قىزىلوردا وبلىسىندا جۇمىسشىلاردىڭ قۇقىقتارى قورعالدى

استانا. 1 ءساۋىر. قىزىلوردا وبلىسى سىرداريا اۋداندىق پروكۋراتۋراسى «وركەن-سىرداريا» جاۋاپكەرشىلىگى شەكتەۋلى سەرىكتەستىگىنداە ەڭبەك كودەكسى تالاپتارىنىڭ قولدانىلۋىنا بايلانىستى تەكسەرۋ جۇرگىزىپ, زاڭ بۇزۋشىلىقتارعا جول بەرىلگەنىن انىقتادى. بۇل تۋرالى وبلىستىق پروكۋراتۋرانىڭ ءباسپاسوز قىزمەتى حابارلادى. تەكسەرۋ بارىسىندا جۇمىس بەرۋشى مەن 103 جۇمىسشى-قىزمەتكەر ارالارىندا جاسالعان ەڭبەك شارتتارىندا سوڭعىلارعا ەڭبەككە اقى تولەۋ مولشەرى مەن وزگەدە شارتتارى, قىزمەتكەرلەر مەن جۇمىس بەرۋشىنىڭ قۇقىقتارى, ەڭبەك شارتىن وزگەرتۋ ءتارتىبى, ساقتاندىرۋ جونىندەگى تالاپتارى مەن شارتتاردىڭ رەتتىك نومىرلەرى كورسەتىلمەي, زاڭ تالاپتارىنىڭ بۇزىلۋىنا جول بەرىلگەنى انىقتالدى. سونىمەن قاتار, جۇمىس بەرۋشىمەن قاراۋىل جانە ەدەن جۋشى قىزمەتكەرلەردىڭ ءبىر ايلىق جالاقىسىنىڭ مولشەرى «2014-2016 جىلدارعا ارنالعان رەسپۋبليكالىق بيۋدجەت تۋرالى» زاڭنىڭ 10-بابىندا بەلگىلەنگەن ايلىق جالاقىنىڭ ەڭ تومەنگى مولشەرىنەن (19 966 تەڭگە) كەم, ياعني 18 660 تەڭگە مولشەرىندە بەلگىلەنىپ, زاڭ تالاپتارى بۇزىلعان. سونداي-اق, تەكسەرۋ بارىسىندا جۇمىس بەرۋشىمەن قاراۋىل بولىپ جۇمىس ىستەيتىن 3 قىزمەتكەرگە 2014 جىلى ولاردىڭ تۇنگى ۋاقىتتاعى جۇمىستارى ءۇشىن قوسىمشا اقى تولەنبەي, ەڭبەك كودەكسىنىڭ 23-بابى 2-بولىگىنىڭ 19-تارماقشاسى مەن 91-بابى 1-بولىگى تالاپتارىنىڭ بۇزىلۋىنا جول بەرىلگەنى بەلگىلى بولدى. بۇل رەتتە, جۇمىس بەرۋشىمەن ەڭبەك شارتتارىندا جۇمىسشى-قىزمەتكەرلەردىڭ جاعدايىن ناشارلاتاتىن ەرەجەلەرىنىڭ بەلگىلەنۋىنە, سونداي-اق ولاردىڭ قاۋىپسىزدىك پەن تازالىق تالاپتارى جونىندەگى ماسەلەلەرى قاراستىرىلماي, سوڭعىلاردىڭ كونستيتۋتسيالىق قۇقىقتارىنىڭ بۇزىلۋىنا جول بەرىلگەن. زاڭدىلىقتى بۇزۋشىلىقتاردى جويۋ ماقساتىندا اۋداندىق پروكۋراتۋرا «وركەن-سىرداريا» جاۋاپكەرشىلىگى شەكتەۋلى سەرىكتەستىگىنىڭ ديرەكتورىنا 2015 جىلدىڭ 5 ناۋرىزىندا ۇيعارىم ەنگىزىلىپ, قارالۋى ناتيجەسىمەن جۇمىس بەرۋشىمەن قاراۋىل قىزمەتكەرلەرگە ولاردىڭ تۇنگى ۋاقىتتاعى جۇمىسى ءۇشىن قوسىمشا ەڭبەك اقى ەسەپتەلىپ, تولەنىپ, 103 جۇمىسشى-قىزمەتكەر ارالارىندا جاسالعان ەڭبەك شارتتارى ەڭبەك كودەكسىنىڭ تالاپتارىنا سايكەس كەلتىرىلىپ, سوڭعىلاردىڭ كونستيتۋتسيالىق قۇقىقتارىنىڭ قورعالۋىنا قول جەتكىزىلدى. جولدىباي بازار. دەرەك: قىزىلوردا وبلىستىق پروكۋراتۋرانىڭ ءباسپاسوز قىزمەتى. سۋرەت: egemen.kz.