دۋبايدان 10 مەدال ولجالادى

جاقىندا بىرىككەن اراب امىرلىكتەرىندە «Fazaa» اتتى ءداستۇرلى پاراليمپياداشىلار جارىسى ءوتتى. وعان 45-تەن استام ەلدىڭ جەڭىل اتلەتشىلەرى قاتىستى. وسى سىندا قازاقستان سپورتشىلارى 4 كۇمىس, 6 قولا مەدال يەلەندى. ءتورت كۇندىك دودادا قانشا بارىن سالعانىمەن, قازاقستاندىق پارا­­­ليمپياداشىلارعا باس جۇلدە بۇيىر­مادى. جارىسقا قوسقان 21 جەڭىل اتلەتشىلەرىمىزدىڭ بۇل جولى با­بى كەلىسپەدى دەگەن جورامال باسىم. ايتەۋىر, سپورتشىلار جۇلدەدەن قۇرا­لاقان ەمەس. قورجىن ءبۇيىرى قو­­­ماق­تى. قازاقستاندىقتار كۇمىسى مەن قو­لاسى ارالاس 10 مەدال ولجالادى. مامانداردىڭ پىكىرىنشە, وسىلاي بولارى الدىن الا توپ­شىلانعان. ويتكەنى, بۇل جىل باسىنداعى العاش­قى ءىرى جارىس­تاردىڭ ءبىرى. جەڭىل اتلەت­شىلەرىمىز وقۋ-جاتتىعۋ جيىنىن دا جۇيەلى باستاپ بولعان جوق. «باعىمىزدى بارا كورەرمىز» دەگەن تاۋەكەلمەن ءاتۇستى جينالىپ, دۋبايعا اتتانىپ كەتە بارعان. ال مۇنداي حالىقارالىق باسەكەنىڭ التىن تۇعىرىنا تابان تىرەۋ ءۇشىن الدىن الا جوسپارلانعان وقۋ-جاتتىعۋ جيىندارى وتۋگە ءتيىس ەدى. بۇل ساپاردا سول قاعيدا بەلدەن باسىلعان سىڭايلى. باس جۇلدەنىڭ بىزگە بۇيىرماۋىنىڭ باستى سەبەبى وسى كورىنەدى. شۇكىرلىك ەتەرىمىز, پاراليم­پيا­داشىلارىمىز بابى كەلىسپەگەن كەزدىڭ وزىندە وسىنشا جۇلدەنى ۋىس­تاپ الدى. بۇل جارىستا ماعجان نۇرلىباەۆ ەكى كۇمىس, ءبىر قولا جۇلدەنى, يسلام ساليموۆ كۇمىس پەن قولا مەدالدى, سەرگەي حارلاموۆ ەكىنشى ورىندى يەلەنسە, امانات قالقاەۆ, الەكسەي لۋكۋتين, اينۇر تايجانوۆا, رۋفات حابيبۋللين قولا مەدالدى جەڭىپ الدى. وسىدان كەيىن سپورتشىلارىمىز شاردجاعا بەت الدى. ءبىزدىڭ پاراليمپياداشىلار «دۋبايدا كەتكەن ەسەمىزدى شاردجادا قايتارامىز», دەپ قۇلشىنۋلى. ماعجان شاردجانى مويىنداتتى سپورتشىلارىمىز شاردجاعا شيرىعىپ بارعان ەكەن. بىرىككەن اراب امىرلىكتەرىندەگى ايگىلى قالادا بەسىنشى رەت ۇيىمداستىرىلعان دوداعا 33 مەملەكەتتىڭ جەڭىل اتلەت­­شىلەرى قاتىسقان. دۋبايدا جىبەرگەن ەسەنى قايتارماققا قۇلشىنعان بولار, قازاقستاندىقتار ەكى كۇندە 17 مەدالدى ۋىستاپ الدى. اسىرەسە, ۇزىندىققا سەكىرۋ مەن قىسقا قاشىقتىققا جۇگىرۋدە قازاقستاننىڭ كوك تۋىن قايتا-قايتا اسپانداتقان ماعجان نۇر­لىباەۆ نامىستى جىگىت ەكەن. قازاقستان قورجىنىنا 3 التىندى دا ماعجاننىڭ ءبىر ءوزى سالدى. «Fazaa» باسەكەسىندە دە جاقسى ناتيجەلەر كورسەتكەن ماع­جان شاردجادا, ءتىپتى, شيراق بولدى. كورۋ قابىلەتى تومەندەر ارا­سىن­داعى ءۇش ءتۇرلى سىندا باس ءجۇل­دەنى ج ۇلىپ شىقتى. سونداي-اق, امانات قالقاەۆ, اينۇر تايجانوۆا, الەك­سەي لۋكۋتين, بيسلان گە­بەرتاەۆ, يسلام ساليموۆ سىندى سپورتشىلار نامىستى قولدان بەرمەۋ­گە بارىن سالعان ەكەن. شاردجا باسەكەسىندە ءبىزدىڭ ەلدىڭ 7 سپورتشىسى الەم چەمپيوناتىنىڭ ءنورماتيۆىن ورىنداپتى. جالپى, وسى جارىستا جەڭىل اتلەتشىلەرىمىز 3 التىن, 5 كۇمىس, 9 قولا مەدالدى جەڭىپ الدى. داستان كەنجالين, «ەگەمەن قازاقستان».