قورىتىندى قارار قابىلداندى

كەشە جەنەۆا قالاسىندا قازاقستان پارلامەنتى سەناتىنىڭ توراعاسى قاسىم-جومارت توقاەۆتىڭ باسشىلىعىمەن ەل پارلامەنتىنىڭ دەلەگاتسياسى قاتىسقان پارلامەنت توراعالارىنىڭ بۇكىلالەمدىك ءۇشىنشى كونفەرەنتسياسى اياقتالدى, دەپ حابارلادى قازاقستان پارلامەنتى سەناتىنىڭ ءباسپاسوز قىزمەتى. فورۋم “جالپىعا بىردەي يگىلىك مۇددەسىنە وراي جاھاندىق دەموكرا­تيالىق ەسەپ بەرۋ مەن جاۋاپكەر­شى­لىكتى قامتاماسىز ەتۋ” قورىتىندى قارارىن قابىلدادى. القالى جيىنعا قاتىسۋشىلار كوپبەلدەۋلى الەمدەگى كۇردەلى ءارى تەرەڭ وزگەرىستەردى, مەملەكەتتەردىڭ ەكونوميكالىق كۇش-قۋاتىنا قاتىس­تى جانە حالىقارالىق ەكونومي­كا­لىق ىنتىماقتاستىق جولىندا ورىن الىپ وتىرعان تۇبەگەيلى بەتبۇرىس­تار اياسىنداعى ەكونوميكانىڭ جا­ھاندانۋ ءۇردىسىن, سونىمەن قاتار, جاھاندىق قارجىلىق-ەكونو­مي­كا­لىق داعدارىستىڭ ەكونوميكالىق ءوسىپ-وركەندەۋگە تيگىزىپ وتىرعان كەرى اسەرلەرىن ەسكەرە وتىرىپ, الەم­دىك قاۋىمداستىق ەلدەرىن اتال­عان ماسەلەلەردى كوپجاقتى ءوزارا ءىس-قيمىلدار ەڭ الدىمەن, بارلىق مەملەكەتتەرگە دەربەس تەڭدىكتى كەپىلدەندىرەتىن بۇۇ ارقىلى بىرىگىپ شەشۋگە شاقىردى. الەم پارلامەنتتەرىنىڭ باس­شى­لارى قازىرگى زامانعى جاعدايلاردا زاڭ شىعارۋشى ورگاندار ءوز قىزمە­تىن­دە اشىق, وكىلدى, قولجەتىمدى ءارى ءتيىمدى بولىپ, ساياسي قىزمەتكە قو­عامنىڭ سان الۋان وكىلدەرىنىڭ قا­تىسۋىنا دانەكەر بولۋى كەرەك دەپ ەسەپتەيدى. وسى تۇرعىدا, حالىق­ارا­لىق ىنتىماقتاستىق ۇردىسىنە پار­لا­مەنتتەردىڭ كەڭىنەن قاتىسۋىن قامتاماسىز ەتۋ قاجەتتىگى اتاپ ءوتىلدى. توراعالار پارلامەنتتەر حا­لىقارالىق كەزدەسۋلەرگە جانە ولاردى باقىلاۋعا بەلسەنە قاتىسۋى, ۇكىمەتتەر قابىلداعان مىندەتتەمە­لەردىڭ جۇزەگە اسىرىلۋىن قاداعالاۋ ارقىلى, كەڭىنەن جوسپارلاعاندا, حالىقارالىق نورمالار مەن زاڭدى­لىق قاعيداتتارىنىڭ ۇلتتىق دەڭ­گەيدەگى ساقتالۋىن قامتاماسىز ەتۋگە ۇلەس قوسا وتىرىپ, حالىق­ارالىق ىستەرمەن بەلسەنە اينالىسۋى ءتيىس دەپ سانايدى. قۇجاتتا سونداي-اق, ايماقتىق پارلامەنتتەردىڭ ماڭىزدىلىعى جانە ولاردىڭ حالىقارالىق ىنتى­ماقتاستىققا قوسىپ وتىرعان ۇلەستەرى اتاپ وتىلگەن. دەكلاراتسيادا ەڭ امبەباپ, وكىلدى ءارى بەدەلدى حالىقارالىق ۇيىم بولىپ تابىلاتىن بۇۇ مەن بىرەگەي جاھاندىق پارلامەنتتىك قۇرىلىم – پارلامەنتارالىق وداق ءۇشىن جالپىعا بىردەي يگىلىك ءمۇد­دە­سىنە وراي جاھاندىق دەموكراتيالىق ەسەپ بەرۋ مەن جاۋاپكەرشىلىكتى قام­تاماسىز ەتۋ ماقساتىنداعى ءوزارا ءىس-قيمىلداردى جەتىلدىرۋگە باعىت­تال­عان ناقتى ۇسىنىمدار قاراس­تى­رىلعان.