كوش تىزگىنىن سەنىمگە بەرگەن دۇرىس

قازاق – ءۇمىت پەن سەنىمگە, كەمەڭگەرلىك پەن اۋليەلىككە يەك ارتقان, وسى ءبىر ادامزات بالاسىن كوگەنتۇپتەگى مۇراتىنا جەتكىزەر ىزگى قاسيەتتەردى كيە تۇتقان حالىق. الاعاي-بۇلاعاي ەرەۋىل شاقتاردا بولماسا, بەتالدى تاۋەكەلگە دە بارا بەرمەيدى. قانداي ىستە بولسا دا, نەندەي شارۋانى قولعا السا دا ون ويلانىپ بارىپ ءبىر پىشەتىن, بارعا قاناعات, جوققا سالاۋات ايتاتىن, سابىرلىلىق پەن ساليقالىقتان, كونبىستىك پەن كونتەرىلىكتەن الەم حالىقتارى اراسىندا كەشەندى سايىس وتەتىن بولسا, قازەكەم الدىڭعى ورىنداردىڭ ءبىرىن ەشقانداي تامىر-تانىسسىز يەمدەنەتىن جۇرت. نەگە دەيسىز-اۋ. سوڭعى 20-25 جىل ارالىعىندا مونداناقتاي جەر بەتى نەندەي زوبالاڭداردى جون ارقاسىنان وتكەرمەدى؟! دۇنيەنىڭ استى ۇستىنە كەلدى. الەمنىڭ قۇبىلاسى مەن شى­عىسىندا, سولتۇستىگى مەن وڭ­تۇستىگىندە قانشاما سويقاندى سوعىستار, نە­قيلى قارۋلى قاقتىعىستار, اتاۋلى-اتاۋسىز قانشاما توڭكەرىستەر بولىپ ءوتتى. بولىپ تا جاتىر. ەستيتىنىمىز دە, كۇندەلىكتى تەلەديداردان كورەتىنىمىز دە وزەن بولىپ اققان, ناقاقتان توگىلىپ جاتقان ادامزات قانى, ءبولىنىپ-جارىلعان دۇنيە, بوزداعان بەيكۇنا الەم, سويقانداردىڭ جەبەسىنەن مەرت بولعان بوتاسىن جوقتاپ, شاشىن ج ۇلىپ, بەتىن تىرناعان ارۋانا, ارانىن اشقان جوقشىلىق پەن اشارشىلىق... باسقالارىن بىلاي قويا تۇرىپ, كەشەگى وزىمىزبەن ءبىر داستارقاننان ءدام العان, جارتى ءداندى جارىپ, ءبۇتىن ءداندى ءبولىپ جەگەن كەڭەستىك رەسپۋبليكالاردىڭ تاۋەلسىزدىكتەن كەيىنگى ەۆوليۋتسيا­سىن جاي عانا شولىپ ءوتىڭىزشى. شۇكىرىڭىز بەن تاۋبەڭىزدى مىڭ سان قايتالاپ, مىڭ سان كۇبىرلەيتىنىڭىزگە مەن كەپىل! وسى جىلدار ىشىندە جۇرت ءبىر جەڭنەن قول, ءبىر جاعادان باس شىعارىپ, الەمدەگى دوستىق پەن باۋىرلاستىقتىڭ ۇلگى-ونەگەسىنە اينالدى. قازاقستان حالقى اسسامبلەياسى اتتى ىزگىلىك پەن يماندىلىق شاڭىراعىنان شالقىپ ۇشقان بەيبىتشىلىك – دوستىق – جاسامپازدىق سيمفونياسى كوك ءجۇزىن كەرنەپ, ەۋروپا مەن ازيانى تاڭىرقاتۋدا. كەڭەستىك داۋىردەگى كۇلدىكومەش قازاقستان ەندى كەلىپ الەمدىك داستارقاننىڭ تورىندە باس كەسىپ, جامباس كەرتە باستادى. اتالى ءسوز ايتاتىن بولدى. كەشەگى كۇنى جالعىزىنىڭ تويىنا سوياتىن اقساق شىبىش تابا الماي, كوز جاسىن جاسىرىپ سۇرتكەن اۋىل قازاعى بۇگىندە تويىن قالاعا كەلىپ جاسايتىن دەڭگەيگە جەتتى. مەيرامحانا تاڭداپ كەرگيتىنىن قايتەرسىز. قازاقستاننىڭ دالاسى مەن قالاسىندا قاپتاعان جەڭىل اۆتوكولىكتەر. ولار كوشەلەرىمىزگە سىيماي, ۇلكەن پروبلەماعا اينالدى. بايلىقتان پروبلەما تۋار دەپ كىم ويلاعان. كەشەگى كۇنى ۇلتتىق نامىسىن قامشىلاپ قىر اسىپ, نەگىزگى وتانىما بارامىن دەپ قوشتاسىپ كەتكەن قانشاما ۇلت وكىلدەرى قازاقستانمەن قايتارا جىلاپ تابىسىپ جاتىر؟!. وسىنىڭ ءبارى اللانىڭ ارقاسى. ونان كەيىن – كورەگەن دە كەمەڭگەر ەلباسىمىز نۇرسۇلتان نازارباەۆتىڭ ارقاسى. اكسيوما بۇل. ون جەردەن بەتسىز بولسا دا وپپوزيتسياڭ دا, جەلبۋازىڭ دا ءدال وسى جەردە اۋىز اشا الماسا كەرەك. سوندىقتان, قازاقستاننىڭ تۇعىرى بەرىك, ەرتەڭى مۇنان دا جارقىن بولسىن دەسەك, ەلباسىنىڭ سايلاۋعا تۇسكەنىن قالايتىنىمىز انىق. الەمدىك ەرەۋىل كەزەڭدە ەل تىزگىنىن سەنىمگە – نازارباەۆقا تاپسىرعانىمىز ءجون. الىبەك قاڭتارباي, جازۋشى, وسكەمەن قالاسىنىڭ قۇرمەتتى ازاماتى. شىعىس قازاقستان وبلىسى.