ماڭعىستاۋدا ەل اۋماعىن زاڭسىز كەسىپ وتكەن براكونەرلەر ۇستالدى

اقتاۋ. 1 ءساۋىر. ماڭعىستاۋدا تەڭىزدەگى قازاقستان اۋماعىن زاڭسىز كەسىپ ءوتىپ, بالىق اۋلاعان شەتەلدىك براكونەرلەر ۇستالدى. بۇل تۋرالى tumba. kz حابارلادى. «تاراز» شەكارا كەمەسىنە مىنگەن «جاعالاۋ كۇزەتى» ايماقتىق باسقارماسىنىڭ شەكاراشىلارى كەزەكتى رەيد جۇرگىزدى. رەيد بارىسىندا كاسپي تەڭىزىن زاڭسىز كەسىپ ءوتىپ, قازاقستان اۋماعىنان بالىق اۋلاعان براكونەرلەردى بايقاعان. زاڭ بۇزۋشىلار ءبىزدىڭ شەكاراشىلاردى كورىسىمەن, قايىقتارىنىڭ جىلدامدىقتارىن ارتتىرىپ, وقيعا ورنىنان بوي تاسالاۋعا تىرىستى. قازاقستان شەكاراسىنان شىعىپ كەتۋدى ويلاعان براكونەرلەرگە شەكاراشىلار ەسكەرتۋ وعىن اتۋعا ءماجبۇر بولعان. اسپانعا ەكى رەت اتىلعان ەسكەرتۋ وعىنان سوڭ, ازەربايجاننىڭ 4 ازاماتى قولعا ءتۇستى. ولاردى ءتىنتۋ بارىسىندا, «بايدا» جەڭىل قايىعى, 28 تىيىم سالىنعان بالىق اۋلاۋ قۇرالدارى جانە جالپى سالماعى 946 كگ. قۇرايتىن 240 دانا بەكىرە تاركىلەندى. قازىرگى تاڭدا براكونەرلەرگە قاتىستى مەملەكەتتىك شەكارانى بۇزۋ جانە براكونەرلىك باپتارى بويىنشا قىلمىستىق ءىس قوزعالىپ, تەرگەۋ امالدارى جۇرۋدە. قولعا تۇسكەن ازەربايجان ازاماتتارى اقتاۋ قالاسىنداعى ۋاقىتشا تەرگەۋ يزولياتورىنا قامالدى. گۇلايىم شىنتەمىرقىزى. دەرەك, سۋرەت: tumba. kz.