تۇركىستاندا بوكستان ءداستۇرلى ساتتارحانوۆ ءتۋرنيرى باستالدى

شىمكەنت. 1 ءساۋىر. بۇگىن وڭتۇستىك قازاقستان وبلىسى تۇركىستان قالاسىندا 2000 جىلى سيدنەيدە وتكەن XXVII جازعى وليمپيادا ويىندارىنىڭ جەڭىمپازى بەكزات ساتتارحانوۆتى ەسكە الۋعا ارنالعان جاستار اراسىنداعى XIV حالىقارالىق تۋرنير باستالدى. بۇل تۋرالى وبلىستىق اكىمدىكتىڭ ءباسپاسوز قىزمەتىنىڭ دەرەگىنە سۇيەنگەن egemen.kz ءتىلشىسى حابارلادى. «اتالعان تۋرنيرگە قىتاي, رەسەي, موڭعوليا, قىرعىزستان, تاجىكستان, ازەربايجان, وزبەكستان ەلدەرى مەن قازاقستاننىڭ بارلىق وبلىستارىنان 200-گە جۋىق جاس سپورتشىلار قاتىسۋدا. سونىمەن بىرگە, 13 سالماق دارەجەسى بويىنشا وتەتىن بۇل سايىستىڭ ەرەكشەلىگى 3 سالماق دارەجەسى بويىنشا قىزدارىمىز دا باق سىنايتىن بولادى», - دەلىنگەن حابارلامادا. جىل سايىن داستۇرگە اينالعان حالىقارالىق تۋرنير بيىل ەرەكشە ءسان سالتاناتىمەن باستاۋ الدى. ەر بەكزاتتىڭ ومىرىندەگى ايتۋلى كۇندەردىڭ قۇرمەتىنە وراي, ۇيىمداستىرىلعان جارىستىڭ اشىلۋ سالتاناتى ق.ا.ياسساۋي اتىنداعى حالىقارالىق قازاق-تۇرىك ۋنيۆەرسيتەتىنىڭ مادەنيەت سارايىندا ءوتتى. جاستار اراسىنداعى حالىقارالىق سايىستى رەسمي تۇردە وبلىس اكىمىنىڭ ورىنباسارى ساكەن قانىبەكوۆ اشىپ, بارلىق سپورتشىلارعا ساتتىلىك تىلەدى. بۇدان سوڭ تۇركىستان قالاسىنىڭ اكىمى الىپبەك وسەرباەۆ, وليمپيادا جەڭىمپازدارى سەرىك ساپيەۆ, باقىت سارسەكباەۆ جۇرت الدىندا يگى تىلەكتەرىن ءبىلدىرىپ, ب.ساتتارحانوۆتىڭ اتا-اناسىنا سىي-سياپات جاساپ, قۇرمەت كورسەتتى. جارىستىڭ اشىلۋ سالتاناتىندا تۇڭعىش وليمپيادا جەڭىمپازى بەكزات ساتتارحانوۆقا ارنالعان فيلم كورسەتىلىپ, بەلگىلى ايتىسكەر اقىن بەارىس شويبەكوۆ باستاعان ءبىر توپ ونەر جۇلدىزدارى مەن جەرگىلىكتى ونەرپازداردىڭ كونتسەرتىنە ۇلاستى. تۋرنير بەكزات ساتتارحانوۆتىڭ تۋعان كۇنى - 4 ءساۋىر كۇنى ءوزىنىڭ مارەسىنە جەتەدى. باقتيار تايجان. مانبە, سۋرەت: وڭتۇستىك قازاقستان وبلىستىق اكىمدىگى.