اقتاۋدا تۇنگى كلۋبتا قىز ۇرلاندى

اقتاۋ. 1 ءساۋىر. اقتاۋ قالاسىنداعى تۇنگى كلۋبتاردىڭ بىرىندە قىز ۇرلانعان. بۇل تۋرالى ماڭعىستاۋ وبلىستىق ىشكى ىستەر دەپارتامەنتى ءباسپاسوز قىزمەتىنىڭ دەرەگىنە سىلتەمە جاساعان Lada.kz حابارلادى. قۇقىق قورعاۋ ورگاندارىنىڭ اقپارىنا قاراعاندا, وقيعا ۇستىمىزدەگى جىلعى 21 ناۋرىز كۇنى وبلىس ورتالىعىنداعى ويىن-ساۋىق وتاۋلارىنىڭ بىرىندە بولعان. كەيىن انىقتالعانداي, تۇنگى كلۋبقا كەلگەن قىزبەن مۇندا ءبىر جاس جىگىت تانىسادى. جىگىت ءوزىنىڭ جاڭاوزەن قالاسىندا تۇراتىنىن ايتادى. ال كەشتىڭ سوڭىنا قاراي ول جاڭا تانىسقان قىزىن كۇشتەپ ماشيناعا مىنگىزىپ, بەلگىسىز ءبىر جاققا الىپ كەتەدى. ونى پوليتسياعا ۇرلانعان قىزدىڭ قۇربىسى جەتكىزەدى. «ماڭعىستاۋ وبلىستىق ىشكى ىستەر دەپارتامەنتى قىزمەتكەرلەرىنىڭ اقتاۋ قالاسى ىشكى ىستەر باسقارماسى ۇيىمداسقان قىلمىسقا كۇرەس باسقارماسى قىزمەتكەرلەرىمەن بىرلەسە جۇرگىزگەن «STOP-ترافيك» اتتى جەدەل-الدىن الۋ شارالارى كەزىندە قىزدى جاڭاوزەن قالاسىنىڭ تۇرعىنى الىپ قاشقانى انىقتالادى. جىگىت قىزدى ونىڭ ەركىنەن تىس ۇيىندە قاماپ ۇستاعان», - دەپ تۇسىندىرمە بەردى وبلىستىق ىشكى ىستەر دەپارتامەنتى ءباسپاسوز قىزمەتىنىڭ وكىلى ازامات سارسەنباەۆ. ول جاڭاوزەن قالاسى تۇرعىنىنا قارسى «ادام ۇرلاۋ» بابى بويىنشا قىلمىستىق ءىس قوزعالعانىن باياندادى. گۇلايىم شىنتەمىرقىزى. دەرەك: Lada.kz. فوتو: rrnews.ru.