ەلىمىز ءوز تاۋەلسىزدىگىن العالى بەرى قۋاتتى مەملەكەت رەتىندە قالىپتاسىپ, الەمنىڭ الدىڭعى قاتارلى ەلدەرىنىڭ ساپىنا ەنۋ جولىندا تالاي بەلەستەردى باعىندىردى. تامىرى تەرەڭگە بويلاعان ءتول تاريحىمىزدىڭ جاڭا بەتتەرى اشىلدى. وسى قىسقا عانا ۋاقىت ىشىندە ەكونوميكالىق جانە الەۋمەتتىك ماڭىزى زور جوبالاردى قولعا الىپ, الەمدىك دەڭگەيدەگى ءىس-شارالاردىڭ وتۋىنە دە ۇيىتقى بولا الدىق. ەڭ باستىسى, دامۋ باعىتىمىز ايقىندالا ءتۇستى. استانادا وتەتىن ەكسپو-2017 حالىقارالىق كورمەسىنە «بولاشاق ەنەرگياسى» تاقىرىبى تاڭداپ الىنعانى بەلگىلى. قالاي دەسەك تە, ەكسپو سياقتى حالىقارالىق كورمەلەرگە قاتىسۋ قاي ەلدىڭ بولسا دا الەۋەتىن دۇنيەجۇزىنە پاش ەتۋگە بەرىلگەن كەرەمەت مۇمكىندىك. وسىعان وراي جاقىندا م.ح. دۋلاتي اتىنداعى تاراز مەملەكەتتىك ۋنۆەرسيتەتىندە «ەكسپو-2017 – جاستار كوزىمەن» اتتى كورمە ۇيىمداستىرىلىپ, جاس عالىمدار جاڭا جوبالارىمەن تانىستىردى.
وڭىرلەر اراسىندا «جاسىل ەكونوميكاعا» قاتىستى جوبالاردى جۇزەگە اسىرۋدا جامبىل وبلىسى الدا تۇر. مۇنى سوڭعى جىلدارى اۋليەاتا جەرىندە ەلەكتر قۋاتىن جاڭارتىلعان نەمەسە بالاما كوزدەردەن ءوندىرۋ بويىنشا ىسكە اسىرىلىپ جاتقان اۋقىمدى جوبالاردان بايقايمىز. ولاردىڭ قاتارىندا شۋ اۋدانىنداعى تاسوتكەل سۋ ەلەكتر ستانساسى دا بار. بۇعان دەيىن وبلىستا كۇن جانە جەل ەلەكتر ستانسالارى پايدالانۋعا بەرىلگەن بولاتىن. شۋ اۋدانىندا قۋاتى 9,2 مۆت قۇرايتىن گيدروەلەكتر ستانساسى حالىققا ءمىنسىز قىزمەت كورسەتۋدە. ستانسانىڭ قۋاتى 95 مىڭ حالقى بار شۋ اۋدانىمەن قوسا تاعى ءبىر اۋداندى جارىقپەن قامتاماسىز ەتۋگە تولىق جەتەدى.
قازاقستاندا العاشقى ونەركاسىپتىك دەڭگەيدە جۇمىس ىستەيتىن كۇن ەلەكتر ستانساسى دا جامبىل وبلىسىنىڭ قورداي اۋدانى اۋماعىندا ىسكە قوسىلعان. بۇگىندە 504 كۆت ەلەكتر قۋاتىن ءوندىرىپ وتىرعان ستانسا بولاشاقتا ەلەكتر قۋاتىن 7 مۆت-عا دەيىن جەتكىزۋدى جوسپارلاپ وتىر. كاسىپورىن تولىققاندى جۇمىس ىستەگەندە 70 ادامدى جۇمىسپەن قامتاماسىز ەتىپ, 200-دەن استام ۇيگە جارىق بەرەدى. ءدال وسى قورداي اۋدانىندا ەكى بىردەي جەلدەن ەنەرگيا وندىرەتىن ەلەكتر ستانساسى بار. جەلدەن قۋات كوزىن ءوندىرۋ جۇمىسى سۋ مەن كۇنگە قاراعاندا الدە قايدا ارزان. قازىردىڭ وزىندە 1 500 كۆت قۋات كوزىن ءوندىرىپ وتىرعان جەل ەلەكتر ستانساسى قازاقستانداعى جەلدەن ەنەرگيا الاتىن تۇڭعىش ەلەكتر ستانساسى بولىپ سانالۋدا. سونىمەن قاتار, جۋالى اۋدانىنداعى كۇن ەلەكتر ستانساسىنىڭ قۇرىلىسى وبلىسىمىزداعى يندۋستريالاندىرۋ كارتاسىنا ەنگىزىلگەن توعىز جوبانىڭ ءبىرى. ستانسا تولىق قۋاتىندا جۇمىس ىستەگەندە ايماقتىڭ ەنەرگياعا دەگەن قاجەتتىلىگىنىڭ ەداۋىر بولىگىن وتەيتىن بولادى. اتالعان جوبالاردىڭ قىزمەتىمەن ەكسپو-2017 كورمەسىنە كەلەتىن شەتەلدىك قوناقتار دا تانىساتىن بولادى.
