مەكەمەلەر بار. ءوز مىندەتتەرىنە ءاتۇستى قاراعان 44 باسشى اكىمشىلىك جاۋاپكەرشىلىككە تارتىلدى. دەگەنمەن, كەي كاسىپورىندار تاراپىنان ەڭبەك زاڭىن بۇرمالاۋشىلىق تىيىلار ەمەس. “ودەجدا ەلاستيك” جشس 7 ميلليون, پەتروپاۆل كيىم فابريكاسى 3 ميلليون تەڭگە جالاقىنى ءالى وتەمەگەن. قولدانىلعان شارالارعا قاراماستان, بەرەشەك قارىز 40 ميلليون تەڭگە بولىپ وتىر.
ءومىر ەسقالي, سولتۇستىك قازاقستان وبلىسى.
