ەلباسى تۋرالى ەرەن كىتاپ

ەلباسى بەدەلى – ەل بەدەلى. وسى تۇرعىدان قا­راعاندا, بۇل كۇندەردە ءبىز ەل بەدەلىن بيىك­تەتەتىن تاعى ءبىر مەرەيلى وقيعاعا كۋا بولعالى تۇرمىز. ماسكەۋدىڭ «مەجدۋنارودنىە وتنوشەنيا» باسپاسىنان رەسەيلىك بەلگىلى جازۋشى سەرگەي پلەحانوۆتىڭ نۇرسۇلتان نازارباەۆتىڭ ومىرىنە ارنالعان «جىبەكتەي ەسىلمەگەن جول» («نە ششەلكوۆىي پۋت») اتتى كىتابى جارىق كوردى. كىتاپتىڭ اننوتاتسياسىندا بىلاي دەلىنگەن: «تاۋەلسىز قازاقستاننىڭ تۇڭعىش پرەزيدەنتىنىڭ قالىپتاسۋى كەڭەس وداعىنىڭ وركەندەۋىمەن جانە قۇلدىراۋىمەن, جاڭا تاۋەلسىز مەملەكەتتەردىڭ تۋىنداۋىمەن قوسا جۇرگەن وقيعالارمەن بايلانىستىرا بەرىلگەن. نۇرسۇلتان نازارباەۆتىڭ ءومىرى مەن ەڭبەك جولى كوپ جاعدايدا بۇرىنعى ساياسي جۇيەنى جاڭعىرتۋدى قولداعان كەڭەس باسشىلىعىنىڭ سول كەزدەگى توپتارىنا ءتان. بىراق قايتا قۇرۋ كەزەڭىندەگى كوپتەگەن رەفورماتورلارعا قاراعاندا نازارباەۆ و باستان كۇيرەتۋگە ەمەس, جاسامپازدىققا باعىت ۇستاندى. ەلدە ورنىقتى تاتۋلىق پەن تۇراقتىلىقتى قامتاماسىز ەتە وتىرىپ, ول قازىرگى زامانعى تابىستى مەملەكەتتى قۇردى. كسرو-نىڭ بۇرىنعى رەسپۋبليكالارىمەن تىعىز بايلانىستاردى ساقتاي وتىرىپ, قازاقستان شىعىستىڭ جانە باتىستىڭ شەشۋشى ەلدەرىمەن ءوزارا ءتيىمدى ارىپتەستىك قارىم-قاتىناستار ورناتا ءبىلدى. سەمەي يادرولىق پوليگونىنىڭ جابىلۋى جانە حالىقارالىق بەيبىتشىلىك جولىنداعى باستامالارداعى نازارباەۆتىڭ ءرولى ونى قازىرگى زاماننىڭ بەلگىلى جانە بەدەلدى ساياسي قايراتكەرىنە اينالدىردى. ورىس جازۋشىسى سەرگەي پلەحانوۆتىڭ نۇرسۇلتان نازارباەۆ تۋرالى – ادام جانە ساياساتكەر تۋرالى – كىتابىمەن «مەجدۋنارودنىە وتنوشەنيا» باسپاسى «ميروۆىە ليدەرى» سەرياسىن اشىپ وتىر». بۇگىن ماسكەۋدە اتالعان كىتاپتىڭ تۇساۋ­كەسەرى وتەدى. سوعان وراي «ەگەمەن قازاقستان» گازەتى س.پلەحانوۆتىڭ «جىبەكتەي ەسىلمەگەن جول» اتتى 480 بەتتىك كىتابىنان الىنعان كەيبىر ءۇزىن­دىلەردى گازەتتىڭ 6-بەتىندە وقىرماندار نازارىنا ۇسىنىپ وتىر. كىتاپ تۇساۋكەسەرىنىڭ قالاي وتكەنى, ەلبا­سىمىز جايىنداعى جاڭا ەڭبەكتىڭ رەسەيدىڭ زيالى قاۋىمىنا قالاي اسەر ەتكەنى تۋرالى ماسكەۋگە ارنايى جىبەرىلگەن ءتىلشىمىزدىڭ تاياۋ كۇندەردە جاريالاناتىن ماقالاسىنان وقي الاسىزدار.