«مىنە, وسىنداي جەتىستىكتەر باردا ءبىزدىڭ جاستارىمىزعا عىلىممەن اينالىسۋعا مۇمكىندىك مول دەپ ەسەپتەيمىن. ەلباسى نۇرسۇلتان نازارباەۆ بۇگىندە ەنەرگەتيكاعا اۋقىمدى ينۆەستيتسيا سالۋ بۇكىل الەم ءۇشىن وتە ماڭىزدى ماسەلە بولىپ تابىلاتىنىن اتاپ وتكەن بولاتىن. وبلىس جاستارىنىڭ عىلىمعا قىزىعۋشىلىعىن تۋدىرۋ جانە دارىندىلاردى انىقتاۋ, ولارعا قولداۋ كورسەتۋ ماقساتىندا ۇيىمداستىرىلىپ وتىرعان «ەكسپو-2017 – جاستار كوزىمەن» اتتى كورمە جاس ۇرپاقتىڭ يننوۆاتسيالىق جوبالارىنا ارنالىپ وتىر», دەيدى بۇل جونىندە جامبىل وبلىسى اكىمىنىڭ ورىنباسارى ەرقانات مانجۋوۆ.
كورمەگە «ۇزدىك كورمە ەكسپوناتى» («جاسىل ەكونوميكا» جانە ءداستۇرلى ەمەس ەنەرگيا كوزدەرى تاقىرىبى بويىنشا), «ۇزدىك يننوۆاتسيالىق جوبا» اتالىمدارى بويىنشا 14 پەن 35 جاسقا دەيىنگى وبلىسىمىزدىڭ جاس عالىمدارى قاتىسىپ, كورمە بارىسىندا «زاماناۋي كومپرەسسور جانە مۇناي ايداۋ بەكەتتەرى», «جەل ەنەرگەتيكالىق قوندىرعى», «قولجەتىمدى دايىن باسپانا», «وسىمدىك قالدىقتارىنان بيوەتانول ءوندىرۋ», «اۋىلدىق جەرلەردە بالامالى ەنەرگيا كوزدەرىن قولدانۋ», «يون» اپپاراتىن جاساۋ», «كۇننىڭ ەنەرگياسىن پايدالانا وتىرىپ جىلىجايدا بانان ءوسىرۋ», «تۇرعىن ءۇي عيماراتتارىنىڭ ەلەكتر تارتىلىمدارى مەن جارىقتاندىرىلۋى» جانە تاعى دا باسقا جوبالار قويىلدى.
«بۇعان دەيىن كورمەنىڭ ىرىكتەۋ كەزەڭى ءوتىپ, وعان جاس عالىمداردان 35 جوبا كەلىپ ءتۇسىپ, ارنايى قۇرىلعان ساراپتامالىق كوميسسيانىڭ ساراپتاۋىنان كەيىن اقتىق كەزەڭگە 23 جوبا جولداما الدى. قاتىسۋشىلاردىڭ بارلىعى دا تىڭ يدەيالارىمەن ەرەكشەلەنەدى. ەلباسى جولداۋىندا ايتىلعان زاماناۋي عىلىمدى كوممەرتسيالاندىرۋ دا وسى جوبالاردان باستاۋ الادى. اتالمىش كورمە وزىق تەحنولوگيالىق جوبالاردى ءتۇرلى كاسىپورىندار مەن شارۋاشىلىق ءجۇرگىزۋشى سۋبەكتىلەرگە قولداۋ كورسەتۋ ماقساتىن كوزدەپ وتىر», دەيدى جامبىل وبلىستىق جاستار ساياساتى باسقارماسىنىڭ باسشىسى ەركەبۇلان قۇرالباەۆ.
كورمە قورىتىندىسى بويىنشا ءبىرىنشى ورىندى م. ح. دۋلاتي اتىنداعى تارمۋ وقىتۋشىسى روللان ءنۇسىپالى يەلەنسە, ودان كەيىنگى جۇلدەلى ورىنداردى تاعى وسى وقۋ ورنىنىڭ اعا وقىتۋشىسى بەكجان ابزالبەك ۇلى, نازارباەۆ زياتكەرلىك مەكتەبىنىڭ وقۋشىلارى ت.اجماحانبەتوۆ, ا.مۇرزاەۆ, ر.كاريموۆ, جۋالى اۋدانى, قوشقاراتا اۋىلى, اباي اتىنداعى مەكتەپتىڭ مۇعالىمى ايگەرىم ءاشىرباەۆا, «قازاقتەلەكوم» اق وبلىستىق فيليالىنىڭ جەتەكشى مامانى ن.تىلەگەنوۆ پەن تارمۋ ستۋدەنتى ب.كەمپىرباەۆ ءبولىستى.
«تەگىندە ادام بالاسى ادام بالاسىنان اقىل, عىلىم, ار, مىنەز دەگەن نارسەلەرىمەن وزادى», دەپ اباي اتامىز ايتقانداي ەل عىلىمىنىڭ بولاشاعى جاستار. جاستاردىڭ ءبىلىمى, تاجىريبەسى, قارىمدى ازاماتتىق كوزقاراسى مەملەكەتىمىزدىڭ زياتكەرلىك الەۋەتىن ارتتىرۋعا ىقپال ەتەرى ءسوزسىز. عىلىم سالاسى قاجىرلى قايرات پەن تەمىردەي توزىمدىلىكتى تالاپ ەتەدى. سوندىقتان وزدەرىنىڭ التىن ۋاقىتىن وسى جولدا سارپ ەتىپ جۇرگەن جامبىلدىق جاستاردىڭ شىعارماشىلىق ويلارى تابىستى بولا بەرگەي!
ورالحان ءداۋىت,
«ەگەمەن قازاقستان».
جامبىل وبلىسى.
