مەملەكەتتىك ءتىلدى مەڭگەرگەندىگىن دالەلدەي المادى

كەشە ورتالىق سايلاۋ كوميسسياسىندا قازاقستان رەسپۋبليكاسىنىڭ پرەزيدەنتتىگىنە كانديداتتاردىڭ مەملەكەتتىك ءتىلدى ەركىن مەڭگەرگەندىگىن انىقتاۋ جونىندەگى لينگۆيستيكالىق كوميسسيا ۇمىتكەرلەردىڭ ءبىرى – اسقار جوراباي ۇلى سىرعاباەۆتان سىناق الدى. لينگۆيستيكالىق كوميسسيانىڭ توراعاسى مىرزاتاي جولداسبەكوۆ الدىمەن پرەزيدەنتتىككە كاندي­داتتىققا ۇسىنىلعان اسقار سىر­عاباەۆتىڭ ءومىربايانىنا توقتالىپ ءوتتى. ول 1959 جىلى جامبىل وبلىسىنىڭ جامبىل اۋدانىنا قاراستى قىزىلجۇلدىز اۋىلىندا دۇنيەگە كەلگەن. قازاقستان ازاماتى, ۇلتى – قازاق, ءبىلىمى جوعارى. بۇدان كەيىن كوميسسيا توراعاسى سىناق تاپسىرۋشىعا سىناقتىڭ ءتارتىبىن تانىستىردى. ءبىرىنشى كەزەڭدە كانديداتتىققا ۇسىنىلعان ول ەكى بەتتىك جازبا جۇمىسىن جازۋعا ءتيىس. اسقار سىرعاباەۆ «الەمدىك داعدارىس جانە قازاقستان ەكونوميكاسى» دەگەن تاقىرىپتى تاڭدادى. ءۇش ساعاتتان استام ۋاقىتقا سوزىلعان سىناقتىڭ ناتيجەسىن كوميسسيا توراعاسى مىرزاتاي جولداسبەكوۆ جاريا ەتتى. «ءبىرىنشى جازبا جۇمىسىندا ءسىز «الەمدىك داعدارىس جانە قازاقستان ەكونوميكاسى» دەگەن تاقىرىپتى تاڭدادىڭىز. وكىنىشكە قاراي, ەكى بەتتىك جازبا جۇمىسىندا 92 قاتە جىبەرىلگەن. ونىڭ ىشىندە «مەملەكەت» دەگەن ءسوزدىڭ ءوزى دۇرىس جازىل­ماعان, – دەدى كوميسسيا توراعاسى. – ەكىنشى كەزەڭدە ءۇش بەتتىك ءماتىندى ەجىكتەپ ارەڭ وقىدىڭىز. ءسىزدىڭ وقۋ مانەرىڭىز ءالسىز شىقتى ءارى تۇسىنىكسىز سوزدەر كوپ بولدى. سون­دىقتان, بۇل دا مەملەكەتتىك ءتىل­دى ەركىن مەڭگەرمەگەنىڭىزدى كورسەتەدى». كوميسسيا توراعاسىنىڭ حاباردار ەتۋىنشە, پرەزيدەنتتىككە كانديداتتىققا ۇسىنىلۋشىعا ءۇشىنشى كەزەڭدە «ەل بىرلىگى – ەل ارقاۋى» دەگەن تاقىرىپتا ون بەس مينۋت كوسىلە سويلەۋگە مۇمكىندىك بەرىلگەن. «بىراق, ءسىز سولاي سويلەي المادىڭىز, ون بەس مينۋتتىڭ ورنىنا توعىز مينۋت قانا سويلەدىڭىز. سويلەمدەرىڭىزدىڭ لوگيكالىق بايلانىسى دا ءالسىز بولدى. ادام تۇسىنبەيتىن سويلەمدەردى قولدان­دىڭىز. قىسقاسى, لين­گۆيستيكالىق كوميسسيا اسقار سىرعاباەۆتى مەملەكەتتىك ءتىلدى ەركىن مەڭگەرە الماعان دەگەن قورىتىندى جاسادى», – دەدى مىرزاتاي جولداسبەكوۆ. جۋرناليستەرگە سۇحبات بەرۋ كەزىندە اسقار سىرعاباەۆ انا ءتىلىن تۇرمىستىق دەڭگەيدە عانا بىلگەنى ءۇشىن ءوزىنىڭ ۇيالاتىندىعىن مويىندادى. «سىناق ءوز تالاپتارىنا ساي ءوتتى, رەنجيتىندەي جاعداي ورىن المادى. ءبارى ورىندى. شىنىمدى ايتسام, مەن العاش رەت بۇگىن قازاقشا جازدىم. سەبەبى, وسى ۋاقىتقا دەيىن مۇنداي تالاپ ماعان قويىلماعان ەدى. شالاقازاقتىققا سالىنىپ, تۇرمىستىق دەڭگەيدە عانا انا ءتىلىمىزدى ءبىلىپ جۇرگەن ازاماتپىز عوي. ءبىز كەڭەس زامانىندا ءبىلىم الدىق. ال بۇگىنگى كورسەتكەن ناتيجەمە ءادىل باعا قويىلدى», – دەدى ول اعىنان جارىلىپ. *  *  * ورتالىق سايلاۋ كوميسسياسىنىڭ حاتشىسى باقىت مەلدەشوۆ كەشە باق وكىلدەرىنە پرەزيدەنتتىككە كانديداتتىققا ۇسىنىلعاندار سانى توعىز ادامعا جەتكەنىن حابارلادى. ونىڭ اتاپ وتۋىنشە, ۇسى­نىلعانداردىڭ سەگىزى ءوزىن ءوزى ۇسىنعان, ءبىر ازامات قازاقستاننىڭ كوممۋنيستىك حالىق پارتياسى اتىنان كەزەكتەن تىس پرەزيدەنتتىك سايلاۋعا ۇسىنىلىپ وتىر. «5 ناۋ­رىز­داعى جاعداي بويىنشا, قازاقستان رەسپۋبليكاسىنىڭ پرەزيدەنتتىگىنە توعىز ادام ۇسىنىلدى, – دەدى ول. – ولار اسقار سىرعاباەۆ, سافيوللا الداجانوۆ, ليمانا قويشيەۆا, باقىت ابدۋكاريموۆ, سۋحراب مىرزاشوۆ, ەسەنبەك وكتەشباەۆ, ياكوبجان جۇنىسبەكوۆ, تۇرعىن سىزدىقوۆ جانە جۇمان قانات». ءاليسۇلتان قۇلانباي, «ەگەمەن قازاقستان».