جيھاز

جىبەك جولى اۋىلىنداعى «جاميلاعا» باس سۇقپاۋ مۇمكىن ەمەس. ءجاميلامىز وسىنداعى جيھاز فابريكاسىنىڭ اسەم دۇكەنى. زاماناۋي ساۋدا ۇيىندە نەگىزىنەن وفيستىك جابدىقتار ورنالاسقان. «ينە-جىپتەن» جاڭا شىققان ۇستەلدەر, ورىندىقتار, كرەسلولار ءتۇر-تۇرىمەن كوز تارتادى. سونداي-اق, سەيفتەر, وتقا ءتوزىمدى شكافتار, تەمىردەن يىلگەن كيىم ىلگىشتەر, ءتىپتى, مەديتسينالىق قوراپتار ءتۇر-تۇرىمەن ءتىزىلىپتى. ءبىر قاراعاندا بۇل تاڭسىق دۇنيەلەر دە ەمەس. ماسەلە اتالعان بۇيىمداردىڭ جىبەك جولىندا جاسالۋىندا بولىپ تۇر. «ءجاميلا» جشس ديرەكتورى قايرات بەگاليننىڭ ايتۋىنشا, جەكە كاسىپورىن اشۋ يدەياسى كەزدەيسوق ەمەس سياقتى. بۇعان دەيىن ولار جيھاز جابدىقتارىمەن قاتار پلاستماسسا جانە تەرى-گالانتەرەيا بۇيىمدارىن كوتەرمە-بولشەك ساۋدا اينالىمىنا شىعارۋعا ماماندانعان وتاندىق بەلگىلى «Zeta» كومپانيا­سىمەن ارىپتەستىك بايلانىس ورناتىپ, ءبىرشاما تاجىريبە جيناقتاعان. ەلىمىزدىڭ بارلىق وڭىرلەرىندە جۇرتشىلىق ءىلتيپاتىنا ىلىنگەن الماتىلىق كومپانيانىڭ ونىمدەرى جوعارى سۇرانىسقا يە. اقىرى قايراتتىڭ كومانداسى ارىپتەستىك شەڭبەرىن كەڭەيتىپ, ءونىمدى وزدەرى شىعارۋ ارقىلى تاۋارلار قۇنىن ارزانداتۋدى ۇيعارعان. ءسويتىپ, اۋماعى 2 مىڭ شارشى مەترلىك كاسىپورىننىڭ قۇرىلىسىنا 70 ميلليون تەڭگە قارجى قۇيىلدى. جىل ىشىندە 33 ميلليون تەڭگەنىڭ 157 دانا دۇنيەسى شىعارىلۋى بۇل قادامنىڭ ساتتىلىگىن ايقىندايدى. قازىر «ءجاميلا» سەرىكتەستىگى, «Zeta» فيرماسىنان جەتكىزىلەتىن تاۋارلاردى قوسقاندا 1,5 مىڭداي اتاۋداعى م ۇلىكتى ساۋداعا شىعارىپ ءجۇر. ەڭ باستىسى, جەرگىلىكتى 127 تۇرعىن تۇراقتى جۇمىس ورنىن تاپقان. اۋىل جىگىتتەرىنىڭ باتىلدىعى يگى ماقساتقا جول اشقانىنا سۇيسىنەسىڭ. مۇنداعى باستى تىرەنىش – ساپا كورسەتكىشتەرىنىڭ جوعا­رى­لىعى. سوندىقتان تاپسىرىس بەرۋشىلەر دە كوبەيە تۇسكەن. ولاردىڭ قاتارىندا تالعام­پاز استانالىقتاردىڭ قاتارى قالىڭ­داۋ ەكەندىگىن بايقادىق. «ءجا­ميلا» ونىمدەرىنىڭ باعاسىنا كەلسەك, اۋزىمىزدان «بارەكەلدى» شىعا­دى. قاراڭىز. ماسەلەن, مەك­تەپ وقۋ­شىسىنىڭ ۇستەلى مەن ورىن­دىعىنان تۇراتىن جيىن­تىق ورتا ەسەپپەن سەگىز مىڭ تەڭگە تۇرادى. بۇگىنگى جيھاز دۇكەن­دەرى­نەن مۇنداي باعاعا تۇشىمدى ءدۇ­نيە تابا الار ما ەكەنسىز؟ بۇعان قوسا, سەرىكتەستىك جەكە تاپسىرىس­پەن دە جيھازداردى قيالىڭىز جەت­كەن كوركەمدىكپەن دايىنداي بەرەدى. جۇمىس ىستەي باستاعانىنا ءبىر جىل ەندى تولعان اۋىل كاسىپورنى ءۇشىن بۇل ايتا قا­لارلىقتاي جەتىستىك. فابريكا باسشىلىعى الداعى ەكى جىلدا كاسىپورىندى تولىق جوبالىق قۋاتىنا قوسۋدى جوسپارلاپ وتىر. بۇل دەگەنىڭىز جشس جىلىنا 180 مىڭ دانا بۇيىم شىعارىپ, جۇمىسكەرلەر سانىن 200-گە جەتكىزەدى دەگەن ءسوز. «اقمولا-مەديا ورتالىعى» ۇيىمداستىرعان ءباسپاسوز-تۋرى بارىسىندا جىبەك جولىنداعى يندۋستريالاندىرۋدىڭ ەكىنشى بەسجىلدىعى اياسىندا جۇمىس باستاعان تاعى ءبىر كاسىپورىندا بولدىق. «قاز-ارت» قازاقستان كوركەم كومبيناتى» اتاۋىنداعى جاۋاپكەرشىلىگى شەكتەۋلى سەرىك­تەستىك ديزاين, جوبالاۋ, ەس­كەرتكىشتەر, بيۋستتەر, قۇلپىتاستار دايىنداۋمەن اينالىسادى ەكەن. جوبانىڭ جالپى قۇنى – 400 ميلليون تەڭگە. قازىر مۇندا نەگىزگى تسەحتار قۇرىلىسى اياقتالىپ, جابدىقتار ورنالاستىرىلۋدا. ۇدەمەلى يندۋستريالىق-يننوۆاتسيالىق دامۋ باعدار­لا­ماسىنداعى جاڭا كاسىپورىن جى­لىنا 400 توننا قۇيما بۇيىم­دارىن دايىندايدى, دەيدى «قازارتتىڭ» باس ديرەكتو­رى ساپار شايماردانوۆ. كوم­بي­ناتتىڭ اشىلۋى كاسىپورىننىڭ جوعارى ساپالى كوركەم بۇيىمدار نارىعىنداعى مۇمكىندىگىن كەڭەيتە تۇسەدى. وندىرىستىك جاڭا ورلەۋ اقمولالىق تاپسىرىس بەرۋشىلەرمەن عانا ەمەس, ەلى­مىزدىڭ وزگە وڭىرلەرىندەگى, تمد اۋماعىنداعى ءارىپ­تەستەرمەن بايلانىسىمىزدى نىعايتىپ, جەرگىلىكتى سۋرەتشىلەردىڭ, ساۋلەتشىلەردىڭ, ديزاينەرلەردىڭ شىعارماشىلىق بەلسەندىلىگىن ارتتىرادى. ءبىزدىڭ جوبالاۋىمىز بويىنشا, وسىنداعى 50 ادامنىڭ ايلىق جالاقىسى 100 مىڭ تەڭگەدەن كەم بولمايدى. ارنايى تاقتادا استانا قالاسىنان, باسقا دا وبلىستاردان تاپسىرىس بەرۋشىلەردىڭ ءتىزىمى, ونى قاي مەرزىمدە دايىنداۋ كەرەكتىگى جازىلىپ قويىلىپتى. وسىعان قاراپ كومبيناتتىڭ بولاشاعىن باعامداۋعا بولاتىنداي. ءسوز اراسىندا, كوكشەتاۋ قالاسىندا ورناتىلاتىن كەڭەس وداعىنىڭ باتىرى, ايگىلى عالىم مالىك عابدۋلليننىڭ 3,5 مەترلىك ەسكەرتكىشى دايىندالىپ جاتقانىن جەتكىزگىمىز كەلەدى. شىعارماشىلىق ۇجىم الدىن الا اشىپ ايتپاعانىمەن, قازاق حاندىعىنىڭ 550 جىلدىعىنا, ۇلى جەڭىستىڭ 70 جىلدىعىنا, باسقا دا مەرەكەلىك سالتاناتتارعا قاتىستى ىزدەنىس ۇستىندە ەكەندىگىن اڭعاردىق. باقبەرگەن امالبەك, «ەگەمەن قازاقستان». اقمولا وبلىسى, ارشالى اۋدانى.