ءوزارا ارىپتەستىك كورىنىسى

استانادا بۇۇ ەسىرتكى مەن قىلمىسقا قارسى كۇرەس جونىندەگى باسقارماسىنىڭ ۇيىتقى بولۋىمەن 3 كۇنگە سوزىلاتىن وڭىرلىك سەمينار ءوتىپ جاتىر. دۇنيە ءجۇزىنىڭ كوپتەگەن ەلىن تولعاندىرعان ماسەلەنى وزەك ەتكەن بۇل سەمينارعا كانادا مەن يتاليا ۇكىمەتتەرى قارجىلاي قولداۋ كورسەتىپ وتىر. “قىلمىسقا قارسى كۇرەستەگى حالىقارالىق ارىپتەستىك” اتتى سەميناردىڭ باستى ماقساتى – حالىقارالىق ارىپتەستىك نەگىزىندە اتالعان ماسەلەنى جان-جاقتى تال­قىلاپ, سۇزگىدەن وتكىزۋ. سەمينارعا يران, قازاقستان, قىرعىزستان, پاكستان, تاجىكستان, تۇركى­مەن­ستان, وزبەكستان سەكىلدى مەم­لەكەتتەر مەن اۋعانستان جانە وعان شەكارالاس ەلدەر وكىلدەرى قاتىسىپ, كوپتى الاڭداتقان ەسىرتكى ساۋدا­سى­مەن جانە ەسىرتكى ساۋداسى قىل­مى­سىمەن كۇرەس ماسەلەلەرىنىڭ ءتۇيىنىن شەشۋ­دىڭ ءتيىمدى جولىن قاراس­تىرۋعا تى­رىستى. اۆستراليا, ەۋرو­وداق ەلدەرى, اقش, ۇلىبريتانيا, رەسەي مامان­دارى دا كۇن تارتىبىنە قويىلعان ماسەلەلەر توڭىرەگىندە ءوز ويلارىن تارقاتتى. ءبىر اتاپ وتەرلىگى, بۇل سەمينار بۇۇ ەسىرتكى مەن قىلمىسقا قارسى كۇرەس باسقارماسىنىڭ 2010-2013 جىلدار ارالىعىن كوزدەيتىن ءوڭىر­لىك باعدارلاماسى نەگىزىندە قولعا الىنعان. ال بۇل باعدارلامانىڭ نە­گىزگى وزەگى – اۋعانستان مەن شەكا­رالاس ەلدەر باسىنداعى اۋىر جاع­داي. اۋقىمدى باسقوسۋ بارىسىندا وعان قاتىسۋشىلار 2008 جىلى استانادا جانە 2009 جىلى الما­تىدا ەقىۇ مەن بۇۇ ەسىرتكى قىلمىسىنا قارسى كۇرەس باس­قار­ماسىنىڭ تىكەلەي قول­داۋىمەن ۇيىم­داستىرىلعان ەكى وڭىرلىك ءبىر­لەسكەن شارالاردا قابىلدانعان سا­راپتامالىق ۇسى­نىمداردى نەگىزگە الىپ, ولاردى كوپتىڭ تالقىسىنا سالدى. تاعى ءبىر ايتا كەتەرلىگى, 3 كۇنگە سوزىلاتىن جيىن اياسىندا قۇقىق سالاسىندا جۇرگەن جانە قىلمىسقا قارسى كۇرەس ماسەلەلەرىن ءبىر جۇيەگە كەلتىرۋدى ماقسات تۇتقان ماماندار ورتالىق ازيا ءوڭىرىنىڭ وزگەشە­لىك­تەرى نەگىزىندە وزدەرىنىڭ قىلمىستىق سوت سالاسىنداعى ۇلتتىق جۇيە­لەرى­نىڭ الەۋەتىن ارتتىرۋعا مۇمكىندىك الماق. سونداي-اق, مۇنداي باستا­مالار ۇلتتىق جانە حالىقارالىق قۇ­قىقتىڭ ارىپتەستىك تەتىگىن نى­عايتۋعا, ورتالىق ازيا ءوڭىرى مەن وزگە دە ەلدەردەگى تەرگەۋ ورگاندارى مەن ورتالىق بيلىكتىڭ اراسىنداعى اقپارات الماسۋدى جاقسارتۋعا دا سەپ بولماق. سەمينار كەزىندە سالا مامان­دارى كەزەكتى باسقوسۋدى كەلەسى توقساندا ءوت­كى­زىپ, وندا كەزەك كۇتتىرمەيتىن ناق­تى­لى ماسە­لەلەردى تالقى تارازىسىنا سالۋ قاجەتتىگىن اتاپ ءوتتى. ءلايلا ەدىلقىزى.