زاڭ ءار تەڭگەنىڭ ءتيىمدى جۇمسالۋىن قاداعالايدى

كەشە ورتالىق كوممۋنيكاتسيالار قىزمەتىندە قارجى ءمينيسترى باقىت سۇلتانوۆ ءباسپاسوز ءماسليحاتىن وتكىزدى. ول «نۇرلى جول» باعدارلاماسىن جۇزەگە اسىرۋعا قاتىستى ۇلتتىق قوردان تاعى 76 ملرد. تەڭگە بولىنەتىنىن ايتتى. قارجى مينيسترلىگى وتكەن ايدىڭ 11-ءشى جۇلدىزىندا بولعان ۇكىمەتتىڭ كەڭەيتىلگەن وتىرىسىندا مەملەكەت باسشىسى جۇكتەگەن تاپسىرمالار بويىنشا بىرقاتار شارالار قاراستىرىپتى. اتاپ ايتقاندا, اعىمداعى جىل مەن ورتا مەرزىمدەگى بولاشاقتا ەكونوميكالىق ساياساتتى جۇرگىزۋ جونىندەگى تاپسىرمالاردى ورىنداۋعا بايلانىستى ناقتى شەشىمدەر قابىلدانعان. وسى تۋرالى اڭگىمەلەگەن مينيستر, ماقساتقا جەتۋ ءۇشىن قىسقا مەرزىمدە دايىندالعان ارنايى زاڭ پارلامەنت سەناتىنىڭ قاراۋىندا ەكەنىن ايتتى. سوعان قاراعاندا, تاياۋدا پارلامەنت سەناتى اعىمداعى جىلعى بيۋدجەت جوباسىن ناقتىلاۋ تۋرالى ءوز شەشىمىن قابىلدايتىن بولادى. «اعىمداعى جىلدىڭ 11 اقپانىندا وتكەن ۇكىمەتتىڭ كەڭەيتىلگەن وتىرىسىندا ەلباسى ءبىراز تاپسىرما بەرگەنى ءمالىم. سولاردىڭ ىشىندە ەڭ ماڭىزدى ماسەلەلەردىڭ ءبىرى سىرتقى ەكونوميكاداعى احۋالداردىڭ بۇگىنگى ەلىمىزدىڭ ەكونوميكاسىنا كەرى اسەرلەرىنە قارسى شارالاردى دەر كەزىندە قابىلداۋ بولىپ تۇر, ولاردىڭ قاتارىندا قارجىلىق شارالار دا بار», دەدى ب.سۇلتانوۆ. مينيستر ەل كۇتكەن «نۇرلى جول» باعدارلاماسىن جۇزەگە اسىرۋ ماقساتىندا ۇلتتىق قوردان قوسىمشا 76 ملرد. تەڭگە قارجى بولىنەتىندىگىن دە ايتىپ ءوتتى. «بۇگىندەگى ەكونوميكامىزدىڭ ءوسۋ دەڭگەيى مەن يمپورت پەن ەكسپورت كورسەتكىشتەرىنىڭ تومەندەۋىنە بايلانىستى بيۋدجەتىمىزدى ناقتىلاۋىمىز قاجەت. وسىعان وراي ارنايى زاڭ جوباسى قىسقا مەرزىم ىشىندە ازىرلەنىپ, پارلامەنتكە ۇسىنىلعان ەدى. ەندى, ەرتەڭ سەنات اعىمداعى جىلعى بيۋدجەت جوباسىن ناقتىلاۋ تۋرالى ءوز شەشىمىن قابىلدايتىن بولادى», دەگەن ۆەدومستۆو باسشىسى, جاڭا زاڭ ءار تەڭگەنىڭ ءتيىمدى جۇمسالۋىن قاتاڭ قاداعالايتىندىعىن مەڭزەدى. بۇيىرتسا, بيىلعى جىلى ەلىمىزدىڭ ىشكى جالپى ءونىمىنىڭ ءوسىمى 1,5 پايىز دەڭگەيىندە ساقتالاتىن كورىنەدى. ۇكىمەت الەمدىك ەكونوميكانىڭ ءوسۋ قارقىنىنىڭ باسەڭدەۋىنە, مۇناي باعاسىنىڭ تومەندەۋىنە جانە ەلىمىزدىڭ ەكونوميكاسىنا كەرى ىقپال ەتەتىن باسقا دا جاعىمسىز فاكتورلارعا بايلانىستى بيۋدجەتتى وڭتايلاندىرۋ جۇمىستارىن جۇرگىزىپتى. «ماسەلەن, بيۋدجەتتى وڭتايلاندىرۋ كەزىندە ءبىز مۇنايدىڭ ءبىر باررەلىن 50 دوللار مولشەرىندە ناقتىلادىق. بۇدان شىعاتىن ناتيجە, ىشكى جالپى ءونىمنىڭ ءوسىمى بيىلعى جىلى 1,5 پايىز دەڭگەيىندە ساقتالادى دەپ ۇمىتتەنەمىز», دەدى ول. ەلىمىزدە م ۇلىكتى زاڭداستىرۋ اكتسياسى دا ءوز ناتيجەسىن بەرىپ جاتىر ەكەن. «م ۇلىكتى زاڭداستىرۋ اكتسياسى بارىسىندا 200 ملرد. تەڭگەدەن استام قاراجاتقا م ۇلىكتى جاريا ەتۋ بويىنشا وتىنىشتەر كەلىپ ءتۇستى. شامالاپ ايتار بولساق, بۇل 1 ملرد. دوللار بولادى. بۇعان قوسا, ەكىنشى دەڭگەيلى بانكتەردە 69 شوت اشىلدى, وعان 10 ملرد. تەڭگەگە جۋىق قاراجات سالىنعان. بۇل قارجىلار اينالىمعا دا ءتۇسىپ ۇلگەردى», دەگەن مينيستر, وسى سومانىڭ ۇشتەن ءبىرىن يەلەرى ۋاقىتىنان بۇرىن الۋعا تىلەك بىلدىرگەن, سونىڭ ارقاسىندا ونىڭ 10 پايىزى مەملەكەت بيۋدجەتىنە كەلىپ قوسىلعانىن جەتكىزدى. وسى پايىزدى اقشاعا اينالدىرىپ كورسەك, بيۋدجەتكە شامامەن 300 ملن. تەڭگە كىرىس كىرگەن. ونىڭ ۇشتەن ءبىرى قازاقستان ەكونوميكاسىنا سالىنىپ, ولار 10 پايىزدىق الىمنان بوساتىلىپتى. وسىلايشا, بۇل قاراجاتتار جۇمىس ىستەي باستاپتى. ءباسپاسوز ءماسليحاتىندا كەزەكتەن تىس وتكەلى تۇرعان پرەزيدەنتتىك سايلاۋدى وتكىزۋگە قانشا قاراجات قاراستىرىلعانى دا سۇرالدى. «ءتيىستى مەملەكەتتىك ورگاندارمەن بۇل ماسەلەنى تالقىلادىق. ارنايى جۇمىس توبى دا قۇرىلعان بولاتىن. سايلاۋعا قاجەت اقشانى جان-جاقتى ەسەپتەي كەلىپ, 5,5 ملرد. تەڭگە كولەمىندەگى قاراجات جەتكىلىكتى بولار دەپ شەشتىك. بۇگىن بۇل سومانى ۇكىمەتتىڭ قورىنان ءبولۋ قاراستىرىلىپ جاتىر», دەدى ب.سۇلتانوۆ. نۇرباي ەلمۇراتوۆ, «ەگەمەن قازاقستان».