كيەلى تۇركىستاننان باستاۋ العان تايقازاننىڭ كوشىرمەسى جامبىل جەرىنە كوكتەم شۋاعىن, جىلىلىق, ىزگىلىك الىپ كەلدى. توقشىلىق پەن بەرەكە-بىرلىك بەلگىسىنە اينالعان «قازاقستان حالقى اسسامبلەياسى – 20 ىزگى ءىس» ەستافەتاسىنىڭ باستى سيمۆولىن جامبىلدىقتار 1 ناۋرىز كۇنى قورداي اۋدانىندا ۇلكەن ىقىلاسپەن قارسى الدى. ءسويتىپ, وسى اپتا ىشىندە جامبىل وبلىسىنىڭ بارلىق اۋداندارىن ارالاعان تايقازان ءىشى قايىرىمدى ىستەرمەن تولىعا ءتۇستى.
«قازفوسفات», «حانتاۋ» جشس-لەرى, «مىڭارال» تسەمەنت زاۋىتتارى باستاعان وڭىردەگى ءىرىلى-ۇساقتى كاسىپورىندار, شارۋاشىلىقتار, جەكە كاسىپكەرلەر كوپبالالى, الەۋمەتتىك از قامتاماسىز ەتىلگەن وتباسىلارعا, سوعىس جانە ەڭبەك ارداگەرلەرىنە, مۇگەدەك جاندارعا باعالى سىيلىقتار تاپسىرىپ, كومەك قولدارىن سوزدى. ناقتىراق ايتساق, شۋ اۋدانى 200 ادامدىق وڭالتۋ ورتالىعىنا 5 ملن. تەڭگەگە اۆتوبۋس ساتىپ الىپ بەرسە, مويىنقۇم جانە بايزاق اۋداندارى از قامتاماسىز ەتىلگەن وتباسىلارعا 2 ملن. تەڭگە, جۋالى اۋدانى اۋعان سوعىسى ارداگەرلەرىنە 2,5 ملن. تەڭگە, سارىسۋ اۋدانى كوپبالالى وتباسىلارداعى ستۋدەنتتەردىڭ وقۋ قارجىسىن تولەۋگە 2,4 ملن. تەڭگە, سوعىس ارداگەرلەرىنىڭ ۇيلەرىن جوندەۋگە 590 مىڭ تەڭگە, سونداي-اق, 1 ملن. تەڭگەگە 2 جازۋشىنىڭ كىتابىن شىعارۋعا, جامبىل اۋدانى 40 سوعىس ارداگەرىنە 480 مىڭ تەڭگە كولەمىندە كومەك كورسەتتى.
بۇدان بولەك, ەتنومادەني ءبىرلەستىكتەر الىس اۋىلداردا تۇراتىن 125 ادامعا 400 مىڭ تەڭگەنىڭ ءدارى-دارمەكتەرىن الىپ بەردى. ەستافەتا اياسىندا جاسالعان قايىرىمدىلىق ىستەردىڭ سوڭى قاي اۋداندا بولماسىن, ءتۇرلى ۇلت وكىلدەرىنىڭ, ەڭبەك ۇجىمدارىنىڭ, مەكتەپ وقۋشىلارىنىڭ قاتىسۋىمەن ۇلان-اسىر مەرەكەلىك ءىس-شارالارعا ۇلاسىپ جاتتى. اسىرەسە, ءتۇرلى ۇلت وكىلدەرىنىڭ بەلسەندىلىگى ايقىن اڭعارىلدى.
ءسويتىپ, كەشە تايقازان سان عاسىردان سىر شەرتكەن كونە تاراز قالاسىنا كەلىپ جەتتى. اۋىر اتلەتيكادان الەم چەمپيونى جاسۇلان قىدىرباەۆ, تالاي ءبىلىم سايىسىنىڭ جۇلدەگەرلەرى اتانعان ايدىن قويبەك پەن الىشەر ءتاجىحانوۆ سالتاناتتى تۇردە تورگە الىپ شىققان تايقازان تاعى دا كوپتەگەن قايىرىمدى ىستەرگە مۇرىندىق بولىپ, ەلدىڭ تۇلا بويىن مەيىرىمگە تولتىردى. تاراز قالاسىنىڭ اكىمى نۇرجان كالەندەروۆ باستاعان كاسىپكەرلەر, باسقا دا جومارت ازاماتتار بۇل كۇنى كوپتەگەن جاندارعا قايىرىمدىلىق قولىن سوزدى.
«بىرلىك پەن بەيبىتشىلىك بار جەردە مەيىرىمدىلىك ورناپ, قايىرىمدىلىق ىستەر قاشاندا جالعاسا بەرەرى ءسوزسىز. اۋليەاتا جەرىن مەكەندەگەن سان ءتۇرلى ۇلت وكىلدەرىنىڭ قازاقستان جەرىنە, ەلباسىنا دەگەن العىستارى مەن ريزاشىلىقتارى وتە مول», – دەيدى جامبىل وبلىسى اكىمىنىڭ ورىنباسارى ەرقانات مانجۋوۆ.
كونە تاراز قالاسى تۇرعىندارىنىڭ جومارتتىعى مەن كەڭپەيىلدىگىنىڭ كۋاسى بولعان تايقازان وسى كۇنى جەتىسۋ جەرىنە جول تارتتى. قازاقستان حالقى اسسامبلەياسى الماتى وبلىستىق حاتشىلىعىنىڭ مەڭگەرۋشىسى تۇرسىنباي عابيت تارازدىقتارعا جەتىسۋ ەلىنىڭ ىستىق سالەمىن جولداپ, وسى يگىلىكتى ىسكە ءوز ۇلەستەرىن مولىنان قوساتىندىقتارىن جەتكىزدى.
ورالحان ءداۋىت,
«ەگەمەن قازاقستان».
جامبىل وبلىسى.
سۋرەتتى تۇسىرگەن
اقادىل رىسماحان
