ەنەرگيا باعاسىن تومەندەتتى

جالپى, ەكىباستۇزداعى بولات نۇرجانوۆ اتىنداعى گرەس-1  ستانسانىڭ جوبالاۋ قۋاتى 4 000 مۆت بولاتىن كوندەنساتتىق تيپتەگى اسا ءىرى جىلۋ ەلەكتر ستانساسى سانالادى. وتكەن جىلى ەلەكتر ەنەرگياسىن ءوندىرۋ 14,1 ملرد. كۆت/ساعاتقا جەتتى. 2014 جىلعى ساۋىردەن باستاپ «ەكىباستۇز 1-ماەس» اق-تىڭ 100 پايىز قاتىسۋ ۇلەسىنە ەلىمىزدەگى «سامۇرىق-ەنەرگو» اق يە بولدى. – ستانسادا شەكتى تاريفتەر باعدارلاماسى بويىنشا سوڭعى بەس جىل ىشىندە جابدىقتاردى جاڭعىرتۋ, قورشاعان ورتاعا تيگىزەتىن اسەردى ازايتاتىن وزىق تەحنولوگيالاردى ەندىرۋ, بويىن­شا جوبالار ىسكە اسىرىلدى. «سامۇرىق-ەنەرگو» اق ەلىمىز ەكونوميكاسىنىڭ دامۋىنا ىقپال ەتە وتىرىپ, تاريفتەردى تومەندەتۋ جانە تۇتىنۋشىلارىمىزعا قول­داۋ كورسەتۋ تۋرالى وسىنداي شەشىم قابىلدادى, – دەيدى ستان­سانىڭ باس ديرەكتورى رىسقان سۆامباەۆ. ءسويتىپ, الىپ ستانسا اقپان ايى­نان باستاپ ەلەكتر ەنەرگياسىن بوساتۋ باعاسىن 1 كۆت/ساعات ءۇشىن 8,65 تەڭگەگە دەيىن  ازايتتى.  2015  جىلعا ەكىباستۇز گرەس-1 ءۇشىن بەكىتىلگەن تاريف مولشەرى كۆت/ساع. ءۇشىن 8,8 تەڭگەنى قۇرايدى. ال, بۇل كۇندەرى «ينۆەستيتسياعا الماس­تىراتىن تاريف» قاعيداتى بو­يىنشا 2009 جىلدان باستاپ ستانسا جوبالىق قۋاتىن 4 000 مۆت-عا دەيىن ارتتىردى. «ستانسانى قايتا قۇرۋ جانە كەڭەيتۋ» جوباسى ىسكە اسىرىلۋدا. 2012 جىلى قۋاتى 500 مۆت قايتا قالپىنا كەلتىرىلگەن № 8 ەنەرگيا بلوگى پايدالانۋعا بەرىلدى. وتكەن جىلى قالپىنا كەلتىرىلگەن №2 ەنەرگيا بلوگى دا (500 مۆت) جەلىگە قوسىلدى. قازىرگى كەزدە ىسكە قوسۋ مەرزىمى 2017 جىل دەپ بەلگىلەنگەن №1 ەنەرگيا بلوگى بويىنشا (قاۋاتى 500 مۆت) جۇمىستار جۇرگىزىلۋدە. شەكتى تاريفتەر ەسەبىنەن بارلىق جۇمىس ىستەپ تۇرعان ەنەرگيا بلوكتارىندا ەلەكتر سۇزگىلەرىن ورناتۋ بويىنشا جوبالار ىسكە اسىرىلدى. وتىن بەرۋ جۇيەسىن جانە جالپى ستانسا جابدىقتارىن جاڭعىرتۋ باستالدى. 2009 جىلدان باستاپ گرەس-1 ستانساسىنا شەكتى تاريفتەر باعدارلاماسى اياسىندا 202 ملرد. تەڭگەدەن استام ينۆەستيتسيا سالىندى. بيىل قارجىلاندىرۋ كولەمى 53 ملرد. تەڭگەنى قۇرايدى. ستانسانىڭ پايدالاناتىن  نەگىزگى وتىنى ەكىباستۇزدىڭ تاس كومىرى ەكەنى بەلگىلى. وندىرىلگەن ەلەكتر ەنەرگياسىنىڭ باسىم بولىگى ەلىمىزدىڭ ەنەرگەتيكالىق نارىعىنا شىعارىلادى. فاريدا بىقاي, «ەگەمەن قازاقستان». ەكىباستۇز.