ەلباسى ۆەنگريا پرەمەر-ءمينيسترىن قابىلدادى

استانا. 1 ءساۋىر. بۇگىن قازاقستان پرەزيدەنتى نۇرسۇلتان نازارباەۆ ەلىمىزگە رەسمي ساپارمەن كەلگەن ۆەنگريا پرەمەر-ءمينيسترى ۆيكتور ورباندى قابىلدادى. بۇل تۋرالى اقوردانىڭ ءباسپاسوز قىزمەتىنە سىلتەمە جاساعان egemen.kz ءتىلشىسى حابارلادى. كەزدەسۋ بارىسىندا تاراپتار ەكى ەلدىڭ ءوزارا ىقپالداستىعىنىڭ كەڭ اۋقىمداعى ماسەلەلەرىن, سونداي-اق حالىقارالىق كۇن تارتىبىندەگى وزەكتى جايتتاردى تالقىلادى. مەملەكەت باسشىسى قازاقستان مەن ۆەنگريا حالىقتارىنىڭ تاريحي تۇرعىدان جاقىندىعىنا توقتالىپ ءوتتى. «ءبىز ۆەنگريانى ناعىز دوسىمىز دەپ سانايمىز. ەلدەرىمىزدىڭ تاريحي تامىرى ورتاق جانە دامۋ جولدارى ۇقساس. ۆەنگريا – ءبىز ءۇشىن ەۋروپاداعى ماڭىزدى تىرەك سانالاتىن ەل», – دەدى نۇرسۇلتان نازارباەۆ. قازاقستان پرەزيدەنتى ەكى ەل ىنتىماقتاستىعى دامۋىنىڭ ۇدەمەلى قارقىنىنا نازار اۋداردى. «بۇل ءبىزدىڭ ءبىرىنشى كەزدەسۋىمىز ەمەس. بۇل بايلانىستار ءبىزدىڭ ساۋدا-ەكونوميكالىق قارىم-قاتىناستاردى نىعايتۋعا ىقىلاستى ەكەنىمىزدى كورسەتەدى. ءبىز ۆەنگريانىڭ ەۋروپا وداعى ەلدەرى اراسىنان العاشقىلاردىڭ ءبىرى بولىپ قازاقستانمەن ستراتەگيالىق سەرىكتەستىك تۋرالى كەلىسىمگە قول قويعانىن جوعارى باعالايمىز. ءسىزدىڭ ساپارىڭىز ناتيجەلى بولۋى, ىنتىماقتاستىعىمىزدىڭ ناقتى باعىتتارى بويىنشا ۋاعدالاستىقتارعا قول جەتكىزىلۋى ءۇشىن ءبىز قاجەتتى كۇش-جىگەرىمىزدى جۇمسايتىن بولامىز», – دەدى مەملەكەت باسشىسى. ۆيكتور وربان ءوز كەزەگىندە قازاقستان پرەزيدەنتىنە ەلگە شاقىرۋ ءۇشىن ريزاشىلىق ءبىلدىرىپ, ۆەنگر حالقىنىڭ سالەمىن جەتكىزدى. «الەمدەگى كۇردەلى احۋال جاعدايىندا ءبىز ءسىزدىڭ بۇدان ارعى ىنتىماقتاستىعىمىزدىڭ پەرسپەكتيۆالارى جونىندەگى پىكىرىڭىزدى بىلۋگە مۇددەلىمىز. قازاقستان ەۋروپا وداعىندا ونىڭ ءبىزدىڭ ەل سياقتى سەنىمدى دوسىنىڭ بار ەكەنىنە سەنۋىنە بولادى. بۋداپەشتە ءبىز استانا كوشەسىن اشقانىمىزدى جەتكىزگىم كەلەدى. ءبىز ساياسي جانە مادەني بايلانىستارىمىز ءتيىستى دەڭگەيدە دەپ سانايمىز, ونىڭ ار جاعىندا ءسىزدىڭ قولداۋىڭىزدىڭ تۇرعانىن دا سەزىنىپ وتىرمىز», – دەدى ۆەنگريا پرەمەر-ءمينيسترى. ۆيكتور وربان سونداي-اق نۇرسۇلتان نازارباەۆتىڭ پرەزيدەنت سايلاۋىنا قاتىسۋ تۋرالى شەشىمى قازاقستاننىڭ بولاشاقتاعى تۇراقتىلىعىن دا قامتاماسىز ەتۋدىڭ كەپىلى ەكەنىن ايتتى. وسىعان بايلانىستى ۆەنگريا پرەمەر-ءمينيسترى ءوز ەلىنىڭ اتىنان مەملەكەت باسشىسىنا زور تابىس تىلەدى. مۇرات ايتقوجا.