اقتاۋ. 6 ناۋرىز. اقتاۋدا سوت سالاسىنىڭ قىزمەتكەرلەرى مايدانگەر انالاردى 8 ناۋرىز مەرەكەسىنە وراي قۇتتىقتادى. بۇل تۋرالى egemen.kz ءتىلشىسى حابارلادى.
اقتاۋ قالالىق سوتىنىڭ قىزمەتكەرلەرى جەڭىستىڭ 70 جىلدىعى مەرەكەسى قارساڭىندا ەكىنشى دۇنيەجۇزىلىك سوعىسقا قاتىسقان, بۇگىندە كوزى ءتىرى قوس كەيۋانانىڭ ۇيلەرىنە باس سۇعىپ, ولاردى 8 ناۋرىز حالىقارالىق قىز-كەلىنشەكتەر كۇنىمەن قۇتتىقتادى. گۇل شوقتارى مەن ارنايى سىي-سياپاتتارىن تابىستادى.
بۇگىندە 91 جاستاعى قامقا ۇمبەتالينا سوعىسقا 1942 جىلى اتتانعان. 19 جاسىندا مايدان دالاسىنان تابىلعان قىز باستان-اياق قيىر شىعىس مايدانىنداعى 9-شى اۋە اسكەرى قۇرامىندا شايقاستى. بومبالاۋشى ۇشاقتا جاۋدىڭ نىساندارىن قيراتىپ, جەڭىستىڭ جاقىنداۋىنا ۇلەسىن قوسقان قازاق قىزى ي.ءستاليننىڭ العىس حاتىنا يە بولادى. 1945 جىلى جاپونياعا قارسى سوعىسقا قاتىسىپ, ەلگە ورالعان قامقا مۇناي-گاز سالاسىندا ەڭبەك ەتتى. قوناقتارىن ءوڭىرى وردەن-مەدالدارعا تولى جاۋىنگەرلىك مۋنديرمەن قارسى العان مايدانگەر اجە ەرلىككە, قيىندىققا تولى جاستىق شاعى تۋرالى اڭگىمە شەرتتى.
ال 90 جاستاعى اننا موروزوۆا – جەتىمدەر ءۇيىنىڭ تاربيەلەنۋشىسى ەكەن. مەكتەپتى بىتىرگەن سوڭ ساراتوۆقا جۇمىسقا جىبەرىلىپ, اۆياتسيالىق زاۋىتقا جۇمىسقا ورنالاسادى. سوعىس باستالىسىمەن دارىگەرلىك كۋرسقا تاپسىرىپ, سانيتارلىق اۆياتسيالىق درۋجينانىڭ كومانديرى بولىپ, كەيىن 89 ارتيللەريالىق ديۆيزيانىڭ اعا ساننۇسقاۋشىسى بولادى دا, كەيىن بارلاۋشى-ءپاراشيۋتشى رەتىندە سوعىسادى. ۋكراينا, رۋمىنيا جانە ۆەنگريانى ازات ەتۋگە قاتىسقان اننا قازىر اقتاۋ قالاسىندا تۇرادى. سالاۋاتتى ءومىر سالتىن ومىرىنە سەرىك ەتكەن ول بالالار ءۇيىنىڭ تاربيەلەنۋشىلەرىنە كومەكتەسىپ تۇرادى.
گۇلايىم شىنتەمىرقىزى.
دەرەك, سۋرەت: egemen.kz.
