«بارىس» كەلەسى ماۋسىمدا جاڭا ارەنادا وينايدى

استانا. 1 ءساۋىر. قۇرلىقتىق حوككەي ليگاسىنىڭ كەلەسى ماۋسىمىندا استانانىڭ «بارىسى» ءوز ايدىنىنداعى ويىنداردى جاڭا ارەنادا وتكىزەدى. بۇل تۋرالى hcbarys.kz حابارلادى. كەشە عانا كلۋب پرەزيدەنتى بولىپ تاعايىندالعان الەكساندر كورەشكوۆتىڭ ايتۋىنشا, جاڭا سپورت كەشەنى 12 مىڭ ورىندىق بولادى. «كلۋب قۇرىلىمىندا ازىرگە ايتارلىقتاي وزگەرىس بولمايدى. ماعان الدىمەن كوماندانىڭ جەتىستىكتەرىن ارتتىرۋ ءۇشىن تىڭ ۇسىنىستار جاساۋ مىندەتى جۇكتەلدى. وزدەرىڭىز بىلەسىزدەر, 2015-2016 جىلعى ماۋسىمنان باستاپ «بارىس» 12 مىڭ ورىندىق جاڭا مۇز ايدىنىندا وينايدى. سوعان بايلانىستى كلۋبتىڭ كوممەرتسيالىق ماڭىزىن جەتىلدىرۋ ماسەلەسىن قاراستىراتىن بولامىز», – دەدى الەكساندر كورەشكوۆ. ايتا كەتەيىك, كەشە «بارىس» كومانداسىنىڭ باس دەمەۋشىسى «قازاقستان تەمىر جولى» ۇلتتىق كومپانياسى كلۋب پرەزيدەنتىنىڭ اۋىسقاندىعى تۋرالى مالىمەت تاراتتى. سوعان سايكەس, بۇرىنعى پرەزيدەنت نۇرلان ورازباەۆتىڭ ورنىنا الەكساندر كورەشكوۆ تاعايىندالدى. الەكساندر كورەشكوۆ بۇرىنعى حوككەيشى. كەزىندە «تورپەدو» (وسكەمەن), «مەتاللۋرگ» (ماگنيتوگورسك), «سيبير», «سەۆەرستال», «مەچەل» جانە «بارىس» كوماندالارىندا ويناعان. قازاقستان قۇراماسى ساپىندا دا ايدىنعا شىقتى. ال بۇگىنگە دەيىن ول ۇلتتىق قۇرامانىڭ باس مەنەدجەرى قىزمەتىن اتقارىپ كەلدى. «جاڭا قىزمەتكە اۋىسسام دا, ۇلتتىق قۇراماداعى مىندەتىمدى قوسا اتقارامىن. سەبەبى, قۇراما مەن «بارىس» كومانداسىن ءبولىپ قاراۋعا بولمايدى», – دەگەن جاڭا باسشى الداعى ۋاقىتتا جاس حوككەيشىلەرگە ەرەكشە كوڭىل بولىنەتىنىن ايتتى. ەلامان قوڭىر. دەرەك: hcbarys.kz. سۋرەت: skyscrapercity.com.