دەمەۋشى

ەل ىشىندە كاسىپكەر كوبەيدى. ولاردىڭ ارقايسىسى ءار سالادان ءارتۇرلى تابىس تابادى. ارا­سىندا ەلدىڭ ونەرىن قولداۋعا قالتاسىنان قارجى شىعاراتىنى نەكەن-ساياق. دەسەك تە, جىل سايىن سۋرەتشىلەردى جاڭا تۋىندىلار جاساۋعا ىنتالاندىراتىن كا­سىپكەردىڭ ءبىرى – نۇربەرگەن ءداۋ­لە­توۆ. ونىڭ قوماقتى تابىس تۇسىرەتىن زاۋىتى دا, تسەحى دا جوق. نۇربەرگەننىڭ نەگىزگى كاسىبى – «اق جەلكەن» شىعارماشىلىق ورتالىعى ارقىلى قۇرالادى. سول ورتالىقتا قولونەر شەبەرلەرىنىڭ كورمەسىن ءجيى وتكىزەدى. قولونەر شەبەرلەرىنىڭ تۋىندىلارىن ناسيحاتتايتىن «التىن قايىق» اتتى گازەت شىعارادى. ارينە, بۇدان قوماقتى تابىس ءتۇسىرۋ مۇمكىن بولا قويماس. دەگەنمەن, ول 2011 جىلدان بەرى قولونەر شەبەرلەرىنىڭ اراسىنان تاڭدالعان ەڭ ۇزدىك تۋىندىعا «التىن قايىق» سىيلىعىن بەرىپ كەلەدى. بىلتىر ءبىر توپ ارىپتەستەرى اراسىنان ۇزدىك تۋىندىسىمەن دارالانعان باتىسقازاقستاندىق ەرعالي بەكەشوۆكە «التىن قايىق» ستاتۋەتكاسىمەن بىرگە 1 ميلليون تەڭگە قارجىلاي سىياقى بەردى. «التىن قايىق» اتالىمىنىڭ باس جۇلدەسى قايىق ۇستىندەگى قىز بەينەلەنگەن التىن ستاتۋەتكا. ونىڭ سالماعى – 976 گرامدى قۇرايدى جانە 24 كارات تازا التىنمەن  جالاتىلعان. وسى ستاتۋ­ەتكانىڭ يدەياسى «جەرۇيىق» مادە­نيەت ورتالىعى» قوعامدىق قورىنىڭ ديرەكتورى نۇربەرگەن داۋلەتوۆ پەن ونەرتانۋشى نۇرلان بەرماعامبەتتىڭ ورتاق پىكىرىنەن تۋىنداپتى. ستاتۋەتكانىڭ بەلگىلى ءمۇسىنشى سەرىك ماتەنيازوۆتىڭ قولىنان شىققان. نۇربەرگەننىڭ ايتۋىنشا, «التىن قايىق» سىيلى­عىن  بەرۋدەگى باستى ماقسات – بەينەلەۋ ونەرى مەن قولونەر شەبەرلەرىنىڭ شەبەرلىگىن ارتتىرۋ. ويتكەنى, «تاۋەلسىز ەلىمىزدىڭ تاريحى مەن  مادەنيەتىن الەمدىك دەڭگەيدە تانىتۋعا لايىقتى ۇلەس قوساتىنداردىڭ ءبىرى – سۋرەتشىلەر مەن قولونەر شەبەرلەرى. دەمەك, ولاردى ۇزدىك تۋىندىلار جاساۋعا ىنتالاندىرۋىمىز قاجەت قوي», دەيدى نۇربەرگەن داۋلەتوۆ. ۇلتتىق ونەردىڭ جاناشىرى­نا اينالعان نۇربەرگەن داۋلەتوۆ جاقىندا تاعى دا  ءبىر توپ سۋرەتشىلەر مەن قولونەر شەبەرىنىڭ باسىن قوسىپ, «التىن قايىق» جۇلدەسىن تاپسىرۋ ءراسىمىن وتكىزدى. وسى شاراعا وراي قالتاسىنان 1 ميلليون تەڭگە شىعارىپ, اتىراۋلىق ادىلقايىر جانتاسوۆقا «ۇزدىك كەسكىندەمەشى», باتىسقازاقستاندىق اسحات ابدەشوۆكە «ۇزدىك گرافيكا», باتىسقازاقستاندىق تولەپبەرگەن سارمانبەكوۆكە «ۇزدىك زەرگەرلىك بۇيىم», باتىسقازاقستاندىق ەرعالي بەكەشوۆكە «ۇزدىك ءمۇسىن», اتىراۋلىق نۇرسۇلتان قاليەۆقا «ۇزدىك