قاراعاندى. 5 ناۋرىز. بۇگىن قاراعاندى وبلىستىق اۋدانارالىق مامانداندىرىلعان قىلمىستىق ىستەر سوتى كىسى ولتىرۋگە ارەكەت جاساعان قارقارالى اۋدانى بۇرىنعى اكىمىنىڭ ۇلى مەن ونىڭ دوسىنىڭ سوڭعى ءسوزىن تىڭدادى. بۇل تۋرالى egemen.kz حابارلادى.
سوت الدىنا كەلگەن بۇرىنعى اكىمنىڭ بالاسى ناريمان باتىربەكوۆ پەن ونىڭ دوسى قايرات ورداشەۆقا كىسى ولتىرۋگە ارەكەت جاسادى دەگەن ايىپ تاعىلىپ وتىر.
وتكەن جىلعى 29 قازان كۇنى ولار ماي قۇيۋ بەكەتىندە ستۋدەنت سانات حاسەنوۆتى جابىلىپ سوققىعا جىعادى. دومكراتمەن باسىنان ۇرعاننان كەيىن ەسىنەن تانىپ قالعان جىگىتتى «ولدىگە» ساناعان ەكى دوس ونى وزدەرىنىڭ «ۆاز» كولىگىنىڭ جۇك سالعىشىنا سالىپ الىپ, ورمانعا اكەتەدى. سول جاقتا ستۋدەنتتىڭ ۇستىنەن كيىمدەرىن شەشىپ الىپ, ءوزىن ايدالاعا قالدىرىپ كەتەدى. وسىندا جىگىتتىڭ كولىگى مەن كيىمدەرىن ورتەيدى.
بىراق ارادا ءبىراز ۋاقىت وتكەننەن كەيىن سانات ەسىن جينايدى. ۇستىندە ەشقانداي كيىمى جوقتىعىنا, كۇننىڭ سۋىقتىعىنا, جەردىڭ قار باسىپ جاتقانىنا قاراماستان, جاس جىگىت ءبىر كەزدە ورمان شەتىندەگى جولدى دا تاۋىپ الادى. وعان كولىك توقتاتىپ, ءمىنۋدىڭ ورايى كەلەدى مۇنىڭ جايىنا قانىققان جۇرگىزۋشى بىردەن اۋرۋحاناعا تارتادى.
اتالعان قىلمىستى جاساۋعا اۋدان اكىمى ۇلىنىڭ قاتىسى بار ەكەنى كوپ ۇزاماي بەلگىلى بولىپ قالادى. وسى جانجالدان كەيىن ناريماننىڭ اكەسى نۇرلان باتىربەكوۆ الدىمەن ەڭبەك دەمالىسىن الادى, ارتىنان جۇمىستان دا شىعادى.
اقىرىندا باتىربەكوۆ پەن ورداشەۆتىڭ سوت الدىندا جاۋاپ بەرەتىن كەزى دە كەلدى. ولاردىڭ ەكەۋى دە جاساعان قىلمىستارىن مويىندادى. كەلەسى اپتادا بۇل ىسكە دە نۇكتە قويىلادى.
پروكۋرور ايىپتالۋشىلاردىڭ ءاربىرىن 11 جىلدان باس بوستاندىقتارىنان ايىرۋدى سۇراپ وتىر. ال سوتتالۋشىلار بۇگىنگى سوڭعى سوزدەرىندە وزدەرىنە جەڭىلدىك بەرۋدى ءوتىندى. بۇرىنعى اكىمنىڭ بالاسى ءتىپتى زارداپ شەگۋشى مەن ءوزىنىڭ اتا-اناسىنان كەشىرىم سۇراعان كەزىندە كوزىنە جاس تا الدى.
«مەنىڭ ويىمدا ساناتتى ءولتىرۋ بولعان جوق, - دەدى ناريمان باتىربەكوۆ. – شىنىن ايتسام, ورنىنا كەلمەس نارسە جاساپ العانىمدى بىلگەنىمدە, قاتتى قورقىپ كەتتىم. وسىنىڭ ءبارىن بىردەن اكە-شەشەمە ايتۋىم كەرەك ەدى. مەن ساسىپ قالدىم. ەندى جاساعان جاعىمسىز تىرلىكتەرىم ءۇشىن ساناتتىڭ اتا-اناسىنان, ءوزىمنىڭ اكە-شەشەمنەن كەشىرىم سۇراعىم كەلەدى».
قايرات ورداشەۆ تە كەشىرىم سۇراپ, ءزابىر كورگەن جىگىتتىڭ اتا-اناسىنا بىرنەشە رەت باسىن ءيدى.
«مەنى ادامشا تۇسىنىڭىزدەر, سەن ەشقاشان مۇندايدى جاساعان ەمەسپىن, الدا دا جاسامايمىن, - دەدى قايرات ورداشەۆ. – مەن ساناتتى تانىمايمىن, ونى كىم ەكەنىن, قايدان ەكەنىن بىلمەيمىن. مەنىڭ ونىمەن بۇرىن كيكىلجىڭىم بولعان ەمەس. مەن بىردەن قۇقىق قورعاۋ ورگاندارىنا بارۋىم كەرەك ەدى, بىراق قورقىپ قالدىم».
اتالمىش ءىس بويىنشا ۇكىم 10 ناۋرىز كۇنى شىعارىلادى.
ايقىن نەسىپباي.
دەرەك, سۋرەت: egemegen.kz.
