گاودا تۋريستەرگە سۇيىسۋگە تىيىم سالىنادى

استانا. 1 ءساۋىر. ءۇندىستاننىڭ گاو شتاتىنداعى سالۆادور-دە-مۋندو دەرەۆنياسىندا كوپشىلىك ورىنداردا سۇيىسۋگە تىيىم سالىندى. بۇل تۋرالى Redigo.ru  حابارلادى. اتالمىش جاڭا ءتارتىپتى جەرگىلىكتى تۇرعىندار ويلاپ تاپتى. ولار مۇندا الەمنىڭ ءار تۇكپىرىنەن كەلىپ تىنىعۋشىلار تاراپىنان مۇنداي «ادەپسىز» قىلىقتاردىڭ جاسالۋىنا توزبەيتىندەرىن جەتكىزىپ, وسىنداي باستاما كوتەردى. ال جەرگىلىكتى پارلامەنت ءوزىنىڭ كەزەكتى وتىرىسىندا وزدەرىنىڭ كوز الدارىندا ءسۇيىسىپ تۇرعانداردى كورگىلەرى كەلمەگەن جەرگىلىكتى تۇرعىنداردىڭ وتىنىشىنە بىردەن قۇلاق استى. ءسويتىپ, ءبىر اۋىزدان قولداۋ نەگىزىندە ءتيىستى قارار قابىلداندى. الايدا, بۇل ءتارتىپتى بۇزعاندارعا ناقتى قانداي جازا قولدانىلاتىنى ازىرگە بەلگىسىز. سوعان قاراماستان, دەرەۆنياداعىلار وسى جاڭا ءتارتىپتى ۋاعىزداپ, تۋريستەردىڭ قاپەرلەرىنە سالاتىن باننەرلەردى جاپپاي ءىلىپ تاستادى. دەگەنمەن, ماماندار قازىردىڭ وزىندە قابىلدانعان جاڭا شارانىڭ جەرگىلىكتى كۋرورتتىڭ يميدجىنە زيانىن تيگىزە باستاعانىن دا جاسىرمي ايتىپ وتىر. گاو – ءۇندىستاننىڭ ەڭ شاعىن شتاتى. بىراق سوعان قاراماستان, ول ەلدىڭ باس كۋرورتى بولىپ سانالادى. بۇرىن بۇل ماڭايدا ءبارى دە بولعان ەكەن. جاعاجايلارىنىڭ كوپتىگى جاعىنان دا بۇل جەرگە تەڭدەسەتىن ايماق جوق. سولاردىڭ اراسىندا نۋديستەردىڭ جايىلا ءجۇرىپ, سۋعا تۇسەتىن جاعاجايلارى دا وسى ماڭدا ورنالاسقان. مۇندا كەزىندە الەمنىڭ ءار قيىرىنان نەبىر sex-سيمۆولدار كەلەتىن بولعان. وسىنىڭ ءبارى تۋريستەردىڭ مىڭ-مىڭداپ كەلىپ جاتۋىن قامتاماسىز ەتىپ تۇرعان. مۇرات ايتقوجا. مانبە, سۋرەت: نتۆ.