قازاقستان فۋتبولدان الەم چەمپيوناتىن وتكىزۋدەن ءۇمىتتى

استانا. 1 ءساۋىر. قازاقستان فۋتبول فەدەراتسياسىنىڭ پرەزيدەنتى ەرلان قوجاعاپانوۆ رەسەيگە جاساعان ءىسساپارىندا فيفا پرەزيدەنتى يوزەف بلاتتەرمەن كەزدەستى. سونداي-اق, رەسەي اقپارات قۇرالدارىنا سۇحبات بەرىپ, قازاقستاننىڭ فۋتبولدان 2026 جىلعى الەم چەمپيوناتىنا ۇمىتكەر رەتىندە قاتىسۋدى جوسپارلاپ وتىرعانىن ايتتى. بۇل تۋرالى «سپورت-ەكسپرەسس» حابارلادى. اتالعان باسىلىمعا بەرگەن سۇحباتىندا ول: «الداعى ۋاقىتتا الەم چەمپيوناتىن وتكىزۋ ءۇشىن تالاسقا ءتۇسۋ جوسپارىمىزدا بار. قازىر وسى ماقساتتا ەل باسشىلارىمەن اقىلداسىپ, ءوز مۇمكىندىگىمىزدى سارالاپ جاتىرمىز. ەلىمىزدىڭ دامۋ قارقىنى وتە جوعارى, ەكونوميكامىز دا تۇراقتى تۇردە العا جىلجىپ كەلەدى. ەندەشە نەگە تالاسىپ كورمەسكە؟ ءبىز 2022 جىلى قىسقى وليمپيادانى وتكىزگىمىز كەلەدى. ال ودان كەيىنگى جوسپاردا 2026 جىلعى فۋتبولدان الەم چەمپيوناتى تۇر», – دەدى. سونىمەن قاتار ەرلان توقتارحان ۇلى فۋتبول فەدەراتسياسىنىڭ بۇگىنگى بيۋدجەتىن دە جاريالادى. بۇل جونىندە ول: «قازىر ءبىزدىڭ فەدەراتسيانىڭ بيۋدجەتى شامامەن 10 ميلليون ەۋرونى قۇرايدى. ونىڭ ىشىندە ءوزىمىزدىڭ جانە ۋەفا بەرەتىن قارجى دا بار», – دەدى. ودان بولەك, فەدەراتسيا پرەزيدەنتى قازاق فۋتبولىنىڭ ۋەفا-عا مۇشە بولۋىنا توقتالىپ: «فۋتبولىمىزدىڭ ەۋروپاعا قوسىلعانىنا ەش وكىنبەيمىز. بۇل وتاندىق فۋتبولشىلاردىڭ كاسىبي دەڭگەيدە وسۋىنە مول مۇمكىندىك بەرەدى. ۋەفا بىزگە وتە كوپ كومەك كورسەتىپ وتىر» – دەدى. ەلامان قوڭىر. دەرەك, سۋرەت: «سپورت-ەكسپرەسس».