قولونەر» اتالىمىنا, سونىمەن بىرگە, «جىل جاڭالىعى» جۇلدەسىنە يە بولعان ادىلقايىر جانتاسوۆقا ارنايى ديپلوم مەن ارقايسىسىنا 120 000 تەڭگەنىڭ   سەرتيفيكاتىن تابىستادى. ال باس جۇلدە – «التىن قايىق»   ستاتۋەتكا مەن 280 000 تەڭگەلىك قارجىلاي سىياقىعا باتىسقازاقستاندىق زەرگەر تولەپبەرگەن  سارمانبەكوۆ لايىق دەپ تابىلدى. ول بۇل كون­كۋرسقا التىن جالاتىلعان ساۋكە­لەنى ۇسىنعان ەكەن. «مەن بۇعان دەيىن وسى كونكۋرسقا ەكى رەت قاتىسقان ەدىم. ەندى, مىنە, ءۇشىن­شى جىلى «التىن قايىق» جۇلدە­سىن الدىم. ەڭبەگىم جاندى», دەپ ءوز قۋانىشىمەن ءبولىستى زەرگەر ت.سارمانبەكوۆ. نۇربەرگەن داۋلەتوۆتىڭ ونەردى قولداۋى مۇنىمەن شەكتەلمەيدى. بۇدان ءۇش جىلداي  بۇرىن «سارايشىقتان استاناعا دەيىن» دەپ اتالاتىن شارا وتكىزۋگە مۇرىندىق بولدى. سول شارا اياسىندا اتىراۋداعى جەتى اۋداننان 140-قا جۋىق قولونەر شەبەرلەرىنىڭ بۇيىمدارى جينالعان ەدى. سول شەبەرلەردىڭ قازاقتىڭ كۇندەلىكتى تۇرمىسىنا كەڭىنەن قولدانىلىپ كەلگەن تەكەمەت, الاشا, ءتۇس كيىز, قامشى, دومبىرا سەكىلدى ۇلتتىق بۇيىمدارىنىڭ جاسالۋ جولدارىنا كوڭىل اۋدارىلدى. ەل ىشىندەگى قولونەر شەبەرلەرىنىڭ بۇيىمدارى وبلىس ورتالىعىندا وتكىزىلگەن كورمەدە تانىستىرىلدى. ەندى سول قولونەر شەبەرلەرىنىڭ  قولىنان شىققان ۇلتتىق  بۇيىمدار تۋرالى ارنايى كىتاپ دايىندالىپ جاتىر. – ءبىز ۇلتتىق قولونەرىمىزدىڭ جوعالىپ كەتپەۋىن, كەيىنگى ۇرپاققا جەتۋىن قالايمىز. اسىرەسە, بۇگىن­گى جاھاندانۋ داۋىرىندە ۇلت­تىق  بۇيىمدارىمىزدى تەك مۇرا­جاي­لاردان كورمەي, كۇندەلىك­تى تۇرمى­سىمىزدا كەڭىنەن قولدانۋى­مىز قا­جەت, – دەيدى نۇربەرگەن ءداۋ­لەتوۆ. – ارينە, ول ءۇشىن جاس­تار­دىڭ ارا­سىندا ۇلتتىق بۇيىم­دارى­مىزدىڭ قۇندىلىعى جونىندە كەڭى­نەن ناسيحاتتاۋدى كوزدەپ وتىرمىز. ونىڭ وسى ماقساتتا كوزدەگەن  جوبالارىنىڭ كەيبىرىنە توقتالار بولساق, بيىل اتىراۋدا  قازاقتىڭ ۇلتتىق بۇيىمدارىن جاسايتىن قولونەر شەبەرلەرىنىڭ  شەبەر­لىك سىنىبىن وتكىزۋدى ويلاس­تى­رىپتى. ماسەلەن, امان مۇقا­جا­نوۆ باستاعان زەرگەرلەر  زەر­گەر­لىك بۇيىمداردى, جولاۋ­شى تۇر­دىعۇلوۆ دومبىرانى جاساۋدىڭ, ال ۇلبولسىن داۋلەنوۆا گەرمانيالىق تەحنولوگيامەن تەكەمەت باسۋدىڭ قىر-سىرىنا قانىقتىرماق. وسىنىڭ بارىنە بابالاردان ميراس بولعان  ۇلتتىق ونەرىمىزدىڭ جوعالماۋىن, ءسويتىپ, بۇگىنگى ءداۋىر ۇرپاعىنىڭ قۇرمەتىن وياتۋدى ارماندايتىن نۇربەرگەن داۋلەتوۆ دەمەۋشىلىك جاساعالى وتىر. جولداسبەك شوپەعۇل, «ەگەمەن قازاقستان». اتىراۋ.